ބަރުލަމާނީ ނިޒާމަކީ ރާއްޖެއަށް އެންމެ އެކަށީގެންވާ ނިޒާމެއް ނޫންކަމަށް ވިދާޅުވެ، ކެބިނެޓުގެ ބައެއް ވަޒީރުންވެސް އެ ނިޒާމަށް ތާއީދުނުކުރައްވާކަން ހާމަކުރައްވައިފިއެވެ.
މި ނިޒާމަށް ތާއިދު ނުކުރައްވާކަން މިހާތަނަށް ހާމަކުރެއްވި ވަޒީރުންގެ ތެރޭގައި ފޮރިން މިނިސްޓަރ އަބްދުﷲ ޝާހިދުއާއި ހޯމް މިނިސްޓަރ އިމްރާން އަބްދުﷲގެ އިތުރުން އިކޮނޮމިކް މިނިސްޓަރ ފައްޔާޟް އިސްމާއިލް ހިމެނިވަޑައިގަންނަވައެވެ.
ބަރުލަމާނީ ނިޒާމަށް ތާއީދުނުކުރައްވާކަން ހާމަކުރައްވާ ފޮރިން މިނިސްޓަރ އަދި އދ.ގެ އާންމު މަޖިލީހުގެ ރައީސް ޢަބްދުﷲ ޝާހިދު ކުރެއްވި ޓުވީޓެއްގައި ވިދާޅުވީ، އެމަނިކުފާނު ތާއީދުކުރައްވަނީ ރައްޔިތުންގެ ސީދާ ވޯޓަކުން ދައުލަތާއި، ސަރުކާރުގެ ވެރިޔާ ހޮވުމަށްކަމަށެވެ. އަދި ޤާނޫނު ހެދުމުގެ ބާރާއި ސަރުކާރު ޒިންމާދާރުކުރުވުން ރައްޔިތުންގެ މަޖިލީހުގައި އޮތުމަށްކަމަށާއި، އަދުލު އިންސާފު ޤާއިމްކުރުން ފަނޑިޔާރު ގޭގައި އޮތުމަށްކަމަށެވެ.
އަޅުގަނޑު ތާއީދުކުރަނީ ރައްޔިތުންގެސީދާ ވޯޓަކުން ދައުލަތާއި ސަރުކާރުގެވެރިޔާހޮވުމަށް. ޤާނޫނު ހެދުމުގެބާރާއި ސަރުކާރު ޒިންމާދާރުކުރުވުން ރައްޔިތުންގެ މަޖިލީހުގައި އޮތުމަށް. އަދުލުއިންސާފު ގާއިމްކުރުން ފަނޑިޔާރު ގޭގައި އޮތުމަށް. ޤާނޫނަށް ބޯލެނބުމުގެ ސިފަ ވެރިންގެ ކިބައިގައިހުރުމަށް
— Abdulla Shahid (@abdulla_shahid) August 16, 2022
އިކޮނޮމިކް މިނިސްޓަރ އަދި ސަރުކާރު ހިންގާ މައި ޕާޓީ، އެމް.ޑީ.ޕީގެ ޗެއަރޕަރސަން އަލްއުސްތާޛު ފައްޔާޟް އިސްމާޢީލް ވިދާޅުވީ، ރާއްޖޭގައި ވެރިކަން ހިންގަން އެމަނިކުފާނަށް ފެނިވަޑައިގަންނަވާ އެންމެ ރަނގަޅު ނިޒާމަކީ އައު ޤާނޫނު އާސީސާއެކު ދެމިތިބި ރިޔާސީ ނިޒާމުކަމަށެވެ. އަދި އެމަނިކުފާނަކީ ފެށުނީއްސުރެ ރާއްޖޭގައި އޮންނަން ޖެހޭނީ ރިޔާސީ ނިޒާމެއްކަމަށް ތާއީދުކުރާ މީހެއްކަމަށްވެސް ބައެއް މީޑިއާތަކާ ވާހަކަދައްކަވަމުން މިނިސްޓަރ ފައްޔާޟް ވިދާޅުވިއެވެ.
