އިންޑޮނީޝިޔާގެ މަލަންގްގައި ބޭއްވި ފުޓުބޯޅަ މެޗަކަށް ފަހު ހިނގި ހަމަނުޖެހުންތަކެއްގައި ގިނަ އަދަދެއްގެ ބަޔަކު ފިތި ބާރުވެގެން މަރުވި ހާދިސާގައި އިހުމާލުވި މީހުންގެ ޝަރީއަތް ފަށައިފިއެވެ. 2022 އޮކްޓޫބަރު 1 ވަނަ ދުވަހު އިރުމަތީ ޖާވާގެ މަލަންގްގައި ހިނގި އެ ހާދިސާގައި 135 މީހުން މަރުވިއެވެ. އޭގެ ތެރޭގައި 40 ކުޑަކުދިން ވެސް ހިމެނެއެވެ. އެއީ، އެ ޤައުމުގެ ތާރީޚުގައި ވެސް ސްޓޭޑިޔަމެއްގައި ހިނގި އެންމެ ހިތާމަވެރި ހާދިސާއެވެ.
އެ ހާދިސާ ހިނގުމަށް މަގުފަހިވީ ފަސް މީހެއްގެ އިހުމާލުން ކަމަށް ތުހުމަތުކޮށްފައިވާއިރު، އެ މީހުންގެ ޝަރީއަތް މިހާރު މި ވަނީ ފަށާފައެވެ. ފަސް މީހުންގެ މައްޗަށް ވެސް އުފުލާފައި ވަނީ، އިހުމާލުވުމުގެ ސަބަބުން ބަޔެއްގެ ފުރާނަ ގެއްލުމުގެ ދަޢުވާއެވެ.
އެރީމާ އެފް.ސީ.އާއި ޕްރެސެބާޔާ ސުރަބާޔާއާ ދެކޮޅަށް ކުޅުނު ފޯރިގަދަ ފުޓުބޯޅަ މެޗަކަށް ފަހު ހިނގި އެ ހާދިސާގައި އިތުރު 180 މީހަކު ޒަޚަމުވިއެވެ. މި ހާދިސާ ހިނގާފައި ވަނީ ބަލިވި ޓީމުގެ ސަޕޯޓަރުން ދަނޑުމައްޗަށް އެރުމުން، އެ މީހުން ހުއްޓުވުމަށް ފުލުހުން ކަރުނަ ގޭސް ޖެހުމާ ގުޅިގެން، އެންމެން އެއް ވަގުތެއްގައި އެ ތަނުން ނިކުންނަށް މަސައްކަތް ކުރުމުގެ ތެރޭގައި ފިތި ބާރުވެގެންނެވެ.
ފުލުހުން ބުނީ، ބެލުންތެރިންނާ ދެކޮޅަށް ބާރުގެ ބޭނުންކޮށް، ކަރުނަ ގޭސް ޖަހާފައި ވަނީ، އެ މީހުން ހަމަނުޖެހުން ހިންގައި، ފުލުހުންނަށް ހަމަލާދީ ދެ ފުލުހަކު މަރައިލުމުން ކަމުގައެވެ. މިއީ، ކުޅިވަރު ހަރަކާތެއްގައި ހިނގި މި ފަދަ އެންމެ ނުރައްކާތެރި އެއް ހާދިސާއެވެ. އެ ހާދިސާއާ ގުޅިގެން އިހުމާލުވުމުގެ ދަޢުވާ އުފުލާފައި ވަނީ ތިން ފުލުހުންނާއި، މެޗު އޮފިޝަލަކާއި، ދަނޑުގެ ސަލާމަތީ ކަންކަން ބަލަހައްޓަމުން ދިޔަ އޮފިސަރެއްގެ މައްޗަށެވެ.
މި ފަސް މީހުންގެ މައްޗަށް ކުށް ސާބިތުވެއްޖެ ނަމަ، ފަސް އަހަރުގެ ޖަލު ހުކުމަކާއި ކުރިމަތިލާން ޖެހޭނެއެވެ. ހަވަނަ މީހެއް ވެސް މި ހާދިސާގައި އިހުމާލުވެފައިވާ ކަމަށް ތުހުމަތު ކުރެއެވެ. އެއީ، އިންޑޮނީޝިޔާގެ ޕްރިމިޔަރ ލީގު ހިންގާ ކުންފުނީގެ އިސް އޮފިޝަލެކެވެ. އޭނާގެ މައްސަލައިގެ ތަހުޤީޤު ނިމުމުން ދަޢުވާ ކުރަން ފޮނުވާނެ ކަމަށް ބެލެވެއެވެ.
