ހުސްވި ހަފުތާއެއްހާ ދުވަހުގެ ތެރޭގައި ޗައިނާގައި ކޮވިޑް-19 ޖެހިގެން 13,000 އާ ގާތްކުރާ ޢަދަދެއްގެ މީހުން މަރުވެފައިވާ ކަމަށް އެ ޤައުމުން ހާމަކޮށްފިއެވެ. އެއީ، ޖަނަވަރީ 13 އިން 19 އާ ދެމެދު މި ބަލީގައި މަރުވެފައިވާ މީހުންގެ ޢަދަދެވެ. ޗައިނާގެ އެކި ކަންކޮޅުތަކުގައި ހަލުވިކަމާ އެކު ބަލި ދަނީ ފެތުރެމުންނެވެ.
ޗައިނާގެ އެކި ކަންކޮޅުތަކުގައި ހަލުވިކަމާ ބަލި ފެތުރެން ފަށާފައި ވަނީ، ބަލި ފެތުރުން ކޮންޓްރޯލް ކުރުމަށް އަޅާފައިވާ ފިޔަވަޅުތައް އުވައިލި ހިސާބުން ފެށިގެންނެވެ. އެއީ، 2022 ޑިސެންބަރު 7 ވަނަ ދުވަހުން ފެށިގެންނެވެ. ފިޔަވަޅުތައް ދޫކޮށްލުމާ އެކު، ބަލި ފެތުރުން އިތުރުވެ، ބަލި ޖެހިފައިވާ މީހުންނާ އެކު ހޮސްޕިޓަލުތައް ފުރެން ފެށިއެވެ. ހޮސްޕިޓަލުތަކުގައި އެޑްމިޓްކޮށްގެން ފަރުވާދެމުންދާ މީހުންގެ ތެރޭގައި ގިނައީ އުމުރުން ދުވަސްވީ މީހުންނެވެ.
2022 ޑިސެންބަރު 7 ވަނަ ދުވަހުން ފެށިގެން ހިނގި މަހެއްހާ ދުވަހުގެ ތެރޭގައި ޗައިނާގައި ކޮވިޑް ބަލީގައި މަރުވެފައިވާ މީހުންގެ އަދަދު 60,000 އަށް އަރާފައިވާ ކަން ޗައިނާއިން ކުރިން ވަނީ ހާމަކޮށްފައެވެ. އަދި، މި މަހުގެ 13 އިން 19 އާ ދެމެދު މަރުވި މީހުންގެ ޢަދަދާ އެކު، ފިޔަވަޅުތައް ދޫކޮށްލި ހިސާބުން ފެށިގެން އެ ޤައުމުގައި މަރުވި މީހުންގެ ޢަދަދު މި ވަނީ 73,000 އާ ގާތްކޮށްފައެވެ.
ހުސްވި ހަފުތާގައި ކޮވިޑް ބަލީގައި މަރުވި މީހުންގެ ޢަދަދު ޗައިނާގެ ސެންޓަރ ފޯރ ޑިޒީޒް ކޮންޓްރޯލް އެންޑް ޕްރިވެންޝަންއިން ހާމަކޮށްފައިވީ ނަމަވެސް، ޗައިނާގެ މަސްރަޙު ދިރާސާކުރާ ފަރާތްތަކުން މި ޢަދަދުތަކުގެ ސައްޙަކަމާ މެދު ދަނީ ސުވާލު އުފައްދަމުންނެވެ. އަދި، ބަލި ޖެހޭ މީހުންނާއި، ބަލީގައި މަރުވާ މީހުންގެ ޢަދަދުތައް ދެފުށްފެންނަ ގޮތެއްގެ މަތިން ހާމަކުރަމުން ނުދާ ކަމަށް ތުހުމަތު ކުރަމުންނެވެ.
ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)އިން ވެސް ދަނީ، ބަލީގައި މަރުވާ މީހުންގެ ޢަދަދުތައް ހާމަކުރުމަށް ޗައިނާއަށް ބާރުއަޅަމުންނެވެ. ފިޔަވަޅުތައް އުވައިލިފަހުން މަރުވެފައިވާ ކަމަށް ބެލެވޭ 73,000 މީހުންނަކީ، ހޮސްޕިޓަލުތަކުގައި އެޑްމިޓުކޮށްގެން ފަރުވާދެމުން ދަނިކޮށް މަރުވި މީހުންގެ ޢަދަދެވެ. އަދި، އަމިއްލަ ގެދޮރުގައި މަރުވި މީހުންގެ ޢަދަދުތައް ޗައިނާއިން ހާމަކޮށްފައެއް ނުވެއެވެ.
