މޫސުމީ ބަދަލުތަކުގެ މައްސަލައިގައި ދިވެހި ޒުވާނުންގެ ކަންބޮޑުވުންތައް ކޮޕް 27 ސަމިޓަށް ހުށައެޅުމަށް އެންވަޔަރަމަންޓް މިނިސްޓްރީން ތައްޔާރުވާން ފަށައިފިއެވެ.
ޔުނައިޓެޑް ނޭޝަންސް ފްރޭމްވާރކް ކޮންވެންޝަން އޮން ކްލައިމެޓް ޗޭންޖް (ޔޫއެންއެފްސީސީސީ) ކޮޕް 27 ޖަލްސާ މިއަހަރު ބޭއްވުމަށް ހަމަޖެހިފައިވަނީި އަންނަ މަހުގައި މިޞްރުގެ ޝަރުނުއްޝައިޚްގައެވެ.
އެންވަޔަރަމަންޓް މިނިސްޓްރީން ވިދާޅުވީ، ކޮޕް 27 ސަމިޓަށް ތައްޔާރުވުމުގެ ގޮތުން ޔުނެސެފްއާއި އެންވަޔަރަމަންޓް މިނިސްޓްރީ އަދި އދ.ގެ އެހެނިހެން އިދާރާތަކާއި ގުޅިގެން "މަލްޓި ސްޓޭކް ހޯލަޑަރ ކޮންސަލްޓޭޝަން ވިތު ޔަންގް ޕީޕަލް އޮން ކްލައިމެޓް އެކްޝަން"ގެ ނަމުގައި ބައްދަލުވުމެއް މިމަހުގެ 12 ވަނަ ދުވަހު ބޭއްވުމަށް ހަމަޖެހިފައިވާކަމަށެވެ.
މި ބައްދަލުވުމަށް ޒުވާނުންނާއި ސަރުކާރުގެ އިދާރާތަކާއި އދ.ގެ އިދާރަތަކާއި އަމިއްލަ ކުންފުނިތަކާ އެހެނިހެން މުއައްސަސާތައް ހިމެނޭ ގޮތަށް 150 ބައިވެރިންނަށް ދައުވަތު ވަނީ އަރުވާފައެވެ. އަދި މި ބައްދަލުވުމުގައި މޫސުމީ ބަދަލުތަކުގެ މައްސަލައިގައި ދިވެހި ޒުވަނުންގެ ކަންބޮޑުވުންތަކާއި، ޝުޢޫރުތައް ދެނެގަންނާނެކަމަށް އެންވަޔަރަމަންޓް މިނިސްޓްރީން ވިދާޅުވެއެވެ. މި ބައްދަލުވުމަށް ތައްޔަރުވުމުގެ ގޮތުން މިމަހުގެ 11 ވަނަ ދުވަހު ޒުވާނުންނަށް ޚާއްސަ ބައްދަލުވުމެއް ބޭއްވުމަށްވެސް ވަނީ ހަމަޖެހިފައެވެ.
އެންވަޔަރަމަންޓް މިނިސްޓަރ އައިމިނަތު ޝައުނާ ވަނީ ދިވެހިރާއްޖެއަކީ އެހެން ޖަޒީރާ ޤައުމުތަކެކޭ ވެސް އެއްފަދައިން މޫސުމީ ބަދަލުތަކުގެ ސަބަބުން ނާޒުކު ޙާލަތެއްގައިވާ ޤައުމަކަށްވުމުން، މޫސުމީ ބަދަލުތަކާ ގުޅިގެން ރާއްޖެއިން ކުރާ ވަކާލާތްތަކާއި ނިންމޭ ނިންމުންތަކުގައި ޒުވާނުންގެ ބައިވެރިވުން އިތުރުކުމަކީ ސަރުކާރުން އިސްކަންދޭކަމެއްކަން ފާހަގަކުރައްވާފައެވެ. މިފަދަ ކަންކަމުގައި ކުދި ޖަޒީރާ ޤައުމުތަކުގެ ޒުވާނުން ބާރުވެރިކުރުވުމަކީ މޫސުމީ ބަދަލުތަކުގެ އަސަރު އެންމެ ބޮޑަށް ކުރާނެ ފަރާތްތަކަށް، މި މައްސަލައަށް އެންމެ އެކަށީގެންވާ ހައްލުތައް ހޯދުމަށް މަގުފަހިވެގެންދާނެކަމެއް ކަމަށް ދެކެވަޑައިގަންނަވާކަމަށް މިނިސްޓަރ ފާހަގަކުރެއްވިއެވެ.
ކޮޕް 27 އަށް ތައްޔާރުވުމަށް ބާއްވާ ބައްދަލުވުމުގެ މަޝްވަރާތަކުގެ ޚުލާސާއެއް ކޮޕް 27 ޖަލްސާގައި ރާއްޖެއިން ކުރާ ވަކާލާތުގައި ހިމެނުމަށް ތައްޔާރުކުރުމަށް ހަމަޖެހިފައިވާކަމަށް އެންވަޔަރަމަންޓް މިނިސްޓްރީން ވިދާޅުވެއެވެ. މި ބައްދަލުވުން ކުރިއަށް ގެންދެވެނީ ވޭތުވެދިޔަ އަހަރު ކޮޕް 26 އަށް ތައްޔާރުވުމުގެ ގޮތުން ދިވެހި ސަރުކާރާއި ޔުނިސެފް އަދި ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާމާއި ގުޅިގެން އިންތިޒާމް ކުރެވުނު ބައްދަލުވުމުގެ ތަޖުރިބާއަށް ރިއާޔަތްކޮށެވެ.
އެ ބައްދަލުވުމުގައިވެސް ކުދި ޖަޒީރާ ޤައުމުތަކަށް ނިސްބަތްވާ ޒުވާނުން ބައިވެރިވެ މޫސުމި ބަދަލުތަކާއި ގުޅޭގޮތުން ޚިޔާލު ފާޅުކޮށް ކުރިއަށް ގެންދެވޭ މަސައްކަތްތައް ހިއްސާކުރިއެވެ. އަދި ކޮޕް 26 އާ ގުޅުވައުގެން ބޭއްވޭ ކޮންފަރެންސް އޮފް ޔޫތް 21 ގައިވެސް ރާޢްޖޭގެ ފަރާތުން ކުޑަކުދިންގެ ޙައްޤުތަކާއި މޫސުމީ ބަދަލުތަކާއި ގުޅިގެން ވަކާލާތުކޮށްފައިވެއެވެ.