ފަލަސްޠީނުގެ ރައްޔިތުންނަށް ކުރިމަތިކޮށްފައިވާ އަޅުވެތިކަން އިތުރުކުރަން ޔަހޫދީންގެ އައު ސަރުކާރުން ކުރަމުންދާ މަސައްކަތްތަކާ ދެކޮޅަށް ފަލަސްޠީނާއި އިސްރާޢީލުގެ ރައްޔިތުން އަޑުއުފުލަން ފަށައިފިއެވެ. ޔަހޫދީންގެ ބޮޑުވަޒީރު ބެންޖަމިން ނަތަންޔާހޫގެ އައު ސަރުކާރުން ވެރިކަމާ ހަވާލުވުމަށް ފަހު ފަލަސްޠީނުގެ ރައްޔިތުންނަށް ބިރުދެއްކުމާއި، ފުރައްސާރަ ކުރުމާއި، އެ މީހުން އަޅުވެތިކުރުމުގެ އަމަލުތައް ވަނީ އިތުރުކޮށްފައެވެ. ފަލަސްޠީނު މުސްލިމުން ބިކަކުރުމުގެ މަސައްކަތް މެކުހަށް ޖަހާފައެވެ.
ނަތަންޔާހޫގެ ސަރުކާރަކީ އިސްރާޢީލުގެ ތާރީޚުގައި ވެސް މިހާތަނަށް އުފެދުނު އެންމެ ނުރައްކާތެރި އަދި އެންމެ ޖައްބާރު ސަރުކާރެވެ. ސަބަބަކީ، އެއީ ހަރުކަށި ފިކުރަށް ތާޢީދުކުރާ ކަނާތު ފިޔައިގެ ޕާޓީތަކުގެ މައްޗަށް އެކުލެވިގެންވާ ސަރުކާރެކެވެ. އަދި، ފަލަސްޠީނުގެ ރައްޔިތުން އަޅުވެތިކޮށް، އެ މީހުންގެ މިނިވަންކަން ހަނިކޮށް، ފަލަސްޠީނުގެ މުސްލިމުން ޝަހީދުކުރަން އަތުކުރި އޮޅައިލައިގެން އޮތް ސަރުކާރެކެވެ. ފަލަސްޠީނު ރައްޔިތުންގެ އަނބިދަރިން ނިކަމެތި ކުރަން ކެތްމަދުވެފައި އޮތް ސަރުކާރެކެވެ.
ޔަހޫދީންގެ ޖައްބާރު ސަރުކާރުން އެންމެ ފަހުން ނިންމާފައިވާ އެއް ނިންމުމަކީ، ފަލަސްޠީނުގެ ދިދަ ބޭނުން ކުރުމަކީ ކުށެއް ކަމުގައި ހެދުމެވެ. ފަލަސްޠީނުގެ ދިދަ ބޭނުންކުރުމަކީ މަނާކަމެއްގެ ގޮތުގައި ކަނޑައަޅައި އެ ކަން އިޢުލާނުކޮށްފައި ވަނީ ޔަހޫދީންގެ ޤައުމީ ސަލާމަތާ ބެހޭ ވަޒީރު އިތަމާރް ބެން-ގުވީރެވެ. އޭނާއަކީ ހަރުކަށި ފިކުރަށް ލޯބިކުރާ، އެ ފިކުރު ކުރިއަރުވަން މަސައްކަތް ކުރާ ޖައްބާރު ވަޒީރެކެވެ.
ދާދިފަހުން އޭނާ ވަނީ މުސްލިމުންގެ މުޤައްދަޞް ބިމުގައިވާ މަސްޖިދުލް އަޤްޞާއަށް ގޮސް، މުސްލިމުންނަށް ފުރައްސާރަކޮށްފައެވެ. މަސްޖިދުލް އަޤްޞާ ހުންނަ ޓެމްޕްލް މައުންޓަކީ ޔަހޫދީންނަށް ވެސް މުހިންމު ތަނެއްގެ ގޮތުގައި ސިފަކޮށް ބެން-ގުވީރު ބުނެފައި ވަނީ، އެ ތަނަށް ޔަހޫދީންނަށް ވަނުމުގެ ފުރުޞަތު ދިނުން ހުއްޓައި ނުލެވޭނެ ކަމުގައެވެ. އަދި، އެ ތަނަށް ވަންނަ ޔަހޫދީންނަށް އިންޒާރުދޭ ފަރާތްތަކާ ދެކޮޅަށް ހަރުކަށި ފިޔަވަޅުތައް އަޅާނެ ކަމަށް ވެސް އޭނާ ބުނެފައިވެއެވެ.
