އިންސާނީ ވަގުފާރިއާއި ރޭޕްގެ އިތުރުން ކުށްކުރާ ގުރޫޕެއް ހިންގުމުގެ ކުށުގެ ތުހުމަތުގައި މަޝްހޫރު ކިކްބޮކްސިން ތަރި އެންޑްރޫ ޓޭޓް ހައްޔަރުކޮށްފިއެވެ. އޭނާ ހައްޔަރުކޮށްފައި ވަނީ ރޮމޭނިޔާގެ ވެރިރަށް ބުކަރެސްޓުގައެވެ. އޭނާއާއެކު އޭނާގެ ކޮއްކޮ ޓްރިސްޓަން ޓޭޓްއާއި އިތުރު ދެ މީހަކު ވަނީ ހައްޔަރުކޮށްފައެވެ.
އިނގިރޭސި ވިލާތުގެ ރައްޔިތުން ކަމުގައިވާ ޓޭޓްއާއި އޭނާގެ ކޮއްކޮ ޓްރިސްޓަންއަށް މުއްދަތު ޖެހުމަށް ބުކަރެސްޓުގެ ކޯޓަކަށް ހާޒިރު ކުރުމުން، އެ ދެ މީހުންނަށް 30 ދުވަހުގެ މުއްދަތެއް ކޯޓުން ވަނީ ޖަހައިދީފައެވެ. ރޮމޭނިޔާގެ ޕްރޮސިކިޔުޓަރގެ އޮފީހުން ބުނީ، 2021 ވަނަ އަހަރު ހަދާފައިވާ ކުށްކުރާ ގުރޫޕެއްގެ ފަހަތުގައި ވަނީ މި ހަތަރު މީހުން ކަމުގައެވެ. އަދި، މި ގުރޫޕުގެ އެންމެ އިސް ދެ މެންބަރުންނަކީ ޓޭޓްއާއި އޭނާގެ ކޮއްކޮ ކަމުގައެވެ.
ޓޭޓްއާއި އޭނާގެ ކޮއްކޮގެ އިތުރުން ހައްޔަރު ކޮށްފައިވާ ދެ މީހުންގެ ވަނަވަރު އަދި ހާމަކޮށްފައެއް ނުވެއެވެ. އެ މީހުން ރާވައިގެން ހިންގާފައިވާ ކުށުގެ އަމަލުތަކުގެ ތެރޭގައި ރޮމޭނިޔާއާއި އެ ސަރަޙައްދުގެ އެހެން ޤައުމުތަކުގައި އިންސާނީ ވަގުފާރި ހިންގުން ހިމެނޭ ކަމުގައި އެ އިދާރާއިން ބުނެއެވެ. އަދި، އެ މީހުންގެ ޝިކާރައަކަށްވާ އަންހެނުންނަށް، ޖިންސީ އަނިޔާ ދީފައިވާ ކަމަށް ވެސް އެ އިދާރާއިން ތުހުމަތު ކުރެއެވެ.
ޓޭޓްއާއި އޭނާގެ ކޮއްކޮ ހިންގާ ގުރޫޕުގެ ޝިކާރައަކަށް ވެފައިވާ ހަ އަންހެނެއްގެ ހެކިބަސް ލިބިފައިވާ ކަމުގައި ވެސް އެ އިދާރާއިން ބުނެއެވެ. ޓޭޓް ހިންގާ ކުށްކުރާ ގުރޫޕުގެ އަމަލުތައް ތަހުޤީޤު ކުރަން ފަށާފައި ވަނީ އޭޕްރިލް މަހުގެ ތެރޭގައި ކަމަށާއި، މި ތަހުޤީޤުގެ ދަށުން އެ މީހުންނަށް ނިސްބަތްވާ ގިނަ ޢިމާރާތްތަކެއް ބަލައިފާސްކޮށްފައިވާ ކަމުގައި ރޮމޭނިޔާގެ ޕްރޮސިކިޔުޓަރގެ އޮފީހުން ބުނެއެވެ.
އެންޑްރޫ ޓޭޓް އެންމެ ފުރަތަމަ ފެނިގެން ގޮސްފައި ވަނީ 2016 ވަނަ އަހަރު ބިގް ބްރަދަރ ޝޯއިންނެވެ. އަދި، އޭނާއަކީ މިހާރު ސޯޝަލް މީޑިޔާގައި މަޝްހޫރުކަން ހޯދާފައިވާ މީހެކެވެ. ނަމަވެސް، އަންހެނުންނާ މެދު ބޭއަދަބީކޮށް މުޢާމަލާތް ކުރުމާ ގުޅިގެން ޓޭޓްއާއި އޭނާގެ ކޮއްކޮގެ ޓުވިޓަރ އެކައުންޓުތައް ދާދިފަހުން ސަސްޕެންޑު ކޮށްފައިވާ ކަން ފާހަގަކުރެއެވެ.