ބާރުގަދަ ތޫފާނެއް ކަމުގައިވާ ޗެނީސޯ މަޑަގަސްކަރައިގެ ސަރަޙައްދުތަކަށް އެރުމުގެ ސަބަބުން އެ ޤައުމަށް ބޮޑެތި ގެއްލުންތަކެއް ލިބިއްޖެއެވެ. މި ތޫފާން އަރާފައި ވަނީ ސާވާ ސަރަޙައްދުގެ ރަށެއް ކަމުގައިވާ އަންޓަލާހާއަށެވެ. އެއީ، އެ ޤައުމުގެ އިރުއުތުރުގެ ސަރަޙައްދުގައި އޮންނަ ރަށެކެވެ.
މި ތޫފާނާ އެކު ބޯކޮށް ވާރޭވެހި، އަންޓަލާހާގެ ބޮޑު ސަރަޙައްދެއްގައި ވަނީ ފެންބޮޑުވެފައެވެ. އަދި، ފެންބޮޑުވުމާ ގުޅިގެން 730 އަށްވުރެ ގިނަ ގެއަށް ބޮޑެތި ގެއްލުންތަކެއް ލިބިފައިވާ ކަމުގައި އެ ޤައުމުގެ މޫސުމާ ބެހޭ އިދާރާއިން ބުނެއެވެ. އަދި، އެކަކު ކަނޑަށް ގެއްލިފައިވާ ކަމުގައި ވެސް އިދާރާއިން ބުންޏެވެ. ގެއްލިފައިވާ މީހާ ހޯދަން އޮފިޝަލުން މިހާރު ދަނީ މަސައްކަތް ކުރަމުންނެވެ.
ތޫފާނާ އެކު 90 ކިލޯމީޓަރާއި 120 ކިލޯމީޓަރުގެ ބާރުމިނުގައި ވައިޖެހެމުންދާއިރު، ބައެއް ސަރަޙައްދުތަކަށް ހުއްޓުމެއް ނެތި ދަނީ ވާރޭވެހެމުންނެވެ. ސަމްބާވާ ސިޓީއަށް މިހާރު ވެސް 100 މިލިމީޓަރުގެ ވާރޭވެހިފައިވާ ކަމުގައި އެ ޤައުމުގެ މޫސުމާ ބެހޭ އިދާރާއިން ބުނެއެވެ. އަދި، ނޯސީ ބޮރަހާއަށް 75 މިލިމީޓަރުގެ ވާރޭވެހިފައިވާއިރު، އެންޓްސޮހިހީއަށް ވެސް ވަނީ 104 މިލިމީޓަރުގެ ވާރޭވެހިފައެވެ.
ފެންބޮޑުވުމާ ގުޅިގެން 700 އަށްވުރެ ގިނަ ގެއަށް ބޮޑެތި ގެއްލުންތައް ލިބިފައިވާއިރު، 214 މީހަކު ވަނީ ރައްކާތެރި ހިސާބުތަކަށް ބަދަލުކޮށް، ވަގުތީ ބޯހިޔާވަހިކަން ފޯރުކޮށްދީފައެވެ. އަދި، ބައެއް ސަރަޙައްދުތަކަށް ދަތުރުކުރުމަށް ހުރަސްއެޅިފައިވުމާ އެކު، އެ ސަރަޙައްދުތަކުގެ ހާލަތު ދެނެގަތުމަށް ދަތިވެފައިވާ ކަމަށާއި، ހާލުގައި ޖެހިފައިވާ މީހުންގެ ޢަދަދު އިތުރުވާނެ ކަމަށް ބެލެވޭ ކަމުގައި ވެސް އެ ޤައުމުގެ އިދާރާތަކުން ބުނެއެވެ.
މި ތޫފާން އަރާފައިވާ ސަރަޙައްދުތަކުގައި ރަތް ސަމާލެއް އިޢުލާނުކޮށްފައިވާއިރު، އެ ސަރަޙައްދުތަކުގައި ދިރިއުޅޭ 3 މިލިޔަނަށްވުރެ ގިނަ މީހުންނަށް ތޫފާނެ އަސަރު ކުރާނެ ކަމަށް އ.ދ.އިން ބުނެއެވެ. އަދި، ފެންބޮޑުވުމުގެ އަސަރު ކޮށްފައިވާ މީހުންގެ ޢަދަދު 540,000 އަށް އަރާނެ ކަމަށް ވެސް އ.ދ.އިން އަންދާޒާކުރެއެވެ.