ސެނެގޯލްގެ މެދުގައިވާ ކެފްރީން ސަރަޙައްދުގައި ހިނގި ނުރައްކާތެރި ބަސް އެކްސިޑެންޓެއްގައި 39 މީހުން މަރުވެއްޖެއެވެ. ސިކިލޯ ކިޔާ އަވަށެއްގެ ރަށްބޭރުގައި އޮންނަ ހައިވޭއެއްގައި ދެ ބަސް ޖެހިގެން ހިނގި މި ހާދިސާގައި އިތުރު 100 މީހަކު ޒަޚަމުވިއެވެ. މި ހާދިސާ ހިނގާފައި ވަނީ އެއް ނަންބަރު ހައިވޭގައެވެ.
މި ހާދިސާ ހިނގާފައި ވަނީ ރޭގަނޑުގެ ވަގުތުގައެވެ. ބަސް އެކްސިޑެންޓު ހިނގި ސަރަޙައްދަށް އެ ޤައުމުގެ ރައީސް މެކީ ސޯލް ވަނީ ޒިޔާރަތް ކުރައްވާފައެވެ. ކެފްރީންގެ އޮފިޝަލުން ކުރިން ބުނެފައި ވަނީ މި ހާދިސާގައި 40 އަށްވުރެ ގިނަ މީހުން މަރުވި ކަމުގައެވެ. ނަމަވެސް، ސޯލް ވަނީ މި ހާދިސާގައި 39 މީހުން މަރުވި ކަން ކަށަވަރުވެފައިވާ ކަމަށް ވިދާޅުވެފައެވެ.
އޭނާ ވަނީ މި ހާދިސާގައި ޒަޚަމުވި މީހުންނާއި، މަރުވި މީހުންގެ ޢާއިލާތަކާ ބައްދަލުކުރައްވާ ތަޢުޒިޔާ ވިދާޅުވެފައެވެ. އަދި، މި ފަދަ ހާދިސާތައް ތަކުރާރުވިޔަ ނުދިނުމަށް ފިޔަވަޅުތަކެއް އެޅުމަށް މަޝްވަރާ ކުރުމަށް ކެބިނެޓުގެ މިނިސްޓަރުންނަށް އަންގަވާފައި ވާނެ ކަމުގައި އޭނާ ވިދާޅުވިއެވެ. މިއީ، ފަހުގެ ތާރީޚެއްގައި ހިނގި މަގުމަތީގެ އެކްސިޑެންޓެއްގައި މިހާ ގިނަ އަދަދެއްގެ މީހުންގެ ފުރާނަ ގެއްލުނު ފުރަތަމަ ފަހަރެވެ.
ސެނެގޯލްއަކީ މަގުމަތީގެ ނުރައްކާތެރި އެކްސިޑެންޓުތައް ގިނަ ޤައުމެއް ކަން ފާހަގަކުރެވެއެވެ. ސަބަބަކީ، އެ ޤައުމުގެ ގިނަ މަގުތަކަކީ ރަނގަޅު ފެންވަރަކަށް ހަދާފައިވާ މަގުތަކެއް ނޫނެވެ. އަދި، އުޅަނދުފަހަރު ދުއްވާ މީހުންނަކީ، އެ ކަމުގެ ފުރިހަމަ ތަމްރީނާއި ތަޖުރިބާ ލިބިފައިވާ މީހުންނެއް ނޫނެވެ. މީގެ އިތުރުން، އުޅަނދުފަހަރުގެ ހާލަތު ބެލުމަށް ހަދާފައިވާ ޤަވާޢިދުތައް ތަންފީޒު ނުކުރެވުމަކީ ވެސް، މި ފަދަ ހާދިސާތައް އިތުރުވާ އެއް ސަބަބެވެ.
މި ހާދިސާއާ ގުޅިގެން ސެނެގޯލްގައި ހިތާމައިގެ ތިން ދުވަސް އިޢުލާނުކޮށްފައިވާއިރު، މި ހާދިސާ ހިނގަން މެދުވެރިވި ސަބަބު ދެނެގަތުމުގެ މަސައްކަތް ވަނީ ފަށާފައެވެ. މި އެކްސިޑެންޓް ހިނގަން މެދުވެރިވީ، އެއް ބަހުގެ ފުރޮޅެއް ފަޅައިގެން ގޮސް، ކޮންޓްރޯލް ގެއްލި، މަގުގެ އަނެއްފަޅިން ދުއްވަމުން ދިޔަ ބަހެއްގައި ޖެހިގެން ކަމަށް ބެލެވެއެވެ.
ބޭރު ބައެއް ޤައުމުތަކުގެ އިސްވެރިން ވެސް ވަނީ، ސެނެގޯލްގައި ހިނގި ހިތާމަވެރި ހާދިސާގައި މަރުވި މީހުންގެ ޢާއިލާތަކަށް ތަޢުޒިޔާ ފޮނުވާފައެވެ. މީގެ ތެރޭގައި ފަރަންސޭސި ވިލާތުގެ ޚާރިޖީ ވަޒީރު ހިމެނިވަޑައިގަންނަވައެވެ. 2020 އޮކްޓޫބަރުގައި ވެސް ސެނެގޯލްގައި މި ފަދަ ނުރައްކާތެރި ހާދިސާއެއް ހިނގިއެވެ. އެ ހާދިސާގައި 16 މީހުން މަރުވެ، އިތުރު 15 މީހުން ޒަޚަމުވިއެވެ.