ޕާކިސްތާނަށް ބޯކޮށް ވާރޭވެހި ފެންބޮޑުވުމުގެ ސަބަބުން ހާލުގައި ޖެހުނު މީހުންނަށް އެހީތެރިވުމަށް ބާއްވާ "ހެލްޕް ޕާކިސްތާން" ޓެލެތޯން ފަށައިފިއެވެ.
މިއީ ރާއްޖޭގައި ހުންނަ ޕާކިސްތާނުގެ ހައި ކޮމިޝަނާއި، ޕާކިސްތާން މޯލްޑިވްސް ފްރެންޑްޝިޕް އެސޯސިއޭޝަނުން އިސްނަގައިގެން، ދަޢުލަތުގެ މީޑިއާ، ޕަބްލިކް ސަރވިސް މީޑިއާ، ޕީ.އެސް.އެމްއާއި ރާއްޖޭގެ މީޑިއާތައް ގުޅިގެން ކުރިއަށްގެންދާ ހަރަކާތެކެވެ.
"ހެލްޕް ޕާކިސްތާން" ޓެލެތޯން ފެށުމަށް ޕީ.އެސް.އެމްގެ ޓީވީއެމް އިމާރާތުގައި ބޭއްވި ރަސްމިއްޔާތު ޝަރަފުވެރިކޮށްދެއްވީ، މިނިސްޓަރ އޮފް އިކޮނޮމިކް ޑިވެލޮޕްމަންޓް އަލްއުސްތާޛު ފައްޔާޟް އިސްމާޢީލެވެ.
މި ރަސްމިއްޔާތުގައި ވާހަކަފުޅުދައްކަވަމުން އިކޮނޮމިކް މިނިސްޓަރ ފައްޔާޟް އިސްމާޢީލް ވިދާޅުވީ، ޕާކިސްތާނާ ރާއްޖޭގެ ގުޅުމަކީ ޒަމާންވީ ގާތްގުޅުމެއްކަމަށާއި، ޕާކިސްތާނަކީ ރާއްޖެއަށް އެތައް ގޮތަކުން އެހީތެރިވެދޭ ޤައުމެއްކަމަށެވެ. ވަކިން ޚާއްސަކޮށް ރާއްޖޭގެ ޞިއްޙީ ދާއިރާއާއި، ތަޢުލީމީ ދާއިރާގެ އިތުރުން އިޖްތިމާޢީ އެކިއެކި ކަންކަމުގައި ޕާކިސްތާނުން ފޯރުކޮށްދީފައިވާ އެހީތެރިކަން މިނިސްޓަރ ފާހަގަކުރެއްވިއެވެ.
މިނިސްޓަރ ފައްޔާޟް ވިދާޅުވީ، ޕާކިސްތާނަށް މިހާރު ކުރިމަތިވެފައިވަނީ މިއިން ޒަމާނަކު އެ ޤައުމު ދެކިފައިނުވާ ފަދަ ހިތްދަތި ޙާލަތެއް ކަމަށެވެ. ބޯކޮށް ވާރޭވެހި ފެންބޮޑުވުމުގެ ސަބަބުން މުޅި ޤައުމު ސުންނާފަތިވެފައިވާކަން ފާހަގަކުރައްވާ މިނިސްޓަރ ވިދާޅުވީ، މިއީ ޕާކިސްތާނުން ރާއްޖެއަށް ވެދިން އެހީތެރިކަން ހަނދާންކޮށް، ދިވެހިން ޕާކިސްތާނަށް އެހީވާންވީ ވަގުތުކަމަށެވެ. ޕާކިސްތާނުގެ ލޮބުވެތި ރައްޔިތުންނަށް އެހީވުމަށް، މި ޓެލެތޯނުގައި އެންމެހާ ދިވެހިން ބައިވެރިވުމަށް މިނިސްޓަރ ވަނީ ގޮވާލައްވާފައެވެ.
"އަޅުގަނޑުމެން އެންމެނަށްވެސް އެބަ އިނގޭ ކްލައިމެޓް ޗޭންޖުގެ ސަބަބުން އެކިއެކި ޤައުމުތަކުގައި ދިވެހިރާއްޖެވެސް ހިމެނޭގޮތަށް މިފަދަ އެތައް ކަމެއް ހިނގަމުން އެބަދޭ. ޕާކިސްތާނުގެ އަޚުންނާއި އުޚުތުންނަށް ދިމާވެފައިވަނީ ދުވަހަކުވެސް ޕާކިސްތާނަށް ކުރިމަތިލާން ނުޖެހޭވަރުގެ ބޮޑު ކާރިސާއެއް. އަޅުގަނޑު އެދެނީ އުއްމީދު ކުރަނީ އެންމެހާ ދިވެހި ލޮބުވެތި ރައްޔިތުން އަޅުގަނޑުމެންނާ އެއްކޮށް މިކަމުގައި ޕާކިސްތާނުގެ ރައްޔިތުންނަށް އެބޭފުޅަކަށް ވެވެން އޮތް މިންވަރަކުން ބައިވެރިވެދެއްވާ އެހީތެރިވެދެއްވުން" މިނިސްޓަރ ފައްޔާޟް ވިދާޅުވިއެވެ.
