މި ސަރުކާރުން ދޫކުރާ ގޯއްޗާއި ފްލެޓާމެދު އިތުރު ސުވާލު އުފައްދާނެ ޖާގައެއް ނުދޭނަން: މިޢްވާން

މި ސަރުކާރުން ރައްޔިތުންނަށް ދޫކުރާ ފްލެޓާއި ގޯއްޗާއިމެދު އިތުރު ސުވާލު އުފައްދާނެ ޖާގައެއް ނުދޭނެކަމަށް ރައީސުލްޖުމްހޫރިއްޔާގެ އޮފީހުގެ ތަރުޖަމާން މިޢްވާން މުޙައްމަދު ވިދާޅުވެއްޖެއެވެ.

މާލޭ ސަރަހައްދުން ސަރުކާރުން 4000 ފްލެޓާއި، 3000 ގޯތި ދޫކުރުމަށްޓަކާ ހުޅުވާލި ފުރުޞަތުގައި ލިބުނު ފޯމުތައް އިވެލުއޭޓްކުރުމުގެ މަސައްކަތް މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ އިން މިހާރު އަންނަނީ ކުރަމުންނެވެ.

މާލޭ ސަރަޙައްދަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ލުޔެއް ހޯއްދަވައިދެއްވުމުގެ ގޮތުން މި ސަރަހައްދުން މާލޭގެ ރައްޔިތުންނަށް ގޯއްޗާއި ފްލެޓް ދޫކުރުމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ މުހިއްމު ވަޢުދުފުޅެކެވެ.

ރައީސްގެ މި ވަޢުދުފުޅާއެއްގޮތަށް ސަރުކާރުގެ "ގެދޮރުވެރިން" ޕްރޮގްރާމުގެ ތެރެއިން މާލޭގެ ރައްޔިތުންނަށް ޚާއްސަކޮށްގެން "ބިންވެރިޔާ ސްކީމް"އިން ދޫކުރާ ގޯއްޗަށާއި، "ގެދޮރުވެރިޔާ ސްކީމް"އިން ދޫކުރާ ފްލެޓަށް އެދި ހުޅުވާލީ މިއަހަރުގެ ޖޫން 26 ގައެވެ. ގޯއްޗާއި ފްލެޓަށް އެދި ފޯމް ހުށަހެޅުމަށް އެންމެ ފުރަތަމަ ކަނޑައެޅި ސުންގަޑިއަކީ ސެޕްޓެމްބަރު 26 ވަނަ ދުވަހެވެ. ނަމަވެސް އެ މުއްދަތު އޮކްޓޫބަރު 15 ގެ ނިޔަލަށް ފަހުން އިތުރުކުރިއެވެ. މި މުއްދަތު އިތުރުކޮށްފައިވަނީ ބިންވެރިޔާ ސްކީމްގެ ދަށުން މާލެ ސަރަހައްދުން ބަންޑާރަ ގޯތި ދޫކުރުމުގެ އުޞޫލަށް ގެނައި އިސްލާހަކާއި ގުޅިގެނެވެ.

މާލޭ ސަރަޙައްދުން ފްލެޓާއި ގޯތިދޫކުރުމަށް ސަރުކާރުން ކުރަމުންދާ މަސައްކަތްތަކާގުޅޭގޮތުން ވާހަކަދައްކަވަމުން ރައީސުލްޖުމްހޫރިއްޔާގެ އޮފީހުގެ ތަރުޖަމާން މިޢްވާން މުޙައްމަދު ވިދާޅުވީ، ފްލެޓާއި ގޯއްޗަށް އެދި ކުރިމަތިލާ ފަރާތްތަކަށް އިތުރު ތަކުލީފެއް މި ސަރުކާރުން ނުޖައްސާނެކަމަށެވެ. އަދި ކުއްލިއަކަށް ލިޔުންތަކެއް ބަހާލުމުގެ ބަދަލުގައި، މި ސަރުކާރުން އެކަން ކުރާނީ ވަރަށް ދެފުށް ފެންނަ ނިޒާމެއްގެތެރެއިން ކަމަށް މިޢުވާން ވިދާޅުވިއެވެ.

މިޢްވާން ވިދާޅުވީ، މި ސަރުކާރުގައި ރައްޔިތުންނަށް ފްލެޓާއި ގޯތިދިނުމަށްފަހު ދެން އެކަމާގުޅޭގޮތުން އިތުރު ސުވާލު އުފައްދާނެ ޖާގައެއް ނުދޭނެކަމަށެވެ. އަދި ރައީސުލްޖުމްހޫރިއްޔާގެ ވަޢުދުފުޅާއެއްގޮތަށް ފްލެޓާ ގޯތިދޫކުރާނެކަމުގެ ޔަޤީންކަން އޭނާ ދެއްވިއެވެ.

"އަޅުގަނޑުމެން އެކަން ކުރާނީ އެކަމުގައި އިތުރު ސުވާލެއް އުފައްދާނެ ފުރުޞަތެއް ނުދީ، ވަރަށް ދެފުށް ފެންނަ ގޮތަކަށް. މިހާރު ވެރިފިކޭޝަން ޕްރޮސެސް ކުރިއަށް އެބަދޭ. ރައީސް ވިދާޅުވެފައިވާނެ މި ދައުރު ނިމުމުގެ ކުރިން ރޯނުދަމާ، ގޯތި ކަނޑާ، ގޯތީގެ ފަތްކޮޅު ދެއްވާނެކަމަށް. އެހެންވީމަ އެކަން ކުރިއަށްދާނެ. އިތުރު ސުވާލު އުފައްދާނެ ފުރުޞަތެއް އިރާދަކުރެއްވިއްޔާ ނުލިބޭނެ" މިޢްވާން ވިދާޅުވިއެވެ.

ފްލެޓާއި ގޯއްޗަށް އެދި ކުރުމަތިލުމަށް ސަރުކާރުން ހުޅުވާލި ސުންގަޑި ހަމަވިއިރު، "ގެދޮރުވެރިން ޕޯޓަލް"އަށް 35،861 ފޯމް ލިބިފައިވާކަމަށް ޕްލޭނިން މިނިސްޓްރީން ވިދާޅުވެއެވެ. މީގެ ތެރޭގައި ބިންވެރިޔާ ސްކީމްއަށް 15،164 ފޯމު ހުށައަޅާފައިވެއެވެ. ގެދޮރުވެރިޔާ ސްކީމްގެ ދަށުން 3 ކޮޓަރީގެ އެޕާޓްމަންޓަށް 14،489 ފޯމް ހުށައަޅާފައިވެއެވެ. އަދި މިސްކީމްގެ ދަށުން 2 ކޮޓަރީގެ އެޕާޓްމަންޓަށް އެދި 6208 ފޯމް ވަނީ ހުށައަޅާފައެވެ.

ޕްލޭނިންގ މިނިސްޓްރީން ވިދާޅުވެފައިވަނީ ކުރިއަށް އޮތް 3 މަސްދުވަހުގެ ތެރޭގައި ފޯމުތަކުގެ ފައިނަލް ވެރިފިކޭޝަން މަސައްކަތްތައް ނިންމާލެވޭނެކަމަށެވެ. އަދި ގޯއްޗާއި ފްލެޓް ލިބޭ ފަރާތްތައް ކަނޑައަޅާނީ ރައްޔިތުންގެ އިތުބާރު ލިބޭނެހެން އިންސާފުވެރިކަމާއެކުގައިކަން އެ މިނިސްޓްރީންވެސް ވިދާޅުވެފައިވެއެވެ.