އެމެރިކާގެ ހުޅަނގު އައްސޭރިފަށުގައި އޮންނަ ކެލިފޯނިޔާ ސްޓޭޓްގައި ދިން ބަޑީގެ ހަމަލާތަކެއްގައި ޢާންމުންގެ 10 މީހުން މަރައިލާ، އިތުރު 10 މީހަކު ޒަޚަމުކޮށްލައިފިއެވެ. ލޮސް އެންޖެލެސްގެ މޮންޓެރޭ ޕާކްގައި ހުންނަ ކްލަބެއްގެ ތެރޭގައި ތިބި ބަޔަކަށް އަމާޒުކޮށް ބަޑިން ހަމަލާދިނުމުގައި ޒިންމާ ވަނީ 72 އަހަރުގެ ފިރިހިނެކެވެ.
ލޮސް އެންޖެލެސް ކައުންޓީގެ ފުލުހުން ބުނީ، މި ހަމަލާގައި ޒިންމާ ވަނީ ހޫ ކާން ޓްރާން ކިޔާ މީހެއް ކަމަށާއި، ފުލުހުން އޭނާ ހައްޔަރުކުރަން އުޅުމުގެ ތެރޭގައި، އޭނާ އަމިއްލަ ފުރާނަ ނަގައިލައިގެން މަރުވެފައިވާ ކަމުގައެވެ. ފުލުހުންނަށް އޭނާ ހޯދިފައި ވަނީ ބަޑިޖެހުމުގެ ހަމަލާގެ 12 ގަޑިއިރު ފަހުންނެވެ.
މޮންޓެރޭ ޕާކްގައި ހުންނަ ކްލަބުގައި ތިބި މީހުންނަށް ހަމަލާދިނުމަށް ފަހު އޭނާ ވަނީ އެ ރަށާ އިންވެގެން އޮންނަ އެލްހެމްބްރާގައި ހުންނަ ކްލަބަކަށް ވެސް ހަމަލާދޭން މަސައްކަތްކޮށްފައެވެ. ނަމަވެސް، އެ ތަނުގައި ތިބި ޢާންމުން ވަނީ އޭނާ ހުއްޓުވާފައެވެ. މި ހަމަލާތައް ދީފައި މި ވަނީ ޗައިނާގެ އައު އަހަރު ފާހަގަކުރުމުގެ ހަފުލާތަކެއް ކުރިއަށްދިޔަ ކްލަބެއްގައެވެ.
މި ހަމަލާގެ ފަހަތުގައިވާ ސަބަބެއް ހޯދުމަށް ފުލުހުން ދަނީ ތަހުޤީޤު ކުރަމުންނެވެ. ނަމަވެސް، މި ފަދަ ބަޑިޖެހުމުގެ ހާދިސާތަކަކީ އެމެރިކާގައި ޢާންމު ކަމެކެވެ. ފުލުހުން ބުނީ، މި ހަމަލާގައި މަރުވެފައި ވަނީ ފަސް އަންހެނުންނާއި ފަސް ފިރިހެނުން ކަމުގައެވެ. އަދި، އެ އެންމެންނަކީ ވެސް އުމުރުން 50 އަހަރުން މަތީގެ މީހުން ކަމުގައި ފުލުހުން ބުނެއެވެ.
މި ހަމަލާގައި ޒަޚަމުވެފައިވާ 10 މީހުންގެ ތެރެއިން ހަތް މީހަކަށް ހޮސްޕިޓަލުގައި އެޑްމިޓްކޮށްގެން ފަރުވާދެމުންދާ ކަމުގައި ވެސް ފުލުހުން ބުންޏެވެ. އަދި، މީގެ ތެރެއިން އެކަކުގެ ހާލަތު ސީރިޔަސްކަމަށް ޞިއްޙީ އޮފިޝަލުން ބުނެއެވެ. މި ހާދިސާ ހިނގާފައިވާ މޮންޓެރޭ ޕާކަކީ ޗައިނާ ދަރިކޮޅުގެ ގިނަ ޢަދަދެއްގެ ބަޔަކު ދިރިއުޅޭ ރަށެކެވެ. އެ ރަށުގެ އާބާދީގެ 65 އިންސައްތައަކީ ޗައިނާ ދަރިކޮޅުގެ މީހުންނެވެ.
ރައީސް ޖޯ ބައިޑަން ވަނީ މި ހަމަލާތައް އެންމެ ހަރުކަށި އިބާރާތުން ކުށްވެރި ކުރައްވާފައެވެ. އަދި، މި ހާދިސާގެ ތަހުޤީޤުގައި ލޮސް އެންޖެލެސްގެ ފުލުހުންނަށް އެހީތެރިވުމަށް އޭނާ ވަނީ ހޯމްލޭންޑް ސެކިޔުރިޓީ އޭޖެންސީއަށް އިރުޝާދު ދެއްވާފައެވެ. މޮންޓެރޭ ޕާކްގައި ދިން ހަމަލާއަކީ 2022 މޭ މަހަށް ފަހު އެމެރިކާގައި ހިނގާފައިވާ މި ފަދަ އެންމެ ނުރައްކާތެރި ހަމަލާއެވެ.
ޓެކްސަސްގެ އުވާލްޑޭގެ ސްކޫލެއްގައި 2022 މޭ މަހު ދިން މި ފަދަ ބަޑީގެ ހަމަލާތަކެއްގައި ދެ ޓީޗަރުންނާއި 19 ދަރިވަރުން މަރުވިއެވެ. ކެލިފޯނިޔާގައި މިހާތަނަށް ދީފައިވާ މި ފަދަ އެންމެ ނުރައްކާތެރި ހަމަލާ ދީފައި ވަނީ 1984 ވަނަ އަހަރުއެވެ. ސެން ޑިއޭގޯގައި ހުންނަ މެކްޑޮނަލްޑްސްގެ ރެސްޓޯރެންޓެއްގައި ތެރޭގައި ބަޑިޖަހައި ދިން ހަމަލާގައި 21 މީހުން މަރުވިއެވެ.