ޔޫކްރެއިނަށް ބަރު ހަތިޔާރު ފޮނުވުމާ މެދު މަޝްވަރާ ކުރުމުގައި ހުޅަނގުން ބޭކާރުކޮށްލާ ކޮންމެ ދުވަހަކު، ރަޝިޔާއިން ޔޫކްރެއިނުގެ ގިނަ ޢަދަދެއްގެ ބަޔަކު މަރަމުންދާ ކަމުގައި ޔޫކްރެއިނުން ބުނެފިއެވެ. ޔޫކްރެއިނުގެ ރައީސް ވޮލޮޑޮމީރް ޒެލެންސްކީގެ އިސް މުޝީރެއް ކަމުގައިވާ މިޚައިލޯ ޕޮޑޮލްޔެކް ވިދާޅުވީ، ހަތިޔާރު ފޯރުކޮށްދިނުމާ މެދު ގޮތެއް ނުނިންމި ހޭދަވާ ކޮންމެ ދުވަހަކީ، ޔޫކްރެއިންގެ އިތުރު ރައްޔިތުންތަކެއްގެ ލޭއޮހޮރިގެންދާ ދުވަހެއް ކަމުގައެވެ.
އޭނާ މިމޭރުމުން ވާހަކަފުޅު ދައްކަވާފައި މި ވަނީ، ޔޫކްރެއިނުގެ ދިފާޢުގައި އެ ޤައުމުގެ ސިފައިން ކުރަމުންދާ ހަނގުރާމައިގައި ބޭނުން ކުރުމަށް ޒަމާނީ ޓޭންކު ފަދަ ބަރުހަތިޔާރު ފޯރުކޮށްދިނުމާ މެދު ހުޅަނގުން މަޝްވަރާ ކުރަމުންދާ ދަނޑިވަޅެއްގައެވެ. ނަމަވެސް، އެ މަޝްވަރާތަކަށް އަދި އަލިމަގެއް ފެނިފައެއް ނުވެއެވެ.
އެމެރިކާއާއި ހުޅަނގުގެ ބާރުތަކުން ޔޫކްރެއިނަށް އަސްކަރީ އެހީތެރިކަން ފޯރުކޮށްދެމުން ދިޔަ ނަމަވެސް، ޒެލެންސްކީ ބޭނުންވާ ފަދަ ޓޭންކާއި ބަރުހަތިޔާރު ފޯރުކޮށްދޭން އެ ޤައުމުތަކުން ދަނީ ޖެހިލުންވަމުންނެވެ. ޒެލެންސްކީ ބޭނުންފުޅު ވަނީ، ރަޝިޔާގެ ސިފައިންނާ ކުރިމަތިލެވޭނެ ފަދަ ބާރުގަދަ ހަތިޔާރެވެ. އަދި، އެންމެ ފަހުގެ ޒަމާނީ ޓޭންކުތަކެވެ.
މި ފަދަ ހަތިޔާރުތަކުގެ ތެރެއިން ވެސް، ޔޫކްރެއިނުން އެންމެ ބޮޑަށް ބޭނުންވާ އެއް ހަތިޔާރަކީ، ޖަރުމަނުވިލާތުގައި އުފައްދާ "ލެޕަޑް 2" މަރުކާގެ ޓޭންކެވެ. މި ކަމާ މެދު ޔޫކްރެއިނުގެ ދިފާޢީ ވަޒީރު އޮލެކްސީ ރެޒްނިކޮފް ވަނީ ޖަރުމަނުވިލާތުގެ ދިފާޢީ ވަޒީރާ ވެސް މަޝްވަރާ ކުރައްވާފައެވެ. ނަމަވެސް، އެ ފަދަ ހަތިޔާރު ޔޫކްރެއިނަށް ފޯރުކޮށްދިނުމާ މެދު ޖަރުމަނުވިލާތުން އަދި މިހާތަނަށް ގޮތެއް ނިންމާފައެއް ނުވެއެވެ.
ޖަރުމަނުވިލާތުން ބުނީ، ލެޕަޑް މަރުކާގެ ޓޭންކުތައް ޔޫކްރެއިނަށް ފޮނުވަން ހުޅަނގުގެ އެހެން ޤައުމުތަކުން ބޭނުންވި ނަމަވެސް، ޖަރުމަނުވިލާތުން އެ ކަމަށް ހުރަސްއަޅަމުން ނުދާ ކަމުގައެވެ. ނަމަވެސް، ލެޕަޑް މަރުކާގެ ޓޭންކުތައް ބޭނުންކުރާ އެހެން ޤައުމުތަކަށް، އެ ތަކެތި ޔޫކްރެއިނަށް ފޮނުވޭނީ، ޖަރުމަނުވިލާތުގެ ހުއްދައާ އެކުގައެވެ.
