އެމެރިކާގެ ރައީސް ޖޯ ބައިޑަންގެ ގެކޮޅުން ސިއްރު ލިޔެކިޔުންތަކެއް ހޯދައިފިއެވެ. ޑެލަވެއަރގައި ހުންނަ ބައިޑަންގެ ގެކޮޅު ބަލައިފާސްކޮށްފައި ވަނީ ޑިޕާޓްމަންޓް އޮފް ޖަސްޓިސްގެ ފަރާތުންނެވެ. އެ ކަން ކޮށްފައި ވަނީ ވައިޓް ހައުސްގެ ހުއްދައާ އެކުގައެވެ. ބައިޑަންގެ ގެކޮޅުން ސިއްރު ހަ ލިޔުމެއް ފެނިފައިވާ ކަމުގައި ބައިޑަންގެ ޤާނޫނީ ވަކީލު ވަނީ ކަށަވަރުކޮށްދެއްވާފައެވެ.
މިއީ، 2024 ވަނަ އަހަރު ބާއްވާ ރިޔާސީ އިންތިޚާބުގައި ދެވަނަ ދައުރަކަށް ވާދަކުރައްވާނެ ކަމަށް ބެލެވޭ ބައިޑަންގެ ސަރުކާރަށް ލިބުނު ލަދުވެތިކަމެއްގެ ގޮތުގައި މަސްރަޙު ދިރާސާކުރާ ފަރާތްތަކުން ޤަބޫލުކުރެއެވެ. އިންތިޚާބުގައި ވާދަކުރައްވާނެ ކަން ބައިޑަން އަދި އިޢުލާނުކުރައްވާފައި ނުވި ނަމަވެސް، އޭނާ ގެންދަވަނީ އެ ކަމަށް ތައްޔާރުވެ ވަޑައިގަންނަވަމުންނެވެ.
ނަމަވެސް، މިއީ އެހާ ސީރިޔަސް މައްސަލައެއްގެ ގޮތުގައި ބައިޑަން ޤަބޫލުފުޅެއް ނުކުރައްވައެވެ. އޭނާ ވިދާޅުވެފައި ވަނީ، އެ ލިޔެކިޔުންތަކަކީ، އޮޅުމަކުން އޭނާގެ ގެކޮޅުގައި ފައިލް ކުރެވިފައިވާ ލިޔެކިޔުންތަކެއް ކަމުގައެވެ. އަދި، ގަސްދުގައި އެ ފަދަ އަމަލެއް ނުކުރައްވާނެ ކަމުގައި ވެސް އޭނާ ވަނީ ވިދާޅުވެފައެވެ.
2022 ވަނަ އަހަރު ވެސް، ވޮޝިންގްޓަންގައި ހުންނަ ބައިޑަންއާ ގުޅުން އޮންނަ ތިންކް ޓޭންކެއްގެ އޮފީހުން ސިއްރު ލިޔެކިޔުންތަކެއް ފެނިފައިވެއެވެ. އެ ލިޔެކިޔުންތަކަކީ، އޭނާ ނައިބު ރައީސްގެ މަޤާމުގައި ހުންނެވި އިރުގެ ލިޔެކިޔުންތަކެކެވެ. އަދި، ޑެލަވެއާގައި ހުންނަ ގެކޮޅުން ވެސް ކުރިން މި ފަދަ ލިޔެކިޔުންތަކެއް ފެނިފައިވެއެވެ. މީގެ އިތުރުން، ޤާނޫނު ހަދާ މަޖިލީހުގެ މެންބަރެއްގެ ގޮތުގައި މަސައްކަތް ކުރެއްވި އިރުގެ ލިޔެކިޔުންތަކެއް ވެސް ފެނިފައިވެއެވެ.
