އަފްޣާނިސްތާނުގެ އަންހެނުންގެ ހައްޤުތައް ހިމާޔަތްކޮށްދޭން އ.ދ.އިން އަނެއްކާ ވެސް ގޮވައިލައިފިއެވެ. މި ކަމަށް ބާރުއެޅުމުގެ ގޮތުން އ.ދ.ގެ އިސްވެރިންތަކެއް ދާދިފަހުން ވަނީ އެ ޤައުމަށް ޒިޔާރަތްކޮށް، އެ ޤައުމުގައި ވެރިކަންކުރާ ތާލިބާނުންނާ ބައްދަލުކޮށް، މަޝްވަރާކޮށްފައެވެ. މި ކަމަށް ބާރުއެޅުމަށް އެ ޤައުމަށް ވަޑައިގެންނެވި އެއް ބޭފުޅަކީ އ.ދ.ގެ ސެކްރެޓަރީ ޖެނެރަލްގެ ނައިބު އައިމިނާ މުޙައްމަދެވެ.
އަފްޣާނިސްތާނުގެ އިންތިޚާބީ ސަރުކާރު ވައްޓައިލާ ތާލިބާނުން އެ ޤައުމުގެ ވެރިކަން ފޭރިގަނެފައިވަނީ 2021 ވަނަ އަހަރުގެ އޮގަސްޓު މަހުއެވެ. އެއަށްފަހު، ތާލިބާނުން ވަނީ އަންހެނުންގެ ހައްޤުތައް ހަނިކޮށް، ނިގުޅައިގަނެފައެވެ. އަދި، ބައެއް ހައްޤުތަކުން އަންހެނުން މަހުރޫމު ކުރުވާފައެވެ.
ތާލިބާނުންގެ ވެރިކަމުގެ ދަށުގައި އަންހެނުންނަށް މަތީ ސާނަވީ ތަޢުލީމު އުނގެނުމާއި، ޔުނިވަރސިޓީތަކުގައި ތަޢުލީމު ހާސިލު ކުރުމަށް ވަނީ ހުރަސްއަޅާފައެވެ. އަދި، މަދަނީ ޖަމުޢިއްޔާތަކުގައި މަސައްކަތް ކުރުން ވެސް ވަނީ މަނާކޮށްފައެވެ. އަފްޣާނިސްތާނުގައި ހަރަކާތްތެރިވާ ގިނަ ޖަމުޢިއްޔާތަކަކީ، އިންސާނީ އެހީ ފޯރުކޮށްދިނުމުގެ މަސައްކަތުގައި ހަރަކާތްތެރިވާ ޖަމުޢިއްޔާތަކެކެވެ. އެއާއެކު، އެހީ ފޯރުކޮށްދިނުމުގެ މަސައްކަތްތަކަށް ހުރަސް އެޅުނެވެ.
މުޙައްމަދު ވިދާޅުވީ، ތާލިބާނުންގެ ވެރިންނާ އެކު ބޭއްވެވި ބައްދަލުވުންތަކުގައި، އަންހެނުންގެ ހައްޤުތައް ހިމާޔަތްކޮށްދޭން އޭނާ ވަކާލާތު ކުރެއްވި ކަމުގައެވެ. އަދި، ބައެއް ބައްދަލުވުންތަކުގައި، އޭނާގެ ވާހަކަތަކަށް ތާލިބާނުން ނުރުހުން ފާޅުކޮށްފައިވާ ކަމުގައި ވެސް އޭނާ ވިދާޅުވިއެވެ. އޭނާ އެންމެ ބޮޑަށް ބާރުއަޅުއްވާފައި ވަނީ، އެހީދޭ ޖަމާޢަތްތަކުގައި އަންހެނުންނަށް ބައިވެރިވުމުގެ ފުރުޞަތު އަލުން ހޯދައިދިނުމަށެވެ.
