ރަޝިޔާއިން ޔޫކްރެއިނަށް ދެމުންދާ ވަރުގަދަ މިސައިލް ހަމަލާތަކުގެ ތެރެއިން ޑްނިޕްރޯގައި ހުންނަ ޢާންމުން ދިރިއުޅޭ ޢިމާރާތަކަށް ދިން ހަމަލާތަކުގައި މަރުވި މީހުންގެ އަދަދު 40 އިން މައްޗަށް އަރާފައިވާ ކަމުގައި ޔޫކްރެއިނުން ބުނެފިއެވެ. ޑްރިޕްރޯއަކީ ޔޫކްރެއިނުގެ އިރުމަތީގައި އޮންނަ ރަށެކެވެ. ރަޝިޔާއިން އެ ރަށަށް ދިން ހަމަލާތަކުގައި ޢާންމުން ދިރިއުޅޭ ޢިމާރާތްތަކުގެ އިތުރުން، ޒަރޫރީ ޚިދުމަތްތައް ދިނުމަށް ބޭނުންކުރާ ވަސީލަތްތަކަށް ވަނީ ބޮޑެތި ގެއްލުންތަކެއް ލިބިފައެވެ.
ޑްނިޕްރޯގައި ހުންނަ ޢާންމުން ދިރިއުޅޭ ޢިމާރާތަކަށް ދިން ހަމަލާތަކުގައި އެ ޢިމާރާތުގެ ބޮޑު ބައެއް ވަނީ ސުންނާފަތިވެފައެވެ. އަދި، ވެއްޓިފައިވާ ޢިމާރާތުގެ ބައިތަކުގެ ގިނަ އަދަދެއްގެ ބަޔަކު ދަށުވެފައިވާ ކަމަށް އެ ރަށުގެ އޮފިޝަލުން ބުނެއެވެ. އެ މީހުން ސަލާމަތް ކުރުމަށް އޮފިޝަލުން ދަނީ މަސައްކަތް ކުރަމުންނެވެ. މިހާތަނަށް 40 މީހެއްގެ ހަށިގަނޑު ފެނިފައިވާ ކަމަށް އޮފިޝަލުން ބުނެއެވެ.
މި ހަމަލާގައި މަރުވި މީހުންގެ ތެރޭގައި ތިން ކުޑަކުދިން ހިމެނޭ ކަމުގައި ވެސް އޮފިޝަލުން ބުނެއެވެ. އަދި، ގެއްލިފައިވާ ކަމަށް ބެލެވޭ މީހުންގެ އަދަދު 39 އަށް އަރާ ކަމަށާއި، އެ މީހުން ހޯދުމަށް މަސައްކަތް ކުރަމުންދާ ކަމަގައި ވެސް އޮފިޝަލުން ބުނެއެވެ. މި ހަމަލާގައި ގިނަ އަދަދެއްގެ ބަޔަކު ވަނީ ޒަޚަމުވެފައެވެ.
ރަޝިޔާއިން ޔޫކްރެއިނަށް ވަރުގަދަ މިސައިލް ހަމަލާތަކެއް ދީފައި މި ވަނީ، ޔޫކްރެއިނު ދިފާޢު ކުރުމަށް ހަނގުރާމަ ކުރަމުންދާ ސިފައިންނަށް އެންމެ ފަހުގެ ޒަމާނީ ޓޭންކުތަކެއް ފޯރުކޮށްދޭން ނިންމައި، އިނގިރޭސިވިލާތުން އެ ކަން އިޢުލާނުކޮށްފައިވަނިކޮށެވެ. ޔޫކްރެއިނަށް "ޗެލެންޖަރ 2" މަރުކާގެ ޓޭންކު ފޯރުކޮށްދޭނެ ކަން އިޢުލާނު ކުރައްވާފައި ވަނީ އިނގިރޭސިވިލާތުގެ ބޮޑުވަޒީރު ރިޝީ ސުނަކެވެ.