އެ ނިންމުމާ އެކު، އިސްރާޢީލުގެ ސަލާމަތީ ބަރުތަކުން ވަނީ، ޢާންމު ތަންތަނުގައި ހުރި ފަލަސްޠީނުގެ ދިދަތައް ނެގުމުގެ މަސައްކަތް ފަށާފައެވެ. ޔަހޫދީންގެ ސަރުކާރުން ފަށާފައިވާ އަނެއް މަސައްކަތަކީ، އިރުމަތީ ޤުދުޞްގެ ޝައިޚް ޖައްރާޙުގައި ދިރިއުޅޭ ފަލަސްޠީނު ރައްޔިތުން، އެ މީހުންގެ ގެދޮރުން ނެރުމުގެ މަސައްކަތެވެ. މި ނިންމުންތަކާ ދެކޮޅަށް ފަލަސްޠީނުގެ ރައްޔިތުން އަޑުއުފުލަން ފަށާފައިވާއިރު، މިއީ އިސްރާޢީލުގެ ގިނަ ރައްޔިތުން ވެސް ޤަބޫލުކުރާ ނިންމުންތަކެއް ނޫނެވެ.
ޝައިޚް ޖައްރާޙުގައި އިސްރާޢީލުގެ ސަރުކާރާ ދެކޮޅަށް އަޑުއުފުލުމަށް ކުރަމުންދާ މުޒާހަރާތަކުގައި އިސްރާޢީލުގެ ރައްޔިތުން ވެސް ދަނީ ބައިވެރިވަމުންނެވެ. އަދި، އިސްރާޢީލުގެ ޓެލް އަވީވުގައި ވެސް އެ ޤައުމުގެ ސަރުކާރާ ދެކޮޅަށް ގިނަ އަދަދެއްގެ ބަޔަކު ދަނީ ޚިޔާލުފާޅުކޮށް، މުޒާހަރާ ކުރަމުންނެވެ. ޝައިޚް ޖައްރާޙުގައި ބޭއްވި މުޒާހަރާއެއް އެއް ބައިވެރިއަކީ، އިސްރާޢީލުގެ ޤާނޫނު ހަދާ މަޖިލީހުގެ މެންބަރެއް ކަމުގައިވާ އޮފަރ ކެސިފްއެވެ.
"ފަލަސްޠީނުގެ ދިދައިން ރަމްޒުކޮށްދެނީ މިނިވަންކަން ހޯދުމަށް ކުރަމުންދާ ޖިހާދު. ހަމަހަމަކަން ހޯދުމަށް ކުރަމުންދާ ޖިހާދު. އަދި އިންސާފާއި ސުލްޙައަށް ކުރަމުންދާ ޖިހާދު،" އިސްރާޢީލުގެ އައު ސަރުކާރުގެ ނިންމުންތަކާ ދެކޮޅަށް އަޑުއުފުލުމަށް ބޭއްވި މުޒަހަރާގައި ވާހަކަފުޅު ދައްކަވަމުން ކެސިފް ވިދާޅުވިއެވެ.
ފަލަސްޠީނުގެ ރައްޔިތުންނަށް އެ މީހުންގެ އަމިއްލަ ދިދަ ބޭނުންކުރުން މަނާކުރުމަކީ ޔަހޫދީންގެ އިސްރާޢީލުން ހިންގާ އަޅުވެތިކަމުގެ އަމަލެއްގެ ގޮތުގައި ސިފަކޮށް، އެމްނެސްޓީ އިންޓަރނޭޝަނަލްއިން ވެސް ވަނީ ޔަހޫދީންގެ ދަޢުލަތަށް ފާޑުކިޔާފައެވެ. މި ނިންމުމާ މެދު ނުރުހުން ފާޅުކޮށް އެމްނެސްޓީއިން ބުނީ، މިއީ އަޅުވެތިކަމުގެ އަމަލެއް ކަމަށާއި، މިއީ ފަލަސްޠީނުގެ ރައްޔިތުންގެ ޤައުމިއްޔަތާއި، ޚިޔާލު ފާޅުކުރުމުގެ މިނިވަންކަމާއި، އެއްވެ އުޅުމުގެ މިނިވަންކަމަށް އަރައިގަތުން ކަމަށް ޤަބޫލުކުރާ ކަމުގައެވެ.
ނަތަންޔާހޫއަކީ ޔަހުދީންގެ ދަޢުލަތުގެ ބޮޑުވަޒީރުކަމުގެ މަޤާމު އެންމެ ގިނަ ދުވަހު ފުރުއްވާފައިވާ ބޭފުޅާއެވެ. މީގެ ކުރިން ވެސް ދެ ފަހަރެއްގެ މަތިން އޭނާ ވަނީ ބޮޑުވަޒީރު ކަމުގެ މަޤާމު ފުރުއްވާފައެވެ. އޭނާގެ ސަރުކާރުތަކަކީ، ފަލަސްޠީނުގެ އެތަކެއް ސަތޭކަ މުސްލިމުންނެއްގެ ލޭއޮހޮރުވައިލުމުގެ ފަހަތުގައިވާ ސަރުކާރުތަކެކެވެ. އޭނާއަކީ އެތަކެއް ސަތޭކަ މުސްލިމުންނެއް ޝަހީދުކޮށްފައިވާ ގާތިލެކެވެ. އޭނާގެ އައު ސަރުކާރަކީ ވެސް، ފަލަސްޠީނުގެ ރައްޔިތުންނަށް އިތުރު ބިރުވެރިކަމެއްގެ ގޮތުގައި މަސްރަޙު ދިރާސާ ކުރާ ފަރާތްތަކުން ސިފަ ކުރެއެވެ.