ފަލަސްޠީނުގެ ބިންތަކަށް އަރައި ޔަހޫދީ ޓެރެރިސްޓު ސިފައިން ފަލަސްޠީނުގެ ނުވަ މީހުން ޝަހީދުކޮށްލި އުދުވާންތަކުގެ ބަދަލުހިފުމުގެ ގޮތުން ޔަހޫދީންގެ ފައްޅިއަކަށް ހަމަލާދީ ހަތް މީހުން މަރައިލައިފިއެވެ. ފަލަސްޠީނުގެ މިނިވަންކަމަށް ޖިހާދުކުރަމުންދާ މުޖާހިދެއް ހަމަލާދީފައި ވަނީ ޤުދުޞްގައި ހުންނަ ޔަހޫދީންގެ ފައްޅިއަކަށެވެ. ޔަހޫދީން ފަލަސްޠީނަށް އަރައި ހިންގަމުންދާ އުދުވާންތައް އިތުރުކުރުމާ ގުޅިގެން ހުޅަނގު އައްސޭރީގައި ހަމަނުޖެހުންތައް ވަނީ އިތުރުވެފައެވެ.
ބަޑީގެ ހަމަލާތައް އަމާޒުކޮށްފައިވާ ފައްޅި ހުންނަނީ، ޤުދުޞްގެ ޔަހޫދީން ވެރިވެގަނެ، ޔަހޫދީން ވަޒަންވެރިކުރުވާފައިވާ ސަރަޙައްދެއްގައެވެ. މި ހަމަލާތަކުގެ އެއް ދުވަސް ކުރިން ޔަހޫދީން ވަނީ ޣައްޒާއަށް ބޮންއަޅައި، ބޮޑެތި ގެއްލުންތަކެއް ދީފައެވެ. ފައްޅިއަށް ހަމަލާދިނުމަށް ފަހު ފިލަން މަސައްކަތް ކުރަން އުޅުމުގެ ތެރޭގައި ޔަހޫދީންގެ ޖައްބާރު ސިފައިން ވަނީ ފަލަސްޠީނުގެ މުޖާހިދު ޝަހީދުކޮށްލާފައެވެ. ޝަހީދުކޮށްލާފައި ވަނީ 21 އަހަރުގެ ޒުވާނެކެވެ.
ފައްޅިއަށް ދިން ހަމަލާގައި މަރުވި މީހުންގެ ތެރޭގައި 70 އަހަރުގެ އުމުރުން ދުވަސްވީ މީހަކާއި 14 އަހަރުގެ ކުއްޖެއް ވެސް ހިމެނޭ ކަމުގައި ޔަހޫދީން ބުނެއެވެ. މި ހަމަލާތަކާ ގުޅިގެން ފަލަސްޠީނުގެ ރައްޔިތުން ދަނީ އުފާފާޅުކުރަމުންނެވެ. އަދި، ހުޅަނގު އައްސޭރިއާއި ޣައްޒާގައި އުފާފާޅުކުރުމުގެ ގޮތުން ހިނގާލުންތައް ބާއްވާފައެވެ.
ފައްޅިއަށް ދިން ހަމަލާއާ ގުޅިގެން ޔަހޫދީ އިސްރާޢީލަށް ހިމާޔަތްދޭ އެމެރިކާއިން ވަނީ ކަންބޮޑުވުން ފާޅުކޮށްފައެވެ. އަދި ހަމަލާ ކުށްވެރިކޮށްފައެވެ. އެމެރިކާއިން ބުނީ، ޔަހޫދީ އިސްރާޢީލުގެ ސަލާމަތާއި ރައްކާތެރިކަން ކަށަވަރުކުރުމަށް އެމެރިކާއިން މަސައްކަތްކުރާނެ ކަމުގައެވެ. ހަމަލާދީފައިވާ ފައްޅި ހުންނަ ސަރަޙައްދަށް ޔަހޫދީންގެ ޖައްބާރު ބޮޑުވަޒީރު ބެންޖަމިން ނަތަންޔާހޫގެ އިތުރުން ޔަހޫދީ ހަރުކަށި ފިކުރަށް ތާޢީދުކުރާ ޤައުމީ ސަލާމަތާ ބެހޭ ވަޒީރު އިތަމާރް ބެން-ގުވީރު ވެސް ވަނީ ޒިޔާރަތް ކުރައްވާފައެވެ.
