ޔަހޫދީ އިސްރާޢީލުގެ ޢާންމުންގެ މީހަކު ބަޑިން ހަމަލާދީ ފަލަސްޠީނުގެ މުސްލިމަކު ޝަހީދުކޮށްލައިފިއެވެ. މި ހާދިސާ ހިނގާފައި ވަނީ ހުޅަނގު އައްސޭރީ ރާމަاللهގައި ހުންނަ ޔަހޫދީން ދިރިއުޅޭ ސަރަޙައްދެއް ކަމުގައިވާ ސްދޭ އެފްރައިމްގައެވެ. ފަލަސްޠީނުގެ މުސްލިމުންނާ ދެކޮޅަށް ޔަހޫދީންގެ ސިފައިން ހިންގަމުންދާ ލާއިންސާނީ އުދުވާންތައް އިތުރުކުރަމުންދާ މި ދަނޑިވަޅުގައި، ޔަހޫދީންގެ ޢާންމުން ވެސް މި ވަނީ، ފަލަސްޠީނުގެ ރައްޔިތުންނާ ދެކޮޅަށް ހަތިޔާރު ބޭނުންކުރަން ފަށާފައެވެ.
ޔަހޫދީންގެ މީހަކު ބަޑިން ދިން ހަމަލާއެއްގައި ޝަހީދުކޮށްލާފައި ވަނީ 42 އަހަރުގެ ޠާރިޤް މާލީއެވެ. ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ، އޭނާ ޝަހީދުވީ، ޔަހޫދީންގެ ޖައްބާރު ސިފައިން ދިން ހަމަލާތަކެއްގައި ކަމުގައެވެ. އަދި، އޭނާ ޝަހީދުކޮށްލާފައި ވަނީ ކަފްރު ނާމާ ކިޔާ އަވަށެއްގައި ކަމަށް ވެސް އެ ވުޒާރާއިން ބުންޏެވެ.
ނަމަވެސް، ޔަހޫދީންގެ ޖައްބާރު އަސްކަރިއްޔާއިން ބުނީ، އޭނާ ޝަހީދުވެފައި ވަނީ، ޔަހޫދީންގެ ޢާންމުންގެ މީހަކު ބަޑިޖެހުމުގެ ސަބަބުން ކަމުގައެވެ. އަދި، ޔަހޫދީންގެ ޢާންމުންގެ މީހާ، މާލީއަށް ބަޑިން ހަމަލާދީފައި ވަނީ، އަމިއްލަ ދިފާޢުގައި ކަމަށް ވެސް އިސްރާޢީލުގެ އަސްކަރިއްޔާއިން ބުންޏެވެ.
މި ހާދިސާ ހިނގި ސަރަޙައްދަށް ކުއްލި ހާލަތްތަކުގައި ހަރަކާތްތެރިވާ ފަލަސްޠީނުގެ ޞިއްޙީ އޮފިޝަލުން ވަނީ ގޮސްފައެވެ. އަދި، މާލީއަށް ޞިއްޙީ ފަރުވާދޭން އެ މީހުން މަސައްކަތް ކުރުމުން، ޔަހޫދީންގެ ޖައްބާރު ސިފައިން ވަނީ އެ ކަމަށް ހުރަސްއަޅާފައެވެ.
ޔަހޫދީ ދަޢުލަތުގެ އައު ބޮޑުވަޒީރު ބެންޖަމިން ނަތަންޔާހޫގެ އައު ސަރުކާރާ އެކު، ފަލަސްޠީނުގެ މުސްލިމުން އަޅުވެތިކުރުމަށް ކުރަމުންދާ މަސައްކަތްތައް ވަނީ އިތުރުކޮށްފައެވެ. އެ މީހުންގެ ގެދޮރަށް ގެއްލުންދިނުން ވަނީ އިތުރުކޮށްފައެވެ. އަދި، މުސްލިމުންނާ ދެކޮޅަށް ހިންގަމުންދާ ލާއިންސާނީ އުދުވާންތައް ވެސް ވަނީ އިތުރުކޮށްފައެވެ.
ޔަހޫދީންގެ ޖައްބާރު ސިފައިން ފަލަސްޠީނުގެ ބިންތަކަށް އަރައި މި އަހަރުގެ ތެރޭގައި ހިންގާފައިވާ ލާއިންސާނީ އުދުވާންތަކުގައި މިހާތަނަށް ފަލަސްޠީނުގެ 18 މީހަކު ވަނީ ޝަހީދުކޮށްލާފައެވެ. މީގެ ތެރޭގައި، ފަލަސްޠީނުގެ މިނިވަންކަމަށް ޖިހާދު ކުރަމުންދާ މުޖާހިދުންގެ އިތުރުން ކުށެއް ނެތް ޢާންމުން ވެސް ހިމެނެއެވެ. މީގެ ތެރެއިން ގިނަ މީހުން ޝަހީދުކޮށްލާފައި ވަނީ ބަޑިޖަހައިގެންނެވެ.
ފަލަސްޠީނުގެ ބިންތަކުގައި ވަޒަންވެރިކޮށްފައިވާ ޔަހޫދީންނަކީ، ބައިނަލްއަޤުވާމީ ޤާނޫނުތަކުން ބަލާއިރު، ޤާނޫނާއި ޤަވާޢިދާ ޚިލާފަށް އެ ތަންތަނުގައި ދިރިއުޅެމުންދާ ބަޔެކެވެ. ނަމަވެސް، ޔަހޫދީންގެ ދަޢުލަތުން މި ކަން ބަލައެއް ނުގަނެއެވެ. އަދި، ފަލަސްޠީނުގެ ބިންތަކުގައި ޔަހޫދީން ވަޒަންވެރިކުރުމުގެ މަސައްކަތްތައް އިތުރު ކުރުމަށް ނަތަންޔާހޫގެ ސަރުކާރުން ދަނީ މަސައްކަތް ކުރަމުންނެވެ.
ނަތަންޔާހޫގެ ސަރުކާރަކީ ޔަހޫދީންގެ ދަޢުލަތުގެ ވެރިކަމާ މިހާތަނަށް ހަވާލުވި އެންމެ ހަރުކަށި، އެންމެ ޖައްބާރު ސަރުކާރެވެ. އެއީ، ޔަހޫދީންގެ ހަރުކަށި ފިކުރަށް ތާޢީދުކުރާ ޕާޓީތަކުގެ މައްޗަށް އެކުލެވިގެންވާ ސަރުކާރެކެވެ. އެ ސަރުކާރާ އެކު، ފަލަސްޠީނުގެ ރައްޔިތުންނަށް މި ވަނީ ނުރައްކާތެރި ބިރުވެރިކަމަކާ ކުރިމަތިލާން ޖެހިފައެވެ.
ހުސްވި 2022 ވަނަ އަހަރަކީ ވެސް، ޔަހޫދީންގެ ސިފައިންގެ ލޭއޮހޮރުވުންތައް ގިނަ އަހަރެކެވެ. ފަލަސްޠީނުގެ އެތަކެއް ސަތޭކަ ބަޔެއްގެ ލޭ ބިމަށް އޮހޮރުވައިލި އަހަރެކެވެ. އެ އަހަރުގެ ތެރޭގައި ޝަހީދުކޮށްލާފައިވާ ފަލަސްޠީނު ރައްޔިތުންގެ ޢަދަދު 200 އަށްވުރެ މައްޗަށް އަރައެވެ. މީގެ ތެރެއިން 150 އަށްވުރެ ގިނަ މީހުން ޝަހީދުކޮށްލާފައި ވަނީ ހުޅަނގު އައްސޭރީގައެވެ.