ޓެލެތޯން ފެށުމަށް ބޭއްވި ރަސްމިއްޔާތުގައި ވާހަކަދައްކަވަމުން ޕާކިސްތާނުން ރާއްޖެއަށް ކަނޑައަޅާފައި ހުންނަވާ ސަފީރު ވައިސް އެޑްމިރަލް (ރިޓަޔަރޑް) އަތާރް މުޚްތާރް ވިދާޅުވީ، މޫސުމީ ބަދަލުތަކުގެ ސަބަބުން މުޅި ދުނިޔެ ބޮޑު ނުރައްކަލަކަށް ހުށަހެޅިފައިވާކަމަށާއި، ޕާކިސްތާނުންވެސް މިއަދު ފެނިގެންދަނީ އެ މަންޒަރުކަމަށެވެ. ބޯކޮށް ވާރެހި ފެން ބޮޑުވުމުގެ ސަބަބުން ޕާކިސްތާނުގެ ތިންބައިކުޅަ އެއްބަޔަށް އަސަރުކޮށް، އެތައް މިލިއަން ބައެއްގެ ގެދޮރު ގެއްލި ޙާލުގައި ޖެހިފައިވާކަން ސަފީރު ފާހަގަކުރެއްވިއެވެ.
މި ދަތި އުނދަގޫ ޙާލަތުގައި، ބައިނަލްއަޤްވާމީ އެހީ ދޭ ޖަމާޢަތްތަކާއި، އަވަށްޓެރި ޤައުމުތަކުން ޕާކިސްތާނަށް ދެމުންދާ އެހީތެރިކަން ޝުކުރުވެރިކަމާއެކު ބަލައިގަންނަކަމަށް ސަފީރު ވިދާޅުވިއެވެ.
"މި ނާޒުކު ޙާލަތުގައި އަޅުގަނޑުމެންނަށް ދުނިޔޭގެ ޖަމިއްޔާ ޖަމާޢަތްތަކުންނާއި، އަވަށްޓެރި ޤައުމުތަކުން ފޯރުކޮށްދޭ އެހީތެރިކަމަށްޓަކާ ޝުކުރު އަދާކުރަން. މި ދަނޑިވަޅުގައި ދިވެހިންގެ ފަރާތުން ލިބޭ ހިތްވަރާއި އެހީތެރިކަންވެސް އަޅުގަނޑު ފާހަގަކުރަން" ޕާކިސްތާނުން ރާއްޖެއަށް ކަނޑައަޅާފައި ހުންނަވާ ސަފީރު ވިދާޅުވިއެވެ.
މި ޓެލެތޯން ކުރިއަށް ގެންދިއުމަށް ހަމަޖެހިފައިވަނީ މިއަދު ހެނދުނު 8:00 އިން ރޭގަނޑު 12:00 އަށެވެ. ޕާކިސްތާނަށް އެހީވުމުގެ ގޮތުން މާލޭގެ 5 ސަރަޙައްދެއްގައި ފަންޑު ފޮށި ވަނީ ބެހެއްޓިފައެވެ. އެގޮތުން އާޓިފިޝަލް ބީޗު، ވިލިމާލޭ ފެރީ ޓަރމިނަލް، ދިވެހިރާއްޖޭގެ އަޑު، ޓީވީއެމް، ޖުމްހޫރީ ޕާކުގެ އިތުރުން ހުޅުމާލޭ ފޭސް 1 އަދި ފޭސް 2 ގައި ފަންޑު ފޮށި ބެހެއްޓިފައިވެއެވެ.
މީގެ އިތުރުން ޕާކިސްތާން މޯލްޑިވްސް ފްރެންޑްޝިޕް އެސޯސިއޭޝަންގެ ރުފިޔާ އަދި ޑޮލަރު އެކައުންޓަށް ފައިސާ ޖަމާކުރެވޭނެކަމަށާއި، ދިރާގު-ޕޭ އަދި އުރީދޫ އެމް-ފައިސާ މެދުވެރިކޮށްވެސް ފައިސާގެ އެހީތެރިކަން ފޯރުކޮށްދެވޭނެކަމަށް މިކަން އިންތިޒާމް ކުރާ ފަރާތުން ވިދާޅުވެއެވެ.
"ހެލްޕް ޕާކިސްތާން" ޓެލެތޯނަކީ ޕާކިސްތާނުގެ ރައްޔިތުންނަށް އެހީތެރިވުމަށް ހިންގާ ހަރަކާތްތަކުގެ ފެށުމެއްކަމަށާއި، ޓެލެތޯން އެއް ދުވަހަށް ކުރިއަށްގެންދިޔަ ނަމަވެސް، ޕާކިސްތާނަށް އެހީވުމަށް އިތުރު ހަރަކާތްތައްވެސް ކުރިއަށްއޮތްތަނުގައި ހިންގާނެކަމަށް ޕާކިސްތާން މޯލްޑިވްސް ފްރެންޑްޝިޕް އެސޯސިއޭޝަނުން ބުނެއެވެ.
ޕާކިސްތާނުގައި ފެންބޮޑުވުމާ ގުޅިގެން 33 މިލިޔަން މީހުންގެ ދިރިއުޅުން ވިއްސިވިހާލިވެފައިވާއިރު، ފެންބޮޑުވުމާ ގުޅިގެން އެ ޤައުމުން މަރުވި މީހުންގެ ޢަދަދު 1300 އަށްވުރެ މައްޗަށް އަރައެވެ.