ދެ ރަށެއްގައި ކުޅިވަރު ވަސީލަތްތައް ގާއިމުކުރުމަށާއި ހުޅުމާލޭ ހަތަރު ނަންބަރު ފުޓްސަލް ދަނޑުގެ ޓާފް ބަދަލުކުރުމުގެ މަސައްކަތް ހަވާލުކޮށްފިއެވެ.
އެގޮތުން މުލަކަތޮޅުގެ ރަތްމަންދޫ ފުޓްސަލް ދަނޑު ތަރައްޤީ ކުރުމަށާއި، ހުވަދުއަތޮޅު އުތުރުބުރީ ގެމަނަ ފުށީ ޔޫތު އެންޑް ކޮމިއުނިޓީ ސެންޓަރު ތަރައްޤީ ކުރުމުގެ މަސައްކަތްވަނީ ބަޔަކާ ހަވާލުކޮށްފައެވެ.
ޔޫތު މިނިސްޓްރީން ރަތްމަންދޫ ފުޓްޞަލް ދަނޑު ތަރައްޤީކުރުމުގެ މަސައްކަތްކުރުމަށް ހަވާލުކޮށްފައި ވަނީ ނެގާއި އިންވެސްޓްމަންޓާއެވެ. މިމަސައްކަތް އެކުންފުންޏާ ހަވާލުކޮށްފައިވަނީ 50 ދުވަހުގެ ތެރޭގައި ނިންމާގޮތަށެވެ. މިމަސައްކަތަށް 1،468،887.59 ( އެއް މިލިޔަން ހަތަރުސަތޭކަ ފަސްދޮޅަސް އަށްހާސް އަށްސަތޭކަ އަށްޑިހަ ހަތް ރުފިޔާ ނުވަދިހަ ލާރި) ޚަރަދުވެއެވެ.
މި އެއްބަސްވުމުގައި ޔޫތު މިނިސްޓްރީން ސޮއިކުރެއްވީ އެގްޒެކްޓިވް ޑިރެކްޓަރ ހައްވާ ނިހުލާއެވެ. ނެގާއި އިންވެސްޓްމަންޓުން ސޮއިކުރެއްވީ ކުންފުނީގެ މެނޭޖިން ޑިރެކްޓަރ އިސްމާއިލް ލަޠީފްއެވެ.
ގެމަނަފުށީގައި ޔޫތު އެންޑް ކޮމިއުނިޓީ ސެންޓަރު ތަރައްޤީކުރުމަށް ލައިކަންސް އިންވެސްޓްމަންޓް އާ ހަވާލުކޮށްފައިވަނީ 120 ދުވަހުގެ ތެރޭގައި މަސައްކަތް ނިންމުމަށެވެ. މި މަސައްކަތަށް 4،461،159.84 (ހަތަރު މިލިޔަން ހަތަރުސަތޭކަ ފަސްދޮޅަށް އެއް ހާސް ސަތޭކަ ފަންސާސް ނުވަ ރުފިޔާ އަށްޑިހަ ހަތަރު ލާރި) ޚަރަދުވެއެވެ.
މިއެއްބަސްވުމުގައި ޔޫތު މިނިސްޓްރީން ސޮއިކުރެއްވީ ސީނިއަރ އެގްޒެކެޓިވް ޑިރެކްޓަރ އިސްމާއިލް ރަޢޫފްއެވެ. ލައިކަންސް އިންވެސްޓްމަންޓުން ސޮއިކުރެއްވީ އެ ކުންފުނީގެ ވެރި ފަރާތް ޢަބްދުﷲ ކަލީމްއެވެ.
ހުޅުމާލެ 4 ނަންބަރު ފުޓްސަލް ދަނޑުގެ ޓާފް ބަދަލުކުރުމަށްވެސް ހަވާލުކޮށްފައިވަނީ ނެގާއި އިންވެސްޓްމަންޓާއެވެ.
މިއެއްބަސްވުމުގައި ޔޫތު މިނިސްޓްރީން ސޮއިކުރެއްވީ ސީނިއަރ އެގްޒެކްޓިވް ޑިރެކްޓަރ އަޙްމަދު ޝަޒީންއެވެ. މިއެއްބަސްވުމުގައި ނެގާއި އިންވެސްޓްމަންޓުން ސޮއިކުރެއްވީ މެނޭޖިން ޑިރެކްޓަރ އިސްމާއިލް ލަޠީފްއެވެ.
އެކުންފުންޏާ މިމަސައްކަތް ހަވާލުކުރީ 1،143،019.20 (އެއްމިލިޔަން ސަތޭކަ ސާޅީސް ތިން ހާސް ނަވާރަ ރުފިޔާ ވިހި) ލާރިއަށެވެ. މި މަސައްކަތް ހަވާލުކޮށްފައިވަނީ 14 ދުވަހުގެ ތެރޭގައި ނިންމާގޮތަށެވެ.