ކޮވިޑް-19 ފެތުރުން ކޮންޓްރޯލް ކުރުމަށް އިންޑޮނީޝިޔާގައި އަޅާފައިވާ ގިނަ ފިޔަވަޅުތައް އުވައިލާފައިވާ ކަން އިޢުލާނުކޮށްފިއެވެ. މި ކަން އިޢުލާނު ކުރައްވާފައި ވަނީ ރައީސް ޖޯކޯ ވިދޯދޯއެވެ. 2021 ވަނަ އަހަރުގެ ޖުލައި މަހުގެ ތެރޭގައި އެ ޤައުމުގައި ހަލުވިކަމާ އެކު ބަލި ފެތުރެމުންދިޔަ ނަމަވެސް، މިހާރު ވަނީ ބަލި ފެތުރުން ކޮންޓްރޯލް ކުރެވިފައެވެ.
މިދިޔަ އަހަރުގެ ޖުލައި މަހުގެ ތެރޭގައި އިންޑޮނީޝިޔާގައި ކޮވިޑްގެ ޑެލްޓާ ވޭރިއެންޓް ހަލުވިކަމާ އެކު ފެތުރެން ފެށިއެވެ. އަދި، ގިނަ އަދަދެއްގެ ބަޔަކު މި ބަލީގައި މަރުވިއެވެ. އަދި، އެ ދުވަސްވަރު އެންމެ ގިނަ އަދަދަކަށް މީހުން މަރުވަމުންދިޔަ ޤައުމުތަކުގެ ލިސްޓުގެ އެންމެ ކުރިއަށް އިންޑޮނީޝިޔާ އެރިއެވެ.
"މީހުން އެއްވެ އުޅުމަށް މިހާރު ހުރަހެއް ނެތް. އެއްތަނުން އަނެއް ތަނަށް ދަތުރު ކުރުމަށް އޮތް ހުރަސްތައް ވެސް މިހާރު ވަނީ ނައްތައިލާފައި،" ބަލި ފެތުރުން ކޮންޓްރޯލް ކުރުމަށް އަޅާފައިވާ ފިޔަވަޅުތައް އުވައިލާފައިވާ ކަން އިޢުލާނު ކުރައްވަމުން ޖޯކޯ ވިދޯދޯ ވިދާޅުވިއެވެ. ނަމަވެސް، ބައްޔާ މެދު ފަރުވާކުޑަ ކުރެވެން ނެތް ކަމުގައި ވިދާޅުވެ، އޭނާ ވަނީ ބަލިން ރައްކާތެރިވުމަށް އެޅެން ހުރި ފިޔަވަޅުތައް ދޫކޮށް ނުލުމަށް އެ ޤައުމުގެ ރައްޔިތުންގެ ކިބައިން އިލްތިމާސް ކުރައްވާފައެވެ.
މާސްކު އެޅުމަށް މަޖުބޫރުކަމެއް ނެތް ނަމަވެސް، ރައްކާތެރިވުމުގެ ގޮތުން މާސްކު އެޅުން އާދަކުރުމަށް އޭނާ އެދިވަޑައިގެންނެވިއެވެ. އަދި، ގިނަ މީހުން އެއްތަންވާ ތަންތަނަށް ދިޔުމަކީ އަދިވެސް އެންމެ ރައްކާތެރި ކަމެއް ނޫން ކަމުގައި އޭނާ ވިދާޅުވިއެވެ. މި އަހަރުގެ ތެރޭގައި ވެސް ކޮވިޑްގެ އޮމިކްރޯން ވޭރިއެންޓް ހަލުވިކަމާ އެކު އެ ޤައުމުގައި ވަނީ ފެތުރިފައެވެ.
އިންޑޮނީޝިޔާއިން މި ބަލި ފެތުރުން ކޮންޓްރޯލް ކުރުމަށް އަޅާފައިވާ ގިނަ ފިޔަވަޅުތަކަށް ލުއިދީފައިވީ ނަމަވެސް، އެ ޤައުމުގައި ދުވާލެއްގެ މައްޗަށް 1,000 މީހުންނަށް ދަނީ ބަލި ޖެހެމުންނެވެ. ނަމަވެސް، އެ ޤައުމުގެ އާބާދީގެ 98 އިންސައްތަ މީހުންނަށް އިމިޔުނިޓީ ލިބިފައިވާ ކަމަށް، ޞިއްޙީ މާހިރުންނާ ހަވާލާދީ، ވިދޯދޯ ވިދާޅުވިއެވެ. ފިޔަވަޅުތަކަށް ލުއިދިނުމުގެ ގޮތުން، ބައިގެ ބަނދަރުތަކުގައި ޕީ.ސީ.އާރް. ޓެސްޓު ހަދައިދިނުން ވެސް އެ ޤައުމުން ވަނީ ހުއްޓައިލާފައެވެ.
ނަމަވެސް، ކޮވިޑާ ގުޅިގެން ފުރަބަންދު ކުރުމުގެ ސަބަބުން މާލީ ގޮތުން ދަތިތަކާ ކުރިމަތިވި ޢާންމުންނާއި ވިޔަފާރިތަކަށް އެހީތެރިކަން ފޯރުކޮށްދިނުމަށާއި، އިޖުތިމާޢީ ގޮތުން އެހީތެރިކަން ފޯރުކޮށްދިނުމަށް ފަށާފައިވާ ޕުރޮގުރާމުތައް އަދިވެސް ކުރިއަށް ގެންދާނެ ކަމުގައި ވިދޯދޯ ވިދާޅުވިއެވެ. އަދި، ބޭރު ޤައުމުތަކުން އެ ޤައުމަށް ދަތުރުކުރާ ފަތުރުވެރިން އަމަލުކުރަން ޖެހޭ ފިޔަވަޅުތަކަށް ލުއިދީފައި ނުވާނެ ކަމުގައި ވެސް އޭނާ ވިދާޅުވިއެވެ.
ކޮވިޑްގެ ބަލިމަޑުކަން ފެށުނު ފަހުން އެ ޤައުމުގައި މި ބަލީގައި މަރުވެފައިވާ މީހުންގެ އަދަދު މިހާރު ވަނީ 160,000 އަށްވުރެ މައްޗަށް އަރާފައެވެ. ބަލި ފެތުރުން ކޮންޓްރޯލް ކުރުމުގެ ގޮތުން އެ ޤައުމުގެ އާބާދީގައި ހިމެނޭ 174 މިލިޔަން މީހުން ވަނީ ވެކްސިންގެ ޑޯޒްތައް ފުރިހަމަ ކޮށްފައެވެ. އަދި، ތިންވަނަ ބޫސްޓަރ ޑޯޒް ޖަހާފައިވާ މީހުންގެ އަދަދު ވެސް 68 މިލިޔަނަށް ވުރެ މައްޗަށް އަރައެވެ.