ލުއީޒް އިނާސިއޮ ލޫލާ ޑެ ސިލްވާ ތިންވަނަ ދައުރަކަށް ބްރެޒިލްގެ ރައީސް ކަމުގެ މަޤާމާ ހަވާލުވެ ވަޑައިގަންނަވައިފިއެވެ. 77 އަހަރުގެ ލޫލާ މީގެ ކުރިން ވަނީ 2003 އިން 2010 އާ ހަމައަށް އެ މަޤާމު ފުރުއްވާފައެވެ. 2021 އޮކްޓޫބަރުގައި ބޭއްވި ރިޔާސީ އިންތިޚާބުގައި އޭނާ ވާދަކުރައްވާފައި ވަނީ ދެވަނަ ދައުރަކަށް އިންތިޚާބުވުމަށް މަސައްކަތް ކުރެއްވި ކުރީގެ ރައީސް ޖައިރް ބޮލްސޮނާރޯއާއެވެ.
އިންތިޚާބުގައި ލޫލާއަށް ކާމިޔާބީ ލިބިވަޑައިގަތީ ވަރަށް ހަނި ފުރުޞަތަކުންނެވެ. އޭނާއަށް ލިބިވަޑައިގަތީ 50.9 އިންސައްތަ ވޯޓެވެ. ބޮލްސޮނާރޯ ވަނީ ވޯޓުގެ 49.1 އިންސައްތަ ކާމިޔާބު ކުރައްވާފައެވެ. މިއީ ބްރެޒިލްގެ ތާރީޚުގައި ވެސް ވެރިކަމުގައި ހުންނެވި ރައީސަކު ދެވަނަ ދައުރަކަށް ކުރިމަތިލައްވައި ނާކާމިޔާބީއާ ކުރިމަތިލައްވަން ޖެހިވަޑައިގެންނެވި ފުރަތަމަ ފަހަރެވެ.
ވެރިކަމުގެ ތިންވަނަ ދައުރަކާ ހަވާލުވެ ވަޑައިގެންނެވުމަށް ފަހު ލޫލާ ވަނީ ފަގީރުންގެ ހައްގުތައް ރައްކާތެރިކޮށް، ތިމާވެށި ހިމާޔަތް ކުރަން ގިނަގުނަ މަސައްކަތްތަކެއް ކުރައްވާނެ ކަމަށް ވިދާޅުވެ ވަޢުދުވެ ވަޑައިގަންނަވާފައެވެ. ލޫލާއަށް އިންތިޚާބުގައި ވާދަ ކުރުމުގެ ފުރުޞަތު ލިބިވަޑައިގެންނެވީ، ކޮރަޕްޝަންގެ ކުށް ސާބިތުވެ އޭނާގެ މައްޗަށް އިއްވާފައިވާ ޖަލު ހުކުމް، އެ ޤައުމުގެ ސުޕްރީމް ކޯޓުން ބާޠިލު ކުރުމާ ގުޅިގެންނެވެ.
ބޮލްސޮނާރޯގެ ސަރުކާރު ސިފަކުރައްވަމުން ލޫލާ ވިދާޅުވީ، ބޮލްސޮނާރޯގެ ވެރިކަމަކީ އިޤުތިޞާދީ އަނދަވަޅަކަށް ޤައުމު ވައްޓައިލި ހަތަރު އަހަރު ކަމުގައެވެ. އަދި، ޞިއްޙަތާއި ތަޢުލީމާއި ސައިންސްގެ ދާއިރާއިން ބަޖެޓު އުނިކޮށް، ޤައުމުގެ ވަސީލަތްތަކާއި މުއްސަނދިކަން އަމިއްލަ ފައިދާއަށް ބޭނުން ކުރައްވާފައިވާ ހަތަރު އަހަރު ކަމުގައެވެ.
މި ކަންކަން އިސްލާހުކޮށް، ނަސްލީ ތަފާތުކުރުންތައް ނައްތައިލާ، މިންތީގެ ހަމަހަމަކަން ގާއިމުކޮށް، އެމެޒަން ޖަންގަލިން ގަސް ކެނޑުން ހުއްޓުވަން މަސައްކަތް ކުރެއްވުމަށް ވެސް ލޫލާ ވަޢުދުވެ ވަޑައިގެންނެވިއެވެ. އަދި ޑިމޮކުރަސީ ނަގަހައްޓައި، ޓެރެރިޒަމާ ދެކޮޅަށް ހަނގުރާމަކޮށް، ޤާނޫނީ ވެރިކަން ދަމަހައްޓާނެ ކަމުގެ ޔަގީންކަން ވެސް އޭނާ ދެއްވިއެވެ.
ރައީސް ކަމުގެ ހުވާ ކުރުމަށް ބޭއްވި ރަސްމިއްޔާތުގައި، ދާދިފަހުން މަރުވި ބްރެޒިލްގެ މަޝްހޫރު ފުޅުބޯޓަ ކުޅުންތެރިޔާ ޕެލޭގެ ހަނދާނުގައި ސުކޫތެއް ގެނެސްފައިވެއެވެ. ޕެލޭ މަރުވެފައި ވަނީ ސައު ޕައުލޯ ހޮސްޕިޓަލުގައި ކެންސަރު ބައްޔަށް ފަރުވާ ހޯދަމުން ދަނިކޮށެވެ. ހުވާ ކުރުމަށް ބޭއްވި ރަސްމިއްޔާތުގައި ބޮލްސޮނާރޯ ބައިވެރިވެ ވަޑައިގަންނަވާފައެއް ނުވެއެވެ.