ޔޫކްރެއިންގެ ދިފާޢުގައި އެ ޤައުމުގެ ސިފައިން ކުރަމުންދާ ހަނގުރާމައަށް އަސްކަރީ ގޮތުން އެހީތެރިކަން ފޯރުކޮށްދިނުމަށް އިނގިރޭސިވިލާތުން ކުރަމުންދާ މަސައްކަތްތަކުގެ ދަށުން، ޔޫކްރެއިނަށް "ބްރިމްސްޓޯން" މަރުކާގެ މިސައިލް ފޮނުވަން އިނގިރޭސިވިލާތުން ނިންމައިފިއެވެ. މި ކަން އިޢުލާނު ކުރެއްވީ އެ ޤައުމުގެ ދިފާޢީ ވަޒީރު ބެން ވޮލެސްއެވެ.
ޔޫކްރެއިނަށް އަސްކަރީ އެހީތެރިކަން ފޯރުކޮށްދިނުން އިތުރުކުރުމާ ގުޅޭ ގޮތުން މަޝްވަރާކުރުމަށް އެސްޓޯނިޔާގެ ޓާޕާ އަސްކަރީ މަރުކަޒުގައި އެހީދޭ ޤައުމުތަކުން ވަނީ ބައްދަލުވުމެއް ބާއްވާފައެވެ. މި ބައްދަލުވުން ވިލަރެސްކޮށްފައި ވަނީ އިނގިރޭސިވިލާތާއި އެސްޓޯނިޔާ ގުޅިގެންނެވެ.
މި ބައްދަލުވުމަށް ފަހު ވޮލެސް ވިދާޅުވީ، ބްރިމްސްޓޯން މަރުކާގެ 600 މިސައިލް ޔޫކްރެއިނަށް ފޮނުވަން އިނގިރޭސިވިލާތުން ނިންމާފައިވާ ކަމަށާއި، ހަނގުރާމައިގެ މައިދާނުގެ ކޮންޓްރޯލް ނެގުމަށް ޔޫކްރެއިން ސިފައިން ކުރަމުންދާ މަސައްކަތްތަކަށް މި ނިންމުމުގެ ސަބަބުން ކުރިއެރުންތަކެއް ލިބިގެންދާނެ ކަމުގައެވެ.
"މިއީ 2023. މިއީ، ހަނގުރާމައާ މެދު ރަޝިޔާއިން ވިސްނަންވީ ވަގުތު. ޔޫކްރެއިނުން އެ ދަނީ ހަނގުރާމައިގައި ބޮޑެތި ކުރިއެރުންތަކެއް ހޯދަމުން. ރަޝިޔާ ސިފައިން ފަހަތަށް ޖައްސަމުން. އެ ނާކާމިޔާބީތަކުން ފިލާވަޅު ލިބި، ޔޫކްރެއިނުން ފޭބުމަކީ މިހާރު ރަޝިޔާ ސިފައިންނަށް އޮތް ހަމައެކަނި ގޮތް،" ވޮލެސް ވިދާޅުވިއެވެ.
މީގެ ކުރިން ވެސް އިނގިރޭސިވިލާތުން ވަނީ ބްރިމްސްޓޯން މަރުކާގެ މިސައިލް ޔޫކްރެއިނަށް ފޮނުވާފައެވެ. އަދި، ދާދިފަހުން އެ ޤައުމުން ވަނީ ޒަމާނީ ޓޭންކުތަކެއް ޔޫކްރެއިނަށް ފޮނުވަން ވެސް ނިންމާފައެވެ. ހަނގުރާމައިގައި ބޭނުން ކުރުމަށް ޒަމާނީ ހަތިޔާރު ފޯރުކޮށްދިނުމަށް އެދި ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ގެންދަވަނީ އެމެރިކާއާއި ހުޅަނގުގެ ބާރުތަކުގެ ކިބައިން އެދިވަޑައިގަންނަވަމުންނެވެ.
މި ގޮވައިލުމަށް އިޖާބަދީ، އެންމެ ފަހުގެ ޒަމާނީ ޓޭންކުތައް ޔޫކްރެއިނަށް ފޯރުކޮށްދޭން ނިންމާފައިވާ ފުރަތަމަ ޤައުމަކީ އިނގިރޭސިވިލާތެވެ. މީގެ ތެރޭގައި "ޗެލެންޖަރ 2" މަރުކާގެ ޓޭންކު ވެސް ހިމެނޭނެއެވެ. ޔޫކްރެއިނަށް ފޯރުކޮށްދެމުންދާ އަސްކަރީ އެހީތެރިކަން އިތުރުކުރުމާ މެދު މަޝްވަރާކުރުމަށް 50 އަށްވުރެ ގިނަ ޤައުމުން ދަނީ ތައްޔާރުވަމުންނެވެ. ޖަރުމަނުވިލާތުގެ ރަމްސްޓީން އަސްކަރީ މަރުކަޒުގައި ބާއްވާ މި ބައްދަލުވުމުގައި ނޭޓޯގެ 30 ޤައުމުން ވެސް ބައިވެރިވާނެ ކަމަށް ބެލެވެއެވެ.
ނޭޓޯއިން ވެސް ވަނީ، ޔޫކްރެއިނަށް އިތުރު ބަރު ހަތިޔާރު ފޯރުކޮށްދޭން ނިންމާފައިވާ ކަން އިޢުލާނުކޮށްފައެވެ. އެމެރިކާއިން ވެސް ވަނީ "ބްރެޑްލީ" މަރުކާގެ އަސްކަރީ އުޅަނދު ޔޫކްރެއިނަށް ފޮނުވާނެ ކަން އިޢުލާނުކޮށްފައެވެ. އަދި، ފަރަންސޭސިވިލާތުން ވަނީ "އޭ.އެމް.އެކްސް-10 އާރް.ސީ" މަރުކާރުގެ އަސްކަރީ އުޅަނދުތައް ޔޫކްރެއިނަށް ފޮނުވާނެ ކަމަށް ބުނެފައެވެ. މި ފަދަ ހަތިޔާރުތައް ޔޫކްރެއިނަށް ފޮނުވަން ހުޅަނގުގެ ޤައުމުތަކުން މީގެ ކުރިން ވަނީ ދެކޮޅު ހަދާފައެވެ.
ރަޝިޔާ ސިފައިން ޔޫކްރެއިނަށް ފޮނުވައި ހަނގުރާމަ ފަށާފައި ވަނީ 2022 ފެބުރުވަރީ 24 ވަނަ ދުވަހުއެވެ. ޒެލެންސްކީ ވިދާޅުވަނީ، ޒަމާނީ ހަތިޔާރާ ނުލައި ހަނގުރާމަ ކާމިޔާބު ކުރުމަކީ އެ ޤައުމުގެ އަސްކަރިއްޔާއަށް ކުޅަދާނަ ކަމެއް ނޫން ކަމުގައެވެ. އަދި، އެ ޤައުމަށް އަރާފައިވާ ރަޝިޔާ ސިފައިން ފަހަތަށް ޖައްސަން ބާރުގަދަ ހަތިޔާރު ބޭނުންވާނެ ކަމަށް މަސްރަޙު ދިރާސާކުރާ ފަރާތްތަކުން ވެސް ދަނީ ބުނަމުންނެވެ.