އުތުރު ކޮރެޔާއިން ދާދިފަހުން ދެކުނު ކޮރެޔާގެ ސަރަޙައްދަށް ޑްރޯންތަކެއް ފޮނުވި ހާދިސާއާ ގުޅިގެން ދެކުނުން ދިފާޢީ ފިޔަވަޅުތައް ވަރުގަދަ ކުރަން ނިންމައިފިއެވެ. މި ކަން އިޢުލާނު ކުރައްވަމުން ދެކުނު ކޮރެޔާގެ ރައީސް ޔޫން ސުކް-ޔޯލް ވިދާޅުވީ، އުތުރު ކޮރެޔާގެ އެ ފަދަ އަމަލުތައް ހުއްޓުވަން ދެކުނުގެ އަސްކަރިއްޔާއިން އަބަދުވެސް ތައްޔާރީ ހާލަތެއްގައި އޮންނަން ޖެހޭ ކަމުގައެވެ.
އުތުރު ކޮރެޔާއިން ފޮނުވި ފަސް ޑްރޯން ހުއްޓުވަން ދެކުނު ކޮރެޔާއިން ކުރި މަސައްކަތްތައް ނާކާމިޔާބުވެފައިވާ ކަން ފާހަގަކޮށްލަން ޖެހެއެވެ. އަދި، އެ ޑްރޯންތައް ވަނީ ސަރަޙައްދީ ރޮނގު ހުރަސްކޮށް، ދެކުނު ކޮރެޔާގެ ސަރަޙައްދަށް ވަދެފައެވެ. ދެކުނު ކޮރެޔާއިން ދިފާޢީ ފިޔަވަޅުތައް ވަރުގަދަ ކުރަން ނިންމާފައި މި ވަނީ، މި ސަބަބާ ގުޅިގެންނެވެ.
އުތުރު ކޮރެޔާއިން ފޮނުވި ޑްރޯންތަކުގެ ތެރެއިން އެއް ޑްރޯން ދެކުނު ކޮރެޔާގެ ވެރިރަށާ ހަމައަށް ދަތުރު ކުރިއެވެ. އަދި، ޑްރޯންތައް ހުއްޓުވަން ދެކުނު ކޮރެޔާގެ އަސްކަރީ މަތިންދާބޯޓުތަކާއި ހެލިކޮޕްޓަރުތައް ރުކުރުވައިލިއެވެ. ނަމަވެސް، އެ ވަރުން ވެސް ޑްރޯންތައް ހުއްޓުވޭ ގޮތެއް ނުވިއެވެ. އަދި، މި ކަމާ ގުޅިގެން ދެކުނު ކޮރެޔާގެ ދިފާޢީ ވުޒާރާއަށް ބޮޑެތި ފާޑުކިޔުންތަކެއް އަމާޒުވިއެވެ.
އުތުރު ކޮރެޔާއިން ފޮނުވި ޑްރޯންތައް ހުއްޓުވަން ކުރި މަސައްކަތްތައް ފޭލުވުމުން ދެކުނު ކޮރެޔާގެ ދިފާޢީ ވުޒާރާއިން ވަނީ މަޢާފަށް ވެސް އެދިފައެވެ. މިއީ، ބަލައިގަނެވޭނެ ފަދަ ހާދިސާއެއް ނޫން ކަމުގައި ރައީސް ޔޫން ވަނީ ވިދާޅުވެފައެވެ. އަދި، މި ކަމުގެ ރައްދުގައި ހަރުކަށި ފިޔަވަޅުތަކެއް އަޅާނެ ކަމުގެ އިންޒާރު ވެސް އޭނާ ދެއްވިއެވެ.
އެ ޤައުމުގެ ވައިގެ ސަރަޙައްދުގެ ދިފާޢީ ކަންކަން ރޭވިފައިވާ ގޮތް މުރާޖަޢާ ކުރުމަށް ވެސް ޔޫން ވަނީ އަންގަވާފައެވެ. އަދި، އުތުރު ކޮރެޔާގެ އަސްކަރީ މަރުކަޒުތަކުން އުދުއްސައިލާ ޑްރޯން ފަދަ އުޅަނދުތަކުގެ ކަންކަން ގާތުން ބެލުމަށް، ދެކުނު ކޮރެޔާއިން ވެސް ޑްރޯން ޔުނިޓެއް ސަރަޙައްދީ ރޮނގުގެ ސަރަޙައްދުގައި ޤާއިމު ކުރުމަށް އޭނާ ގޮވައިލެއްވިއެވެ.
އުތުރު ކޮރެޔާއިން ފޮނުވައިލި ޑްރޯންތައް ނައްތައިލަން ކުރި މަސައްކަތްތައް ފޭލުވީ، ޑްރޯންތަކުގެ ސައިޒު ކުޑަވުމުން ކަމުގައި ދެކުނު ކޮރެޔާގެ އަސްކަރިއްޔާއިން ބުނެއެވެ. އަދި، އުތުރު ކޮރެޔާގެ މި ފަދަ ހަމަލާތަކުން ދިފާޢުވުމަށް އިތުރު ފިޔަވަޅުތައް އަޅާނެ ކަމުގައި ދެކުނުގެ ޖޮއިންޓް ޗީފްސް އޮފް ސްޓާފްއިން ވަނީ ބުނެފައެވެ. ދެކުނު ކޮރެޔާގައި އެމެރިކާގެ އަސްކަރިއްޔާގެ ބޮޑު ފައުޖެއް ވެސް ޤާއިމުކޮށްފައި ތިބެއެވެ. ނަމަވެސް، އުތުރު ކޮރެޔާގެ ޑްރޯންތައް ވައްޓައިލަން އެމެރިކާގެ ސިފައިން ހަރަކާތްތެރިވެފައިވާ ކަން ސާފެއް ނޫނެވެ.
މިއީ، ފާއިތުވި ފަސް އަހަރުގެ ތެރޭގައި އުތުރު ކޮރެޔާއިން ދެކުނަށް މިފަދަ ޑްރޯންތަކެއް ފޮނުވާފައިވާ ފުރަތަމަ ފަހަރެވެ. އުތުރު ކޮރެޔާއިން މި އަހަރުގެ ތެރޭގައި އެ ޤައުމުގެ އަސްކަރީ ހަރަކާތްތައް ވަނީ އިތުރު ކޮށްފައެވެ. މީގެ ތެރޭގައި ގިނަ އަދަދެއްގެ މިސައިލް ޓެސްޓުތަކެއް ހެދުން ހިމެނެއެވެ. އަދި، އުތުރު ކޮރެޔާއަކީ ދުނިޔޭގައި އޮތް އެންމެ ބޮޑު ނިއުކްލިޔަރ ބާރަށް ހެދުމަށް އަޒުމު ކަނޑައަޅާފައިވާ ކަމުގައި އެ ޤައުމުގެ ލީޑަރު ކިމް ޖޮންގް އުން ވަނީ ވިދާޅުވެފައެވެ.