ޑެލަވެއާގައި ހުންނަ ބައިޑަންގެ ގެކޮޅު ބަލައިފާސްކުރުމަށް ޖަސްޓިސް ޑިޕާޓްމަންޓަށް ވައިޓް ހައުސްއިން ހުއްދަ ދީފައި ވަނީ، އެ ތަނުން އިތުރު ލިޔެކިޔުންތަކެއް ފެނުމާ ގުޅިގެންނެވެ. ބާރަ ގަޑިއިރަށް ދެމިގެންދިޔަ ބަލައިފާސްކުރުމުން ސިއްރު ހަ ލިޔުމެއް ފެނިފައިވާ ކަމަށާއި، އެ ތަކެތި ޖަސްޓިސް ޑިޕާޓްމަންޓާ ހަވާލުކޮށްފައިވާ ކަމުގައި ބައިޑަންގެ ޤާނޫނީ ވަކީލު ބޮބް ބައުއަރ ވިދާޅުވިއެވެ.
ތިންކް ޓޭންކުގެ އޮފީހާއި ބައިޑަންގެ ގެކޮޅުން މީގެ ކުރިން ފެނިފައިވާ ލިޔެކިޔުންތައް މިހާރު ވަނީ އެމެރިކާގެ ނޭޝަނަލް އާކައިވްސްއާ ހަވާލުކޮށް، ފައިލްކޮށްފައެވެ. މި ކަމާ ގުޅޭ ގޮތުން ބައިޑަން ވިދާޅުވީ، އޭނާގެ ޤާނޫނީ ވަކީލުންގެ އިރުޝާދުގެ ދަށުން އަމަލު ކުރައްވަމުން ގެންދަވާ ކަމަށާއި، އެމެރިކާގެ ރައްޔިތުން ހާސްވެ، ކަންބޮޑުވާން ޖެހޭ ފަދަ އަމަލެއް އޭނާ ކުރައްވާފައި ނުވާނެ ކަމުގައެވެ.
ބައިޑަންގެ ގެކޮޅުން ސިއްރު ލިޔެކިޔުންތަކެއް ފެނުނު މައްސަލަ ތަޙުޤީޤު ކުރުމަށް އެޓަރނީ ޖެނެރަލް މެރިކް ގާލެންޑްގެ އޮފީހުން ވަނީ މަސައްކަތް ފަށާފައެވެ. މިއީ، ވެރިކަމުގައި ހުންނެވި ރައީސެއްގެ ގެކޮޅުން މިފަދަ ލިޔެކިޔުންތަކެއް ފެނި، އެ މައްސަލަ ތަހުޤީޤު ކުރާ ފުރަތަމަ ފަހަރެވެ. މި ކަމާ ގުޅިގެން ބައިޑަންގެ ސަރުކާރުގެ ތެދުވެރިކަމާ މެދު، އޭނާގެ ސަރުކާރާ ދެކޮޅު ފަރާތްތަކުން ދަނީ ސުވާލު އުފައްދަމުންނެވެ.
އެމެރިކާގެ ކުރީގެ ރައީސް ޑޮނަލްޑް ޓްރަމްޕު ދިރިއުޅުއްވާ ރިސޯޓުން ވެސް ހުސްވި 2022 ވަނަ އަހަރުގެ އޮގަސްޓު މަހުގެ ތެރޭގައި ގިނަ ޢަދަދެއްގެ ސިއްރު ލިޔެކިޔުންތަކެއް ވަނީ ހޯދާފައެވެ. އޭނާގެ ރިސޯޓުން 700 އަށްވުރެ ގިނަ ޞަފުހާގެ ލިޔެކިޔުންތައް ފެނިފައިވާއިރު، އެ މައްސަލަ ޖަސްޓިސް ޑިޕާޓްމަންޓުން ގެންދަނީ ތަހުޤީޤު ކުރަމުންނެވެ. އެ ލިޔެކިޔުންތަކަކީ، ވެރިކަމުގެ ދައުރު ހަމަވުމުން ވައިޓް ހައުސްއިން ނިކުމެ ވަޑައިގަތުމުގެ ކުރިން ޓްރަމްޕް އަމިއްލާ ގެކޮޅަށް ގެންދަވާފައިވާ ލިޔެކިޔުންތަކެކެވެ.