ކޮވިޑް ބަލި އެންމެ ފުރަތަމަ ފެނިފައި ވަނީ ޗައިނާގެ ވޫހާންއިން 2019 ވަނަ އަހަރުގެ ފަހުކޮޅެވެ. ބަލި ފެތުރެން ފެށުމާ އެކު ޗައިނާއިން ވަނީ "ޒީރޯ ކޮވިޑް"ގެ ނަމުގައި ހަރުކަށި ފިޔަވަޅުތަކެއް އަޅަން ފަށާފައެވެ. އަދި، ބައްޔަށް ވެކްސިނެއް އުފެއްދި ނަމަވެސް، ޗައިނާގެ އާބާދީގެ ބޮޑު ބަޔެއް ވެކްސިންގެ ޑޯޒްތައް ފުރިހަމަކޮށްފައެއް ނުވެއެވެ. މީގެ ތެރޭގައި ގިނައީ އުމުރުން ދުވަސްވީ މީހުންނެވެ.
ޗައިނާގެ ސެންޓަރ ފޯރ ޑިޒީޒް ކޮންޓްރޯލް އެންޑް ޕްރިވެންޝަންއިން ވަނީ، 1.4 ބިލިޔަން މީހުންގެ އާބާދީއެއް އޮންނަ އެ ޤައުމުގެ އާބާދީގެ 80 އިންސައްތަ މީހުންނަށް މި ބަލި ޖެހިފައިވާ ކަން ހުސްވި ހަފުތާ ބަންދުގެ ތެރޭގައި ހާމަކޮށްފައެވެ. އަދި، މިހާރު ފާހަގަކުރަމުންދާ ޗައިނާގެ އައު އަހަރާ ދިމާކޮށް، އެއް ރަށުން އަނެއް ރަށަށް، އަދި ރަށްފުށު ސަރަޙައްދުތަކަށް ދަތުރުކުރާ މީހުންގެ ޢަދަދު އިތުރުވެ، އެ ސަރަޙައްދުތަކަށް ބަލި ފެތުރިދާނެ ކަމުގެ ބިރު ވަނީ ހީވެފައެވެ.
ޖަނަވަރީ 7 އިން 21 އާ ދެމެދު އެކަނިވެސް ޗައިނާގެ 110 މިލިޔަން މީހުން ރޭލު ދަތުރުފަތުރު ކޮށްފައިވާ ކަމަށް ތަފާސްހިސާބުތަކުން ދައްކައެވެ. މިއީ، ހުސްވި 2022 ވަނަ އަހަރުގެ އެ މުއްދަތާ އަޅައިބަލާއިރު 28 އިންސައްތަ އިތުރުވުމެކެވެ. އަދި، އައު އަހަރު ފެށުމުގެ އެއް ދުވަސް ކުރިން އެއްގަމާއި ވައިގެ މަގުން ދަތުރުކޮށްފައިވާ މީހުންގެ ޢަދަދު 26.3 މިލިޔަނަށް އަރާ ކަމަށް ވެސް އެ ޤައުމުން އަންދާޒާ ކުރެއެވެ. މިއީ، އޭގެ ކުރީ އަހަރާ އަޅައިބަލާއިރު 50 އިންސައްތަ އިތުރު ޢަދަދެކެވެ.
ކޮވިޑްގެ ބަލިމަޑުކަން ފެށުނު ހިސާބުން ފެށިގެން ފިޔަވަޅުތައް އުވައިލުމާ ހަމައަށް އެ ޤައުމުގައި މަރުވެފައިވާ ކަމަށް ރިޕޯޓުކޮށްފައި ވަނީ 5,000 އެއްހާ މީހުންނެވެ. ކުރިއަށް އޮތް ހަފުތާއެއްހާ ދުވަހުގެ ތެރޭގައި ޗައިނާގައި ދުވާލެއްގެ މައްޗަށް މި ބަލީގައި މަރުވާ މީހުންގެ ޢަދަދު 36,000 އަށް އަރާނެ ކަމަށް މަސްރަޙު ދިރާސާކުރާ ފަރާތްތަކުން އަންދާޒާ ކުރެއެވެ. އަދި، މި އަހަރުގެ ތެރޭގައި އެ ޤައުމުގައި މި ބަލީގައި މިލިޔަނަކަށް ވުރެ ގިނަ މީހުން މަރުވާނެ ކަމަށް ވެސް އެ ފަރާތްތަކުން ލަފާ ކުރެއެވެ.