ޔޫކްރެއިނަށް އިތުރު ހަތިޔާރު ފޯރުކޮށްދިނުމާ ގުޅޭ ގޮތުން ޖަރުމަނުވިލާތުގައި އޮންނަ ރަމްސްޓެއިން އަސްކަރީ މަރުކަޒުގައި ދާދި ފަހުން ވަނީ ކުއްލި ބައްދަލުވުމެއް ބާއްވާފައެވެ. މި ބައްދަލުވުމުގައި 50 އަށްވުރެ ގިނަ ޤައުމުން ބައިވެރިވެފައިވާއިރު، މީގެ ތެރޭގައި ނޭޓޯގެ މެންބަރު ޤައުމުތަކުގެ ތެރެއިން 30 ޤައުމަކުން ވެސް ބައިވެރިވިއެވެ. މި ބައްދަލުވުމުގައި ނިންމާފައިވާ ނިންމުތަކުގެ ތެރޭގައި ޔޫކްރެއިނަށް އަސްކަރީ އުޅަނދުފަހަރާއި އިތުރު ބަރުހަތިޔާރު ފޯރުކޮށްދިނުން ހިމެނެއެވެ. އަދި، ވައިގެ ދިފާޢީ ނިޒާމުތައް ފޮނުވަން ވެސް ޤައުމުތަކުން ވަނީ އެއްބަސްވެފައެވެ.
ލެޕަޑް މަރުކާގެ ޓޭންކަކީ، ޔޫކްރެއިނުގެ އަސްކަރިއްޔާއަށް ވަރަށް މުހިންމު ހަތިޔާރެއް ކަމުގައި އެ ޤައުމުން ޤަބޫލުކުރެއެވެ. ސަބަބަކީ، އެ ޓޭންކަކީ، ރަޝިޔާގެ "ޓީ-90" މަރުކާގެ ޓޭންކުތަކާ ކުރިމަތިލައި ކުރިހޯދުމުގެ ޤާބިލުކަން ލިބިފައިވާ ޓޭންކުތަކެކެވެ. ރަޝިޔާއިން އަތްގަދަކޮށްފައިވާ ގިނަ ސަރަޙައްދުތަކުގައި އެ ޤައުމުން ބޭނުންކުރަމުން ދަނީ ޓީ-90 މަރުކާގެ ޓޭންކުތަކެވެ.
ރަޝިޔާގެ އަތްދަށުން ޔޫކްރެއިނުގެ ސަރަޙައްދުތައް މިނިވަން ކުރެވޭނީ، ޓީ-90 މަރުކާގެ ޓޭންކުތައް ބަލިކޮށްގެން ކަމުގައި ޔޫކްރެއިނުން ޤަބޫލުކުރެއެވެ. "ޔޫކްރެއިން ދިފާޢު ކުރެވޭނީ، ރަޝިޔާ ސިފައިން އަތްގަދަކޮށްފައިވާ ސަރަޙައްދުތައް މިނިވަންކޮށްގެން. އެ ކަން ކުރެވޭނީ، ޓޭންކު ފަދަ ބަރުހަތިޔާރު ލިބިގެން،" ރެޒްނިކޮފްގެ އިސް މުޝީރެއް ކަމުގައިވާ ޔޫރީ ސެކް ވިދާޅުވިއެވެ.
ޔޫކްރެއިނުގެ އަސްކަރިއްޔާއިން މިހާރު ބޭނުންކުރަމުންދާ ޓޭންކުތަކަކީ، ކުރީގެ ރޫސީ ވިލާތުގެ ޒަމާނުގައި އުފައްދާފައިވާ ޒަމާންވީ ޓޭންކުތަކެކެވެ. އަދި، ރަޝިޔާއިން އެ ޤައުމަށް ފޮނުވާފައިވާ ޒަމާނީ ޓޭންކުތަކާ ކުރިމަތިލުމުގެ ޤާބިލުކަން ނެތް، ބައުވެފައިވާ ޓޭންކުތަކެކެވެ. ވިލާތުގެ ޤައުމުތަކުގައި ލެޕްޑް މަރުކާގެ 2,000 އަށްވުރެ ގިނަ ޓޭންކު ގުދަންކޮށްފައި ހުރިއިރު، ރަޝިޔާ ސިފައިން ޔޫކްރެއިނުން ފައްސައިލަން ބޭނުންވާނީ މީގެ ތެރެއިން އެންމެ 300 އެއްހާ ޓޭންކު ކަމުގައި ޒެލެންސްކީ ޤަބޫލުފުޅު ކުރައްވައެވެ.