މި ޝަރީއަތް ކުރިއަށްދާ ކޯޓު ކައިރިއަށް، އެ ހާދިސާގައި މަރުވި މީހުންގެ ޢާއިލާތަކުން ވަނީ އެއްވެފައެވެ. އަދި، ހާދިސާ ހިނގަން މެދުވެރިވުމުގައި އިހުމާލުވެފައިވާ މީހުންނަށް މަރުގެ އަދަބު ދިނުމަށް، މަރުވި މީހުންގެ ޢާއިލާތަކުން ދަނީ ގޮވައިލަމުންނެވެ. ކޯޓު ދޮށަށް އެ މީހުން އެއްވުމުން، އެ ސަރަޙައްދުގައި ސަލާމަތީ ފިޔަވަޅުތައް ވަނީ ވަރުގަދަ ކޮށްފައެވެ.
އެ ހާދިސާއާ ގުޅޭ ގޮތުން ފުލުހުން ބުނަމުން ދަނީ، އެ މެޗު ބަލަން ދަނޑަށް ވަތް މީހުން ހަމަނުޖެހުން ހިންގާފައިވާ ކަމުގައެވެ. އަދި، ފުލުހުންނަށް ހަމަލާދީފައިވާ ކަމުގައެވެ. ނަމަވެސް، ބެލުންތެރިން ބުނަމުން ދަނީ، ފުލުހުން ހާލަތާ ނުބައްދަލު ބާރުގެ ބޭނުން ކޮށްފައިވާ ކަމުގައެވެ. އަދި، ބެލުންތެރިންގެ ގިނަ ބަޔަކަށް ފުލުހުން އަނިޔާކޮށްފައިވާ ކަމުގައި ވެސް ބެލުންތެރިން ތުހުމަތު ކުރެއެވެ.
އެ ހާދިސާއާއި ގުޅިގެން އިރުމަތީ ޖާވާގެ ފުލުހުންގެ އިދާރާއާއި މަލަންގްގެ ފުލުހުންގެ އިދާރާގެ އިސްވެރިން ވަނީ ވަޒީފާއިން ވަކިކޮށްފައެވެ. އަދި، އިންޑޮނީޝިޔާގެ ސަރުކާރުން ވަނީ، ވާދަވެރި ފުޓުބޯޅަ މެޗުތައް ވަގުތީ ގޮތުން މެދުކަނޑައިލާފައެވެ. 2022 ޑިސެންބަރު މަހުގެ ތެރޭގައި ލީގުގެ މެޗުއަށް އަލުން ފަށާފައިވީ ނަމަވެސް، ބެލުންތެރިން ދަނޑަށް ވަނުން އަދިވެސް އޮތީ މަނާކޮށްފައެވެ.
މި ހާދިސާގެ ފުރިހަމަ ތަހުޤީޤެއް ހިންގުމަށް އެ ޤައުމުގެ ރައީސް ޖޯޖީ ވިދޯދޯ ވަނީ އަންގަވާފައެވެ. އަދި، ހާދިސާ ހިނގި އެރީމާ ކަންޖުރުހަން ސްޓޭޑިޔަމް ތަޅައިލާ، އެ ތަނުގައި ފީފާގެ މިންގަނޑުތަކާ އެއްގޮތަށް އައު ސްޓޭޑިޔަމެއް އެޅުމަށް ވެސް ނިންމަވާފައެވެ. އެ ހާދިސާގެ ތަހުޤީޤު ހިންގަމުންދާ ކޮމިޓީން ވަނީ، އެ ޤައުމުގެ ފުޓުބޯޅަ އިދާރާގެ އިސްވެރިން އިސްތިޢުފާ ދިނުމަށް ވެސް ގޮވައިލާފައެވެ.
ނަމަވެސް، އެ ފަރާތްތަކުން މި ގޮވައިލުމަށް އިޖާބަދީފައެއް ނުވެއެވެ. މިއީ ފުޓުބޯޅައިގެ ތާރީޚުގައި ވެސް ހިނގާފައިވާ މި ފަދަ އެންމެ ހިތާމަވެރި އެއް ހާދިސާއެވެ. 1964 ވަނަ އަހަރު ޕެރޫގައި ވެސް މި ފަދަ ހިތާމަވެރި ހާދިސާއެއް ހިނގައި، 320 މީހުން މަރުވިއެވެ.