ނިއުޒިލެންޑުގެ ބޮޑުވަޒީރު ޖަސިންޑާ އާޑަރން އިސްތިޢުފާ ދެއްވަން އުޅުއްވާކަން އިޢުލާނު ކުރައްވައިފިއެވެ. އޭނާގެ އަންނަ ފެބުރުވަރީ މަހުގެ ތެރޭގައި އިސްތިޢުފާ ދެއްވަން ނިންމަވާފައިވާ ކަން އިޢުލާނު ކުރެއްވީ އޭނާގެ ލޭބަރ ޕާޓީގެ މެންބަރުންނާ އެކު ބޭއްވެވި ބައްދަލުވުމެއްގައެވެ. އޭނާ ބޮޑުވަޒީރު ކަމުގެ މަޤާމާ ހަވާލުވެ ވަޑައިގަތީ 2017 ވަނަ އަހަރުއެވެ.
ޖަސިންޑާގެ ލޭބަރ ޕާޓީން 2017 ވަނަ އަހަރު ބޭއްވި އިންތިޚާބު ކާމިޔާބުކޮށް ވެރިކަމާ ހަވާލުވީ ގުޅިފައިވާ ކޯލިޝަނެއްގެ ތެރެއިންނެވެ. ނަމަވެސް، އޭގެ ތިން އަހަރު ފަހުން ބޭއްވި އިންތިޚާބުގައި އޭނާގެ ލޭބަރ ޕާޓީން ވަނީ ކުރި ހޯދައި، އިންތިޚާބު ކާމިޔާބުކޮށްފައެވެ. ނަމަވެސް، ޕާޓީއަށް އޮތް ތާޢީދު ފަހަކަށް އައިސް ވަނީ ދަށްވާން ފަށާފައެވެ.
"އަޅުގަނޑުގެ ނަޒަރުގައި އަޅުގަނޑު މި މަޤާމުން އިސްތިޢުފާ ދޭންވީ ވަގުތު އައިސް ޖެހިއްޖެ. އިތުރު ހަތަރު އަހަރު މި މަޤާމު ފުރުމަށް އަޅުގަނޑުގެ ކިބައިގައި ހިތްވަރެއް ނެތް. އިސްތިޢުފާ ދޭން ނިންމީ ކުރިއަށް އޮތް އިންތިޚާބު ކާމިޔާބު ނުކުރެވޭނެ ކަން އެނގޭތީ އެއް ނޫން. އެ ކަން މި ޕާޓީއަށް ކުރެވޭނެ،" ލޭބަރ ޕާޓީގެ މެންބަރުންނާ ވާހަކަފުޅު ދައްކަވަމުން ޖަސިންޑާ ވިދާޅުވިއެވެ.
އަންނަ ފެބުރުވަރީ މަހުގެ 7 ވަނަ ދުވަހު ބޮޑުވަޒީރު ކަމުގެ މަޤާމުން ޖަސިންޑާ ވަކިވެވަޑައިގަންނަވާނެއެވެ. އަދި، މި ޖަނަވަރީ މަހުގެ 22 ވަނަ ދުވަހު، ލޭބަރ ޕާޓީން، އެ ޕާޓީގެ އައު ލީޑަރެއް ކަނޑައަޅާނެއެވެ. އިސްތިޢުފާ ދެއްވި ނަމަވެސް، ޤާނޫނު ހަދާ މަޖިލީހުގެ ދައުރު ހަމަވަންދެން އެ މަޤާމުގެ މަސްއޫލިއްޔަތުތައް ފުރުއްވާނެ ކަމުގައި ޖަސިންޑާ ވިދާޅުވިއެވެ. އެ ދައުރުގެ މުއްދަތު ހަމަވާނީ އޮކްޓޫބަރު މަހުގެ 14 ވަނަ ދުވަހުއެވެ.
ޖަސިންޑާ އިސްތިޢުފާ ދެއްވާނެ ކަން އިޢުލާނު ކުރެއްވުމުން، އޭނާގެ ނައިބުގެ ގޮތުގައި މިހާރު ހުންނެވި ގްރެންޓް ރޮބަރޓްސަން ވަނީ، ބޮޑުވަޒީރު ކަމުގެ މަޤާމަށް އޭނާގެ ނަން ވެސް ހުށަނާޅުއްވާނެ ކަމުގައި ވިދާޅުވެފައެވެ. އިސްތިޢުފާ ދެއްވުމުގެ ފަހަތުގައި ފޮރުވިފައިވާ އެއްވެސް ކަމެއް، އަދި ސިއްރެއް ވެސް ނެތް ކަމުގައި ޖަސިންޑާ ވިދާޅުވިއެވެ.
"އަޅުގަނޑަކީ ވެސް އިންސާނެއް. މި ޤައުމަށް ޓަކައި އަޅުގަނޑުގެ ޖަނާއި މާލުން އެތަކެއް ޤުރުބާނީއެއް ކޮށްދެވިއްޖެ. މިހާރު މި އޮތީ އެ މަޤާމުގެ މަސްއޫލިއްޔަތުތަކާ އެހެން ބޭފުޅަކު ހަވާލުވާން ޖެހޭ ވަގުތު އައިސް ޖެހިފައި،" ޖަސިންޑާ ވިދާޅުވިއެވެ.