ޔޫކްރެއިނަށް ރަޝިޔާއިން ދިން ވަރުގަދަ މިސައިލް ހަމަލާތަކެއްގައި ޑްނިޕްރޯގައި ޢާންމުން ދިރިއުޅޭ ޢިމާރާތަކަށް މިސައިލް ހަމަލާއެއް އަރައި، ޢާންމުންގެ 12 މީހުން މަރުވެއްޖެއެވެ. މި ހަމަލާގައި މަރުވި މީހުންގެ ތެރޭގައި 15 އަހަރުގެ އަންހެން ކުއްޖެއް ހިމެނޭއިރު، މި ހާދިސާގައި އެ ޢިމާރާތުގައި ދިރިއުޅޭ 64 މީހަކު ޒަޚަމުވިއެވެ.
ޑްނިޕްރޯ އޮންނަ ޑްނިޕްރޯޕެޓްރޮވްސްކްގެ ގަވަރުނަރު ވަލެންޓިން ރެޒްނިޗެންކީ ވިދާޅުވީ، މި ހާދިސާގައި ޒަޚަމުވި މީހުންގެ ތެރޭގައި ހަތް ކުޑަކުދިން ވެސް ހިމެނޭ ކަމުގައެވެ. އަދި، އިތުރު 26 މީހަކު ވީނުވީއެއް ނޭނގި ގެއްލިފައިވާ ކަމަށާއި، ވެއްޓިފައިވާ ޢިމާރާތުގެ ބައިތަކުގެ ދަށުން އެ މީހުން ހޯދުމަށް މަސައްކަތް ކުރަމުންދާ ކަމުގައި އޭނާ ވިދާޅުވިއެވެ.
ޔޫކްރެއިނަށް އެންމެ ފަހުން ދީފައި މިވާ މިސައިލް ހަމަލާތައް އަމާޒުކޮށްފައި ވަނީ، ޢާންމުންނަށް ޒަރޫރީ ޚިދުމަތްތައް ދިނުމަށް ބޭނުންކުރާ ވަސީލަތްތަކަށެވެ. ޔޫކްރެއިނަށް އަމާޒުކޮށް ރަޝިޔާއިން ފޮނުވައިލި މިސައިލެއްގެ ބައިތައް، އަވަށްޓެރި މޮލްޑޯވާއަށް ވެއްޓިފައިވާ ކަމަށް ބުނެ، އެ ޤައުމުން ވަނީ ކަންބޮޑުވުން ފާޅުކޮށްފައެވެ.
ރަޝިޔާއިން ޔޫކްރެއިނަށް ވަރުގަދަ މިސައިލް ހަމަލާތަކެއް ދީފައި މި ވަނީ، ޔޫކްރެއިނު ދިފާޢު ކުރުމަށް ހަނގުރާމަ ކުރަމުންދާ ސިފައިންނަށް އެންމެ ފަހުގެ ޒަމާނީ ޓޭންކުތަކެއް ފޯރުކޮށްދޭން ނިންމައި، އިނގިރޭސިވިލާތުން އެ ކަން އިޢުލާނުކުރިތާ ކުޑަ ވަގުތުކޮޅެއް ފަހުންނެވެ. ޓޭންކު ފަދަ ހަނގުރާމަމަތީ ޒަމާނީ އުޅަނދުފަހަރު ފޯރުކޮށްދިނުމަށް ޔޫކްރެއިނުން ވަނީ އެމެރިކާއާއި ހުޅަނގުގެ ބާރުތަކުގެ ކިބައިން އެދިފައެވެ.
ޔޫކްރެއިނަށް "ޗެލެންޖަރ 2" މަރުކާގެ ޓޭންކު ފޯރުކޮށްދޭނެ ކަން އިޢުލާނު ކުރައްވާފައި ވަނީ އިނގިރޭސިވިލާތުގެ ބޮޑުވަޒީރު ރިޝީ ސުނަކެވެ. އިނގިރޭސިވިލާތަކީ ޒަމާނީ ޓޭންކުތަކެއް އެ ޤައުމަށް ފޯރުކޮށްދޭނެ ކަމަށް ބުނި ފުރަތަމަ ޤައުމެވެ. އިނގިރޭސިވިލާތުގެ މި ނިންމުމަށް ފާޑުކިޔަމުން ރަޝިޔާއިން ބުނީ، މި އަމަލާ އެކު ހަނގުރާމައިގެ މަސްރަޙު އިތުރަށް ގޯސްވާނެ ކަމުގެ އިންޒާރު ދީފައެވެ. އަދި، ހަމަނުޖެހުންތައް އިތުރުވެ، ހަނގުރާމައިގައި މަރުވާ މީހުންގެ އަދަދުތައް އިތުރުވާނެ ކަމުގައި ވެސް މޮސްކޯއިން ބުންޏެވެ.
