ޔަހޫދީންގެ ދަޢުލަތް އިސްރާޢީލުގެ ޖައްބާރު ސިފައިން ފަލަސްޠީނުގެ ހުޅަނގު އައްސޭރިއަށް އަރައި ހިންގި ލާއިންސާނީ އުދުވާންތަކެއްގައި މުސްލިމުންގެ ނުވަ މީހުން ޝަހީދުކޮށްލައިފިއެވެ. ޖިނީން ރެފިޔުޖީ ކޭމްޕަށް ވަދެ ޔަހޫދީންގެ ސިފައިން ހިންގި އުދުވާންތަކުގައި ޝަހީދުކޮށްލާފައިވާ މީހުންގެ ތެރޭގައި އުމުރުން ދުވަސްވީ އަންހެނެއް ވެސް ހިމެނެއެވެ.
ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ، ޔަހޫދީންގެ ސިފައިން ހޮސްޕިޓަލެއްގެ ކުޑަކުދިންގެ ވޯޑަށް ވެސް ވަދެ، އެ ތަނުގެ ތެރޭގައި ވެސް ހަމަނުޖެހުން ހިންގާފައިވާ ކަމުގައެވެ. އަދި، އެ ތަނުގައި ފަރުވާ ހޯދުމަށް ގިނަ ޢަދަދެއްގެ ކުޑަކުދިން ތިބި ވަގުތެއްގައި އެ ތަނުގެ ތެރެއަށް ކަރުނަ ގޭސް ޖަހާފައިވާ ކަމުގައެވެ. މި އުދުވާންތަކުގައި ގިނަ ޢަދަދެއްގެ ބަޔަކު ޒަޚަމުވެފައިވާ ކަމުގައި ވެސް އޮފިޝަލުން ބުންޏެވެ.
ފަލަސްޠީނުގެ ޞިއްޙަތާ ބެހޭ ވަޒީރު މާއީ އަލް-ކައިލާ ވިދާޅުވީ، ކުޑަކުދިންގެ ވޯޑަށް ޔަހޫދީންގެ ސިފައިން ވަދެފައި ވަނީ އެއްވެސް ސައްޙަ ސަބަބަކާ ނުލައި ކަމުގައެވެ. އަދި، އެ ތަނުގެ ތެރެއަށް ކަރުނަ ގޭސް ޖަހަން ޖެހުނު ސަބަބެއް ވެސް ވިސްނިވަޑައި ނުގަންނަވާ ކަމުގައި އޭނާ ވިދާޅުވިއެވެ. އަދި، މިއީ ގަސްދުގައި ހިންގާފައިވާ ލާއިންސާނީ އަމަލެއްގެ ގޮތުގައި އޭނާ ސިފަކުރެއްވިއެވެ.
މާއީ ވިދާޅުވީ، ޔަހޫދީންގެ ސިފައިންގެ ހަމަލާތަކުގައި ޒަޚަމުވެފައިވާ ފަލަސްޠީނުގެ މުސްލިމުންނަށް ޞިއްޙީ ފަރުވާ ދިނުމަށް ވެސް ސިފައިން ހުރަސްއަޅަމުންދާ ކަމުގައެވެ. އަދި، އެމްބިޔުލާންސްތަކަށް ވެސް ޖިނީން ރެފިޔުޖީ ކޭމްޕަށް ވަނުމަށް ހުރަސްއަޅަމުންދާ ކަމުގައި އޭނާ ވިދާޅުވިއެވެ. ކުޑަކުދިންގެ ވޯޑަށް ކަރުނަ ގޭސް ޖެހި މައްސަލައިގައި ޔަހޫދީންގެ އަސްކަރިއްޔާއާ ނޫސްވެރިން ސުވާލު ކުރުމުން، އެ ސުވާލަށް ޖަވާބުދޭން ޔަހޫދީންގެ ޖައްބާރު އަސްކަރިއްޔާއިން ވަނީ ދެކޮޅު ހަދާފައެވެ.