ޖިނީންއަށް އަރައި ޔަހޫދީ ސިފައިން ހިންގި އުދުވާންތަކުގައި ޝަހީދުކޮށްލާފައިވާ ފަލަސްޠީނުގެ ނުވަ މީހުންގެ ތެރޭގައި އުމުރުން ދުވަސްވީ އަންހެނެއް ވެސް ހިމެނެއެވެ. ޖިނީންގެ ހޮސްޕިޓަލުގެ ކުޑަކުދިންގެ ވޯޑަކަށް ވަދެ، އެ ތަނުގެ ތެރެއަށް ވެސް ޔަހޫދީ ޓެރެރިސްޓު ސިފައިން ވަނީ ކަރުނަގޭސް ޖަހާފައިވެއެވެ. މި ހަމަލާގައި ގިނަ ޢަދަދެއްގެ ކުޑަކުދިންނަށް އަނިޔާވިއެވެ.
ޖިނީންގައި ހިންގި އުދުވާންތަކުގެ ބަދަލުހިފުމުގެ ގޮތުން ފަލަސްޠީނުގެ މުޖާހިދުންގެ ޖަމާޢަތެއް ކަމުގައިވާ އިސްލާމިކް ޖިހާދުން ވަނީ އިސްރާޢީލަށް ރޮކެޓް ހަމަލާތަކެއް ވެސް ދީފައެވެ. ނަމަވެސް، އެ ހަމަލާތަކުގައި ޔަހޫދީންގެ އެއްވެސް މީހެއްގެ ފުރާނައަށް ނުރައްކާވެފައެއް ނުވެއެވެ. އަދި، އޭގެ ބަދަލު ހިފުމުގެ ގޮތުން ޔަހޫދީ އިސްރާޢީލުން ވަނީ ޣައްޒާއަށް ވަރުގަދަ މިސައިލް ހަމަލާތަކެއް ވެސް ދީފައެވެ.
ޔަހޫދީން ޖިނީންގައި ހިންގި ލާއިންސާނީ އުދުވާންތަކާ ގުޅިގެން ފަލަސްޠީނުގެ ސަރުކާރުން ވަނީ އިސްރާޢީލާ ދެމެދު އޮތް ބައެއް ގުޅުންތައް ކަނޑައިލަން ނިންމާފައެވެ. މީގެ ތެރޭގައި އިސްރާޢީލާ ގުޅިގެން ހުޅަނގު އައްސޭރީގެ އަމަން ބެލެހެއްޓުމަށް ނިމުމެއް ގެނައުން ހިމެނެއެވެ. މި ނިންމުމާ މެދު އެމެރިކާއިން ވަނީ ކަންބޮޑުވުން ފާޅުކޮށްފައެވެ.
ޔަހޫދީންގެ އުދުވާނުގައި ޝަހީދުކޮށްލާފައިވާ އެކަކަކީ 61 އަހަރުގެ އަންހެނެއް ކަމުގައިވާ މާޖިދާ އުބައިދެވެ. އޭނާ ޝަހީދުކޮށްލާފައި ވަނީ، އަމިއްލަ ގޭގެ ކުޑަދޮރުން ބޭރު ބަލައިލި ވަގުތު، އޭނާގެ ގަޔަށް ޔަހޫދީންގެ ޖައްބާރު ސިފައިން ބަޑިޖަހައިގެންނެވެ.
ޖިނީންގައި ހިންގާފައިވާ އުދުވާންތަކާ އެކު، ޔަހޫދީންގެ ޖައްބާރު ސިފައިންގެ ލާއިންސާނީ އުދުވާންތަކުގައި ޝަހީދުކޮށްލާފައިވާ ފަލަސްޠީނު ރައްޔިތުންގެ ޢަދަދު މި ވަނީ 30 އިން މައްޗަށް އަރާފައެވެ. މީގެ ތެރެއިން ގިނަ މީހުން ޝަހީދުކޮށްލާފައި ވަނީ އެ މީހުންގެ ގަޔަށް ބަޑިޖަހައިގެންނެވެ.
ހުސްވި 2022 ވަނަ އަހަރަކީ ވެސް، ޔަހޫދީންގެ ސިފައިންގެ ލޭއޮހޮރުވުންތައް ގިނަ އަހަރެކެވެ. ފަލަސްޠީނުގެ އެތަކެއް ސަތޭކަ ބަޔެއްގެ ލޭ ބިމަށް އޮހޮރުވައިލި އަހަރެކެވެ. އެ އަހަރުގެ ތެރޭގައި ޝަހީދުކޮށްލާފައިވާ ފަލަސްޠީނު ރައްޔިތުންގެ ޢަދަދު 200 އަށްވުރެ މައްޗަށް އަރައެވެ. މީގެ ތެރެއިން 150 އަށްވުރެ ގިނަ މީހުން ޝަހީދުކޮށްލާފައި ވަނީ ހުޅަނގު އައްސޭރީގައެވެ.