ޕެރޫގެ ރައީސް ދީނާ ބޮލުއަރްތޭގެ ސަރުކާރާ ދެކޮޅަށް މުޒާހަރާ ކުރަމުންދާ މީހުންނާއި ފުލުހުންނާ ދެމެދު ހިނގި ނުރައްކާތެރި ކުރިމަތިލުންތަކެއްގައި ޢާންމުންގެ 12 މީހުން މަރުވެއްޖެއެވެ. ބޮލުއަރްތޭގެ ސަރުކާރާ ދެކޮޅަށް މުޒާހަރާ ކުރަމުން ދަނީ ކުރީގެ ރައީސް ޕެދްރޯ ކެސްޓިއްޔޯއަށް ތާޢީދުކުރާ މީހުންނެވެ. ކެސްޓިއްޔޯގެ މައްޗަށް އިތުބާރު ނެތްކަމަށް ފާސްކޮށް، ވެރިކަމުން ދުރުކޮށްފައި ވަނީ 2022 ޑިސެންބަރު މަހުގެ 7 ވަނަ ދުވަހުއެވެ.
ކެސްޓިއްޔޯއަށް ތާޢީދުކުރާ މީހުންނާއި ފުލުހުންނާ ދެމެދު ކުރިމަތިލުންތަކެއް ހިނގާފައި ވަނީ އިރުދެކުނުގައިވާ ޕޫނޯ ސަރަޙައްދުގެ ހޫލިއާކާގައެވެ. ކުރިމަތިލުންތައް ފެށުނީ މުޒާހަރާގެ ބައިވެރިން ހޫލިއާކާގެ ވައިގެ ބަނދަރަކަށް ވަދެ، އެ ތަން ހިސާރުކުރަން މަސައްކަތް ކުރަމުންނެވެ. އެ މީހުން ދަނީ ބޮލުއަރްތޭގެ އިސްތިއުފާއަށް ގޮވަމުންނެވެ.
ސަރުކާރާ ދެކޮޅަށް މުޒާހަރާ ކުރަމުންދާ މީހުންނާ ދެކޮޅަށް ފުލުހުން ބާރުގެ ބޭނުން ކުރަމުންދާ ކަމުގައި އިދިކޮޅު ފަރާތްތަކުން ތުހުމަތު ކުރެއެވެ. އަދި، 12 މީހުން މަރުވެފައި ވަނީ ފުލުހުން ބަޑިޖެހުމުގެ ސަބަބުން ކަމަށް ވެސް އެ ފަރާތްތަކުން ބުނެއެވެ. މިއާއެކު، މުޒާހަރާތަކުގައި މިހާތަނަށް މަރުވެފައިވާ މީހުންގެ އަދަދު މި ވަނީ 34 އަށް އަރާފައެވެ.
ކެސްޓިއްޔޯގެ މައްޗަށް އިތުބާރު ނެތް ކަމަށް ފާސްކޮށްފައި ވަނީ ޕެރޫގެ ޤާނޫނު ހަދާ މަޖިލީސް އުވައިލަން މަސައްކަތް ކުރެއްވުމާ ގުޅިގެންނެވެ. ރައީސް ކަމުގެ މަޤާމުން ދުރުކޮށް، އޭނާ ވަނީ ހައްޔަރުކޮށްފައެވެ. ކެސްޓިއްޔޯގެ ބަދަލުގައި ރައީސް ކަމުގެ މަޤާމާ ހަވާލުވެ ވަޑައިގެންނެވި 60 އަހަރުގެ ބޮލުއަރްތޭއަކީ އެ މަޤާމާ ހަވާލުވެ ވަޑައިގެންނެވި ފުރަތަމަ އަންހެން ބޭފުޅާއެވެ.
