ރާއްޖެ ޓްރާންސްޕޯޓް ލިންކު، އާރް.ޓީ.އެލް މިނީ ބަހުގެ ޚިދުމަތް އަންނަ ހުކުރު ދުވަހު ވިލިމާލޭގައި ފެށުމަށް ތައްޔާރުވަމުންދާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމް.ޓީ.ސީ.ސީއިން ވިދާޅުވެއްޖެއެވެ. އެކުންފުނިން ވިދާޅުވީ، ވިލިމާލޭގައި ބޭނުންކުރާނީ އެކުންފުނިން އެންމެފަހުން ރާއްޖެގެނައި ތިމާވެއްޓާ ރައްޓެހި ބަސްތައްކަމަށެވެ.
އެމް.ޓީ.ސީ.ސީއިން ވިދާޅުވީ، އާރް.ޓީ.އެލްގެ ބަހުގެ ޚިދުމަތް މާލޭ ސިޓީއަށް ފޯރުކޮށްދިނުމަށް ކުރަމުންދާ މަސައްކަތުގެ ތެރެއިން މާލެ އަދި ހުޅުމާލެއާއި އެއްފަސްގަނޑަކުން މިވަގުތު ގުޅިފައިނެތް ވިލިމާލެއަށް އެ ޚިދުމަތް ދިނުމަށް މިހާރު ތައްޔާރުވަމުންދާކަމަށެވެ.
އެގޮތުން ވިލިމާލޭގައި ބަހުގެ ޚިދުމަތް ދިނުމަށް ބޭނުންކުރާނީ ތިމާވެއްޓާ ރައްޓެހި 6 (އިލެކްޓްރޮނިކް ވެހިކަލް) އީވީ ބަސްކަމަށް އެމް.ޓީ.ސީ.ސީން ވިދާޅުވެއެވެ. އަދި މި ބަސްތަކުގައި 11 މީހުންނަށް އިށީންދެ ތިބެވޭނެހެން ސީޓް ހަރުކޮށްފައި ހުންނާނެކަމަށާއި، 4 މީހުންނަށް ކޮޅަށް ތިބެވޭނެ ޖާގަވެސް އޮންނާނެކަމަށް އެކުންފުނިން ވިދާޅުވެއެވެ.
އެމް.ޓީ.ސީ.ސީއިން މި ބަސްތައް ރާއްޖެ ގެނެސްފައި ވަނީ މިދިޔަ ނޮވެމްބަރުމަހުގެ ތެރޭގައެވެ.
ބަހުގެ ޚިދުމަތް ވިލިމާލެއަށް ފުޅާކުރުމަށްޓަކާ ވާންޖެހޭ އެންމެ ފަހުގެ ތައްޔާރީތައް އެމް.ޓީ.ސީ.ސީއިން ވަމުންދާއިރު، އެކުންފުނީގެ އަމާޒަކީ މި ހިނގާ ޖަނަރަވީމަސް ނިމުމުގެ ކުރިން ވިލިމާލޭގައި ބަހުގެ ޚިދުމަތް ފެށުމެވެ. އަދި އާރް.ޓީ.އެލް ވިލިމާލޭ ބަހުގެ ޚިދުމަތާގުޅޭ ރޫޓް މެޕާއި، ޝެޑިއުލްގެ މަޢުލޫމާތު ކުރިއަށްއޮތް ދުވަސްތަކުގެ ތެރޭގައި ހާމަކުރާނެކަމަށް އެމް.ޓީ.ސީ.ސީއިން ވިދާޅުވެއެވެ.
ރާއްޖޭގެ ދަތުރުފަތުރުގެ ޚިދުމަތް ފޯރުކޮށްދޭ އެންމެ ބޮޑު ކުންފުނީގެ ހައިސިއްޔަތުން އެމް.ޓީ.ސީ.ސީގެ މަޤްޞަދަކީ އެކަށީގެންވާ އަގުގައި ލުއިފަސޭހަކަމާއެކު ބޭނުންކުރެވޭނެ ކަނޑާއި އެއްގަމުގެ ދަތުރުފަތުރުގެ ޚިދުމަތެއް ރައްޔިތުންނަށް ފޯރުކޮށްދިނުންކަމަށް އެކުންފުނިން ވިދާޅުވެއެވެ.
ިދުުދ
ލަވް ޔޫ ޕރސޑނޓ