އިނގިރޭސިވިލާތަކީ ޒަމާނީ ޓޭންކުތަކެއް އެ ޤައުމަށް ފޯރުކޮށްދޭނެ ކަމަށް ބުނި ފުރަތަމަ ޤައުމެވެ. އިނގިރޭސިވިލާތުގެ މި ނިންމުމަށް ފާޑުކިޔަމުން ރަޝިޔާއިން ބުނީ، މި އަމަލާ އެކު ހަނގުރާމައިގެ މަސްރަޙު އިތުރަށް ގޯސްވާނެ ކަމުގެ އިންޒާރު ދީފައެވެ. އަދި، ހަމަނުޖެހުންތައް އިތުރުވެ، ހަނގުރާމައިގައި މަރުވާ މީހުންގެ އަދަދުތައް އިތުރުވާނެ ކަމުގައި ވެސް މޮސްކޯއިން ބުންޏެވެ.
ޑްނިޕްރޯގައި ހުންނަ ޢާންމުން ދިރިއުޅޭ ޢިމާރާތަކަށް ހަމަލާދީފައި ވަނީ ރަޝިޔާގެ ސިފައިން ކަމަށް ބުނާ ވާހަކަތައް ވެސް ރަޝިޔާއިން ވަނީ ދޮގުކޮށްފައެވެ. އަދި، އެ ޢިމާރާތަށް އަރާފައިވާ މިސައިލަކީ، ޔޫކްރެއިނުގެ ދިފާޢީ ބާރުން ބޭނުންކޮށްފައިވާ މިސައިލެއް ކަމުގައި ވެސް ރަޝިޔާއިން ވަނީ ބުނެފައެވެ. ކްރެމްލިންގެ ތަރުޖަމާނު ޑްމިޓްރީ ޕެސްކޮފް ވިދާޅުވީ ޢާންމުން ދިރިއުޅޭ އަދި ޢާންމުން ބޭނުންކުރާ އެއްވެސް ޢިމާރާތަކަށް ރަޝިޔާއިން ހަލާދީފައި ނުވާނެ ކަމުގައެވެ.
ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ވަނީ ޑްނިޕްރޯއަށް ދީފައިވާ ހަމަލާތައް އެންމެ ހަރުކަށި އިބާރާތުން ކުށްވެރި ކުރައްވާފައެވެ. އޭނާ ވިދާޅުވީ، ޢިމާރާތުގެ ދަށުގައި ތާށިވެފައިވާ ކަމަށް ބެލެވޭ މީހުން ހޯދައި، އެ މީހުން ސަލާމަތް ކުރުމަށް ހުއްޓައިނުލައި މަސައްކަތް ކުރަމުންދާ ކަމުގައެވެ. އަދި، ޑްނިޕްރޯއަށް ދީފައިވާ ހަމަލާއިން ރެކެން ރަޝިޔާއިން މަސައްކަތް ކުރާތީ އެ ކަމާ ވެސް އޭނާ ވަނީ ނުރުހުން ފާޅުކުރައްވާފައެވެ.
ރަޝިޔާ ސިފައިން ޔޫކްރެއިނަށް ފޮނުވައި ހަނގުރާމަ ފަށާފައި ވަނީ 2022 ފެބުރުވަރީ 24 ގައެވެ. ރަޝިޔާއިން ހުސްވި ހަފުތާ ބަންދުގެ ތެރޭގައި ވަނީ، ޔޫކްރެއިނުގެ އިރުމަތީގައިވާ ސޮލޭދާރް ހިފާފައިވާ ކަމަށް ބުނެފައެވެ. ސޮލޭދާރްއަކީ ރަޝިޔާ ސިފައިން މިހާރުވެސް ބޮޑު ބަޔެއް ކޮންޓްރޯލް ކުރަމުންދާ ޑޮނެޓްސްކްގެ ރަށެކެވެ. ސޮލޭދާރްގެ އިތުރުން އެ ރަށާ އިންވެގެން އޮތް ބަޚްމުތް ހިފުމަށް ރަޝިޔާ ސިފައިން މަސައްކަތް ކުރަމުންދާތާ މިހާރު މަސްތަކެއް ފާއިތުވެއްޖެއެވެ. ނަމަވެސް، ސޮލޭދާރް ރަޝިޔާ ސިފައިންގެ އަތްދަށަށް ވެއްޓިފައިވާ ކަމަށް ބުނާ ވާހަކަތައް ޔޫކްރެއިނުން ދަނީ ދޮގު ކުރަމުންނެވެ.