ޑްނީޕްރޯއަށް ރަޝިޔާއިން ދިން ހަމަލާތައް ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ވެސް ވަނީ ކުށްވެރި ކުރައްވާފައެވެ. ވިދާޅުވީ، ރަޝިޔާގެ ހަމަލާތަކުގައި ސުންނާފަތިކޮށްލާފައިވާ ޢިމާރާތްތަކުގެ ދަށުވެފައިވާ މީހުންގެ އަދަދު ސާފު ނުވާ ކަމުގައެވެ. އަދި، ކޮންމެ ގަޑިއިރަކަށް ފަހު، މަރުވެފައިވާ އިތުރު މީހުންގެ ހަށިތައް ފެންނަމުންދާ ކަމަށާއި، ހަމަލާތަކުގައި މަރުވި މީހުންގެ އަދަދު އިތުރުވަމުންދާ ކަމުގައެވެ.
އަދި، ރަޝިޔާގެ ބިރުވެރިކަން ނިމުމަކަށް ގެނެވޭނީ ހަނގުރާމައިގެ މައިދާނުން ކަމުގައި ވެސް އޭނާ ވިދާޅުވިއެވެ. ޑްނިޕްރޯއަށް ދިން ހަމަލާތަކާ ގުޅިގެން ޒެލެންސްކީގެ އިސް މުޝީރެއް ކަމުގައިވާ މިޚައިލޯ ޕޮޑޮލްޔެކް ވަނީ، އ.ދ.ގެ ސަލާމަތީ މަޖިލީހުން ރަޝިޔާ ބޭރުކުރަން އެ މަޖިލީހަށް ގޮވައިލައްވާފައެވެ.
ޑްނިޕްރޯގެ އިތުރުން ރަޝިޔާއިން ވަނީ ވެރިރަށް ކީވްއާއި އިރުއުތުރުގައިވާ ޚާރްކީވްއަށް ވެސް ވަރުގަދަ މިސައިލް ހަމަލާތަކެއް ދީފައެވެ. މި ހަމަލާތަކުގައި ކަރަންޓުގެ ޚިދުމަތް ދިނުމަށް ބޭނުންކުރާ ވަސީލަތްތަކަށް ބޮޑެތި ގެއްލުންތަކެއް ލިބި، އެ ސަރަޙައްދުތަކުގެ ބައެއް ހިސާބުތަކުން ކަރަންޓުގެ ޚިދުމަތް ވަނީ މެދުކެނޑިފައެވެ.
ރަޝިޔާ ސިފައިން ޔޫކްރެއިނަށް ފޮނުވައި ހަނގުރާމަ ފަށާފައި ވަނީ 2022 ފެބުރުވަރީ 24 ގައެވެ. ރަޝިޔާއިން ހުސްވި ހަފުތާ ބަންދުގެ ތެރޭގައި ވަނީ، ޔޫކްރެއިނުގެ އިރުމަތީގައިވާ ސޮލޭދާރް ހިފާފައިވާ ކަމަށް ބުނެފައެވެ. ސޮލޭދާރްއަކީ ރަޝިޔާ ސިފައިން މިހާރުވެސް ބޮޑު ބަޔެއް ކޮންޓްރޯލް ކުރަމުންދާ ޑޮނެޓްސްކްގެ ރަށެކެވެ. ސޮލޭދާރްގެ އިތުރުން އެ ރަށާ އިންވެގެން އޮތް ބަޚްމުތް ހިފުމަށް ރަޝިޔާ ސިފައިން މަސައްކަތް ކުރަމުންދާތާ މިހާރު މަސްތަކެއް ފާއިތުވެއްޖެއެވެ. ނަމަވެސް، ސޮލޭދާރް ރަޝިޔާ ސިފައިންގެ އަތްދަށަށް ވެއްޓިފައިވާ ކަމަށް ބުނާ ވާހަކަތައް ޔޫކްރެއިނުން ދަނީ ދޮގު ކުރަމުންނެވެ.