ކެސްޓިއްޔޯ ޕެރޫގެ ޤާނޫނު ހަދާ މަޖިލީސް ކަމުގައިވާ ކޮންގްރެސް އުވައިލަން މަސައްކަތް ކުރައްވާފައި ވަނީ، އޭނާއާ ދެކޮޅަށް އިތުބާރު ނެތް ކަމުގެ ވޯޓެއް ނެގުމަށް މަސައްކަތް ކުރުމުންނެވެ. އެއީ، އޭނާއަށް އިތުބާރު ނެތް ކަމަށް ކަނޑައަޅައި، މަޤާމުން ވަކި ކުރުމަށް ކޮންގްރެސްއިން މަސައްކަތް ކުރި ތިންވަނަ ފަހަރެވެ.
މި މައްސަލައިގައި ކޮންގްރެސްއިން ވޯޓަށް އަހަން ތައްޔާރުވުމުން 53 އަހަރުގެ ކެސްޓިއްޔޯ ވަނީ ކޮންގްރެސް އުވައިލައްވާފައިވާ ކަން ޓީވީ މެދުވެރިކޮށް ޤައުމާ މުޚާތަބު ކުރައްވަމުން އިޢުލާނު ކުރައްވާފައެވެ. އަދި، ޕެރޫގައި ކުއްލި ހާލަތެއް އިޢުލާނު ކުރައްވައި، ކަރފިޔުއެއް އިޢުލާނު ކުރެއްވިއެވެ. އަދި، އޭނާ ވެރިކަން ކުރައްވާނީ ރިޔާސީ ޤަރާރަކުން ލިބިދޭ ބާރުގެ ދަށުން ކަމުގައި އިޢުލާނު ކުރެއްވިއެވެ.
ނަމަވެސް، ކޮންގްރެސްއިން ޤަބޫލުކޮށްފައި ވަނީ އެއީ ބަޣާވާތެއްގެ ސިފައިގައެވެ. ކެސްޓިއްޔޯ ޓީވީ މެދުވެރިކޮށް ދެއްވި ތަޤުރީރުގެ ކުޑަ ވަގުތުކޮޅެއް ފަހުން ކޮންގްރެސްގެ މެންބަރުން ވަނީ މަޖިލީހުގެ އިދާރާއަށް ހާޒިރުވެ، ކުއްލި ބައްދަލުވުމެއް ފަށާފައެވެ. އަދި، ކެސްޓިއްޔޯއާ ދެކޮޅަށް ހުށަހަޅާފައިވާ އިތުބާރު ނެތް ކަމުގެ މައްސަލައަށް ވޯޓަށް އަހައި، ފާސް ކުރިއެވެ.
މިއީ، 2018ވަނަ އަހަރަށް ފަހު ޕެރޫގެ ރައީސެއްގެ މައްޗަށް އިތުބާރު ނެތް ކަމަށް ފާސްކޮށް މަޤާމުން ވަކި ކުރި ތިންވަނަ ފަހަރެވެ. އޭނާގެ ބަދަލުގައި ވެރިކަމާ ހަވާލުވެ ވަޑައިގެންނެވި ބޮލުއަރްތޭ ވެރިކަން ކުރައްވާނީ ކެސްޓިއްޔޯގެ ރިޔާސީ ދައުރު ނިމެންދެން، 2026 އަހަރުގެ ޖުލައި މަހާ ހަމައަށެވެ.
ޕެރޫއަކީ ސިޔާސީ ގޮތުން ވަރަށް ހަލަބޮލި، ހަމަނުޖެހުން ބޮޑު ޤައުމެކެވެ. 2020ވަނަ އަހަރުގެ އެންމެ ފަސް ދުވަހުގެ ތެރޭގައި އެ ޤައުމުގެ ރައީސް ކަމުގެ މަޤާމާ ތިން ބޭފުޅަކު ހަވާލުވިއެވެ. އަދި، ބޮލުއާރްތޭއަކީ 2016ވަނަ އަހަރަށް ފަހު ޕެރޫގެ ރައީސް ކަމުގެ މަޤާމު ފުރުއްވާ ހަވަނަ ބޭފުޅާއެވެ.