ޔޫކްރެއިނުގެ ވެރިރަށް ކީވްގައި ދަތުރުކުރަމުންދިޔަ ހެލިކޮޕްޓަރެއް ވެއްޓި، 18 މީހުން މަރުވެއްޖެއެވެ. މި ހާދިސާގައި މަރުވި މީހުންގެ ތެރޭގައި އެ ޤައުމުގެ ދާޚިލީ ވަޒީރު ޑެނީސް މޮނަސްޓިރްސްކީއާއި އޭނާގެ ނައިބު ޔެވްގެނީ ޔެނިން ހިމެނެއެވެ.
ހެލިކޮޕްޓަރު ވެއްޓިފައި ވަނީ ބްރޮވަރީ ކިޔާ ސަރަޙައްދެއްގައި ހުންނަ ކުޑަކުދިންގެ ނާސަރީ ސްކޫލެއް ކައިރިއަށެވެ. މި ހާދިސާގައި މަރުވި މީހުންގެ ތެރޭގައި ތިން ކުޑަކުދިން ވެސް ހިމެނެއެވެ. ހެލިކޮޕްޓަރު ވެއްޓުނު ހާދިސާގައި އެ ސަރަޙައްދުގައި ހުރި ޢާންމުން ދިރިއުޅޭ ޢިމާރާތަކާއި، އެ ސަރަޙައްދުގައި ޕާކުކޮށްފައި އޮތް އެއްގަމު އުޅަނދުފަހަރަށް ބޮޑެތި ގެއްލުންތަކެއް ލިބުނެވެ.
ވެއްޓިފައި ވަނީ، ކުއްލި ހާލަތްތަކުގައި ހަރަކާތްތެރިވާ އިދާރާގެ ހެލިކޮޕްޓަރެކެވެ. މި ހާދިސާގެ މަޢުލޫމާތު ދެއްވަމުން ކީވްގެ ފުލުހުންގެ އިސް އޮފިޝަލެއް ކަމުގައިވާ ޔެވްޖެނީ އީގޯ ކްލެމެންކޯ ވިދާޅުވީ، މި ހާދިސާގައި 29 މީހަކު ޒަޚަމުވި ކަމަށާއި، އޭގެ ތެރޭގައި 15 ކުޑަކުދިން ހިމެނޭ ކަމުގައެވެ. އަދި، ހެލިކޮޕްޓަރުގައި ދަތުރުކޮށްފައި ވަނީ ނުވަ މީހުން ކަމަށާއި، އެ އެންމެން މަރުވެފައިވާ ކަމުގައެވެ.
މި ހާދިސާއާ ގުޅިގެން ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ވަނީ ހިތާމަ ފާޅުކުރައްވާފައެވެ. ޑާވޯސްގައި މިހާރު ކުރިއަށްދާ ދުނިޔޭގެ އިޤުތިޞާދީ ފޯރަމްގައި ވީޑިޔޯ މެދުވެރިކޮށް ތަޤުރީރު ކުރައްވަމުން ޒެލެންސްކީ ވިދާޅުވީ، ހަނގުރާމައެއްގައި އެކްސިޑެންޓުތައް ނުހުންނާނެ ކަމުގައެވެ. ނަމަވެސް، މޮނަސްޓިރްސްކީ ދަތުރު މަތިންދާބޯޓު ވެއްޓުނު ހާދިސާއާ ރަޝިޔާއާ އެއްވެސް ސީދާ ގުޅުމެއް އޮތް ކަމުގައި އޭނާ ވިދާޅުވެފައެއް ނުވެއެވެ.
ވައިގެ ދަތުރުފަތުރުގައި ޔޫކްރެއިނުން ޢާންމު ގޮތެއްގައި ބޭނުންކުރަނީ ދުވަސްވެފައިވާ އުޅަނދުފަހަރެވެ. އެހެންކަމުން، މި ފަދަ އުޅަނދު ފަހަރު ވެއްޓުމަކީ، ޔޫކްރެއިނުގައި ޢާންމު ކަމެއް ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. 2020 ސެޕްޓެންބަރު މަހު އެންޓޮނޮފް މަރުކާގެ މަތިންދާބޯޓެއް ވެއްޓުނު ހާދިސާގައި 26 މީހުން މަރުވިއެވެ.