ބަރުލަމާނީ ނިޒާމަކީ ރާއްޖެއަށް އެކަށީގެންވާ ނިޒާމެއްނޫންކަމަށް ހޯމް މިނިސްޓަރ އަދި ސަރުކާރު ކޯލިޝަންގައި ހިމެނޭ އަދާލަތު ޕާޓީގެ ރައީސް ޢިމްރާން ޢަބްދުﷲ ވެސް ވަނީ ވިދާޅުވެފައެވެ.
ބަރުލަމާނީ ނިޒާމަކަށް ތާޢީދު ނުކުރައްވާކަން ހާމަކުރައްވާ މިނިސްޓަރ ޢިމްރާން ކުރެއްވި ޓުވީޓެއްގައި ވިދާޅުވީ، ރާއްޖޭގެ މިއަދުގެ ޙާލަތުގައި ބަރުލަމާނީ ނިޒާމް ގެނެސްފިނަމަ ސިޔާސީ ހަމަޖެހުން ގެއްލިގެންދާނެކަމަށެވެ. އަދި އަވަސް އަވަހަށް ސަރުކާރު ބަދަލުވެ، ރައްޔިތުން ބައިބައިވެގެންދާނެކަމަށެވެ. ބަރުލަމާނީ ނިޒާމުގެ ސަބަބުން ރައްޔިތުން ހާލުގައި ޖެހުން ފިޔަވާ އިތުރު މޮޅުކަމެއް ނުވާނެކަމަށްވެސް މިނިސްޓަރ ޢިމްރާން ވިދާޅުވިއެވެ.
Barulamanee nizaamakee MI Raajjea ekasheyna nizaameh noon.Raajjeyge miadhuge haalathugai barulamaanee nizaam genesfinama siyasee hamajehun gelli avas avahah sarukaaru badhalauve Rayyithun bai baive,rayyithun haalugaijehun fiyavai ithuru molhukameh nuvaane.
— Imran Abdulla (@ShimranAb) August 15, 2022
ބާރުލަމާނީ ނިޒާމެއް ރާއްޖެއަށް ގެނައުމަށް ދެކޮޅުކަމަށް ދައުލަތުގެ ބައެއް ވަޒީރުންވެސް ހާމަކުރައްވާފައިވާއިރު، ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލުކުރުމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް، ރައީސް މުހައްމަދު ނަޝީދު އެމް.ޑީ.ޕީގެ ކޮންގްރެސްއަށް ހުށަހެޅުމަށް ނިންމާފައިވާ ޤަރާރު އަނބުރާ ގެންދެވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވަނީ އެދިވަޑައިގެންފައެވެ.
އެމް.ޑީ.ޕީގެ ކޮންގްރެސްއަށް ރައީސް ނަޝީދު ހުށަހަޅުއްވާފައިވާ ޤަރާރާއި ގުޅޭގޮތުން ރައީސް ސާލިހު ވިދާޅުވީ، ބަރުލަމާނީ ނިޒާމަށް އެމަނިކުފާނު ތާއީދު ނުކުރައްވާކަމަށެވެ. އަދި އެމް.ޑީ.ޕީގެ 4 ވަނަ ކޮންގްރެސްއަށް ހުށަހެޅުއްވި ގަރާރު އަނބުރާ ގެންދެވުމަށް އެދިވަޑައިގަންނަވާކަމަށް ރައީސް ސާލިހު ވިދާޅުވިއެވެ.
ރައީސް ސާލިހު ވިދާޅުވީ، ބަރުލަމާނީ ނިޒާމަށް ދިއުމަށް އެމް.ޑީ.ޕީގެ ކޮންގްރެސްއަށް ރައީސް ނަޝީދު ހުށަހަޅުއްވާފައިވާ ގަރާރު ފާސްވާނެކަމަށް ގަބޫލުފުޅު ނުކުރައްވާ ކަމަށެވެ. އަދި އެ ގަރާރު ޕާޓީގެ ތެރެއިން ފާސްވެއްޖެނަމަ އެކަމާއި ގުޅޭގޮތުން ގާނޫނު އަސާސީއަށް ބަދަލު ގެނައުމަށް މަޖިލީހަށް އެ މައްސަލަ ވައްދާ ބަހުސް ކުރަންޖެހޭނެކަމަށް ރައީސް ސާލިހު ވިދާޅުވިއެވެ.