ޔަހޫދީންގެ ޖައްބާރު ސިފައިން އެއްވެސް ޖެހިލުމެއް ނެތި މި ފަދަ ލާއިންސާނީ އުދުވާންތައް ހިންގަމުންދާއިރު ބައިނަލްއަޤުވާމީ މުޖުތަމަޢު ހިމޭނުން އޮތުމުން ފަލަސްޠީނުގެ ރައީސް މަޙްމޫދު އައްބާސް ވެސް ވަނީ އެ ކަމާ ނުރުހުން ފާޅުކުރައްވާފައެވެ. އައްބާސްގެ ތަރުޖަމާނު ނާބިލް އަބޫ ރުދައިނާ ވިދާޅުވީ، މި ފަދަ އަމަލުތަކާ މެދު ބައިނަލްއަޤުވާމީ މުޖުތަމަޢުން އަޅައިނުލުމުގެ ސަބަބުން ޔަހޫދީންގެ ޖައްބާރު ސަރުކާރާއި ސިފައިންނަށް އިތުރު ހިތްވަރެއް ލިބެމުންދާ ކަމުގައެވެ.
ޖިނީން ރެފިޔުޖީ ކޭމްޕު ހަނގުރާމައިގެ މައިދާނަކަށް ޔަހޫދީންގެ ސިފައިން ބަދަލުކޮށްލާފައިވާ ކަމުގައި ޖިނީންގެ ގަވަރުނަރު ކަމާލް އަބޫ އަލް-ރޫބް ވިދާޅުވިއެވެ. ޖިނީންގައި ހިންގާފައިވާ އުދުވާންތަކާ އެކު، ޔަހޫދީންގެ ޖައްބާރު ސިފައިންގެ ލާއިންސާނީ އުދުވާންތަކުގައި ޝަހީދުކޮށްލާފައިވާ ފަލަސްޠީނު ރައްޔިތުންގެ ޢަދަދު މި ވަނީ 29 އަށް އަރާފައެވެ. މީގެ ތެރެއިން ގިނަ މީހުން ޝަހީދުކޮށްލާފައި ވަނީ އެ މީހުންގެ ގަޔަށް ބަޑިޖަހައިގެންނެވެ.
ޖިނީންއަށް އަރައި އުދުވާންތައް ހިންގުމުގެ އެއް ދުވަސް ކުރިން ޔަހޫދީންގެ ޖައްބާރު ސިފައިން ވަނީ ހުޅަނގު އައްސޭރީގެ ޤަލްޤިލްޔާއާއި ޤުދުޞްގެ ޝައުފަތް ރެފިޔުޖީ ކޭމްޕަށް އަރައި ފަލަސްޠީނުގެ އިތުރު ދެ މީހުން ޝަހީދުކޮށްލާފައެވެ. އެއީ 22 އަހަރުގެ ޒުވާނަކާއި 17 އަހަރުގެ ފިރިހެން ކުއްޖެކެވެ. އެ ކުއްޖާ ކޮށްފައިވާ ހަމައެކަނި ކުށަކީ ކުޅޭ ބަޑިއެއް ގެންގުޅުމެވެ. އެއީ، މި އަހަރުގެ ތެރޭގައި ޔަހޫދީން ޝަހީދުކޮށްލާފައިވާ ފަލަސްޠީނުގެ ފަސްވަނަ ކުޑަކުއްޖާއެވެ.
ހުސްވި 2022 ވަނަ އަހަރަކީ ވެސް، ޔަހޫދީންގެ ސިފައިންގެ ލޭއޮހޮރުވުންތައް ގިނަ އަހަރެކެވެ. ފަލަސްޠީނުގެ އެތަކެއް ސަތޭކަ ބަޔެއްގެ ލޭ ބިމަށް އޮހޮރުވައިލި އަހަރެކެވެ. އެ އަހަރުގެ ތެރޭގައި ޝަހީދުކޮށްލާފައިވާ ފަލަސްޠީނު ރައްޔިތުންގެ ޢަދަދު 200 އަށްވުރެ މައްޗަށް އަރައެވެ. މީގެ ތެރެއިން 150 އަށްވުރެ ގިނަ މީހުން ޝަހީދުކޮށްލާފައި ވަނީ ހުޅަނގު އައްސޭރީގައެވެ.