އަފްޣާނިސްތާނަކީ، މި ވަގުތު އެންމެ ބޮޑު އިންސާނީ މުސީބާތް ކުރިމަތިވެފައިވާ ޤައުމު ކަމުގައި އެހީދޭ ޖަމުޢިއްޔާތަކުން ބުނެއެވެ. އެ ޤައުމުގެ 38 މިލިޔަން މީހުންގެ އާބާދީގެ ދެބައިކުޅަ އެއްބައި މީހުން ކާބޯތަކެއްޗަށް ޖެހިފައިވާ ކަމުގައި އެ ޖަމުޢިއްޔާތަކުން ބުނެއެވެ. އަދި، ހަތަރު މިލިޔަނަށްވުރެ ގިނަ ކުޑަކުދިންނަށް ފައިދާހުރި ކާނާ ނުލިބޭ ކަމުގައި ވެސް އެ ޖަމުޢިއްޔާތަކުން ބުނެއެވެ.
"ތާލިބާނުން އަދިވެސް ދިރިއުޅެމުން ދަނީ 13 ވަނަ ޤަރުނުގައި. އެ މީހުން 21 ވަނަ ޤަރުނަށް ގެނައުމަކީ ދިގު ދަތުރެއް. ބުރަ މަސައްކަތެއް. އެއީ، އެއް ދުވަހުން ވާނެ ކަމެއް ނޫން،" މުޙައްމަދު ވިދާޅުވިއެވެ. އަންހެނުންގެ ހައްޤުތައް ތާލިބާނުން ހަނިކޮށްފައި ވަނީ އެ މީހުން ރައްކާތެރިކުރުމުގެ ނަމުގައެވެ. ނަމަވެސް، އެއީ އަންހެނުން އަޅުވެތިކުރުން ކަމުގައި މުޙައްމަދު ވިދާޅުވިއެވެ.
އ.ދ.އާއި ބައިނަލްއަޤުވާމީ މުޖުތަމަޢުގެ ފިއްތުންތަކާ ގުޅިގެން ތާލިބާނުން ދާދިފަހުން ވަނީ ޞިއްޙީ ދާއިރާގައި މަސައްކަތް ކުރުމުގެ ފުރުޞަތު އެ ޤައުމުގެ އަންހެނުންނަށް އަލުން ހުޅުވައިލާފައެވެ. ނަމަވެސް، އެހީދޭ ޖަމާޢަތްތަކުގެ މަސައްކަތްތަކުގައި އަންހެނުންގެ ބައިވެރިވުން ނެތި، އެ މަސައްކަތްތައް އެންމެ ފުރިހަމައަށް ނުކުރެވޭނެ ކަމުގައި އެހީދޭ ޖަމުޢިއްޔާތަކުން ބުނެއެވެ.
މި ކަމަށް ބާރުއެޅުމުގެ ގޮތުން އ.ދ.ގެ ހިޔުމެނިޓޭރިއަން އެފެއާޒް އެންޑް އެމަޖެންސީ ރިލީފްގެ އަންޑަރ-ސެކްރެޓަރީ ޖެނެރަލް މާޓިން ގްރިފިތް ވެސް ވަނީ އެ ޤައުމަށް ޒިޔާރަތް ކުރައްވާފައެވެ. އޭނާ އެ ޤައުމަށް ވަޑައިގަންނަވާފައި ވަނީ އެހީދޭ މަދަނީ ޖަމުޢިއްޔާތަކުގެ އިސް މަންދޫބުންގެ މައްޗަށް އެކުލެވިގެންވާ ވަފުދަކާ އެކުގައެވެ.
ތާލިބާންގެ އިސްވެރިންނާ އެކު ބޭއްވި ބައްދަލުވުންތަކަށް ފަހު އޭނާ ވިދާޅުވީ، އިންސާނީ އެހީ ފޯރުކޮށްދިނުމުގެ ދާއިރާގައި އަންހެނުންނަށް މަސައްކަތް ކުރުމުގެ ފުރުޞަތު ހުޅުވައިލުމަށް ތާލިބާނުން މަސައްކަތް ކުރަމުންދާ ކަމުގެ ޔަގީންކަން އެ ފަރާތުން ދީފައިވާ ކަމުގައެވެ. އަދި، އެ ކަމާ ގުޅޭ ޤަވާޢިދުތައް ތައްޔާރުކުރަމުންދާ ކަމުގައި ތާލިބާނުން ބުނެފައިވާ ކަމުގައި ވެސް އޭނާ ވިދާޅުވިއެވެ.