ރަޝިޔާ ސިފައިންގެ ކިބައިން ޔޫކްރެއިނު ދިފާޢުކުރުމަށް އެ ޤައުމުގެ ސިފައިން ކުރަމުންދާ ހަނގުރާމައަށް އަސްކަރީ ގޮތުން އެހީތެރިކަން ފޯރުކޮށްދިނުމަށް ނޭޓޯއިން ދެކުނު ކޮރެޔާއަށް ގޮވައިލައިފިއެވެ. ޔޫކްރެއިނަށް ހަތިޔާރު ފޯރުކޮށްދޭން ދެކުނު ކޮރެޔާއަށް ގޮވައިލައްވާފައި ވަނީ ނޭޓޯގެ ސެކްރެޓަރީ ޖެނެރަލް ޔެންސް ސްޓޮލްޓެންބަރގެވެ.
ދެކުނު ކޮރެޔާގެ ވެރިރަށް ސޯލްއަށް ކުރައްވަމުން ގެންދަވާ ދަތުރުފުޅެއްގައި ސްޓޮލްޓެންބަރގް ވަނީ އެ ޤައުމުގެ ރައީސް ޔޫން ސުކް-ޔޯލްއާ ބައްދަލުކުރައްވާފައެވެ. އަދި، ދެކުނު ކޮރެޔާއިން މިހާރު އަމަލުކުރަމުންދާ ސިޔާސަތުތަކަށް ބަދަލުގެނެސް، ޔޫކްރެއިނަށް ހަތިޔާރާއި އެހެނިހެން އަސްކަރީ އެހީ ފޯރުކޮށްދިނުމަށް އެދިވަޑައިގަންނަވާފައެވެ.
ދެކުނު ކޮރެޔާގެ ސިޔާސަތަކީ، ހަނގުރާމައެއް ހިނގަމުންދާ ޤައުމަކަށް، ނުވަތަ ހަނގުރާމައެއްގެ ބައިވެރިއަކަށް ހަތިޔާރާއި އަސްކަރީ އެހީތެރިކަން ފޯރުކޮށްނުދިނުމެވެ. ނަމަވެސް، ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފެށި ހިސާބުން ފެށިގެން ވެސް ދެކުނު ކޮރެޔާއިން ދަނީ ޔޫކްރެއިނަށް މާލީ ގޮތުންނާއި އިޤުތިޞާދީ ދާއިރާއިން އެހީތެރިކަން ފޯރުކޮށްދެމުންނެވެ. އަދި، ހާލުގައި ޖެހިފައިވާ މީހުންނަށް ބޭނުންވާ އިންސާނީ އެހީ ފޯރުކޮށްދެމުންނެވެ.
ސްޓޮލްޓެންބަރގް އިރުމަތީ އޭޝިޔާއަށް ކުރައްވަމުން ގެންދަވާ ދަތުރުފުޅުގެ ބޭނުމަކީ ޔޫކްރެއިނަށް އެ ސަރަޙައްދުގެ ޤައުމުތަކުގެ އެހީތެރިކަން ހޯއްދެވުމެވެ. އަދި، ނޭޓޯއާއި އެ ސަރަޙައްދުގެ ޤައުމުތަކާ ދެމެދު އޮތް ގުޅުން ބަދަހިކުރެއްވުމެވެ. މި ދަތުރުފުޅުގެ ތެރެއިން އޭނާ ޖަޕާނަށް ވެސް ވަޑައިގަތުމަށް ވަނީ ހަމަޖެހިފައެވެ.
ސްޓޮލްޓެންބަރގް ވިދާޅުވީ، ޔޫކްރެއިން ހަނގުރާމައަކީ އިރުމަތީ އޭޝިޔާ ސަރަޙައްދުގެ ސުލްޙައާއި ކުރިމަގަށް މުހިންމު ހަނގުރާމައެއް ކަމުގައެވެ. ރަޝިޔާއިން ހަނގުރާމަ ކާމިޔާބުކޮށް، ޔޫކްރެއިނަށް އަތްގަދަކޮށްފި ނަމަ، އެއީ އިރުމަތީ އޭޝިޔާ ސަރަޙައްދުގެ ޤައުމުތަކަށް ލިބޭނެ ފިލާވަޅެއްގެ ގޮތުގައި އޭނާ ސިފަކުރައްވައެވެ. އަދި، މިއީ ދުނިޔޭގެ ސުލްޙައަށް ވެސް މުހިންމު ހަނގުރާމައެއް ކަމުގައި އޭނާ ދެކެވަޑައިގަންނަވައެވެ.
އޭނާ އިޝާރާތްކުރައްވާފައި މި ވަނީ، ޗައިނާއިން ތައިވާނުގެ މައްޗަށް އަތްގަދަކުރަން ކުރަމުންދާ މަސައްކަތްތަކާއި، ޗައިނާގެ ސަބަބުން އެ ސަރަޙައްދުގެ ޤައުމުތަކަށް އޮތް ނުރައްކަލުގެ އިތުރުން، އުތުރު ކޮރެޔާގެ އަމަލުތަކުގެ ސަބަބުން އެ ސަރަޙައްދުގެ ސުލްޙައަށް އެޅިފައިވާ ހުރަސްތަކަށެވެ.
ދެކުނު ކޮރެޔާއާއި ޖަޕާނުން ޔޫކްރެއިނަށް އަސްކަރީ ގޮތުން އެހީތެރިކަން ފޯރުކޮށްނުދިން ނަމަވެސް، އުތުރު ކޮރެޔާއިން ދަނީ ވެގްނަރ ގުރޫޕުގެ ކުލީ ސިފައިންނަށް ރޮކެޓާއި މިސައިލް ފަދަ ހަތިޔާރު ފޯރުކޮށްދެމުންދާ ކަމުގައި އޭނާ ތުހުމަތު ކުރެއްވިއެވެ. ވެގްނަރ ގުރޫޕަކީ ރަޝިޔާ ސިފައިން ޔޫކްރެއިނަށް ފޮނުވާފައިވާ ކުލީ ސިފައިންގެ ގުރޫޕެކެވެ.
އެ ގުރޫޕަށް އުތުރު ކޮރެޔާއިން ހަތިޔާރު ފޯރުކޮށްދޭ ކަމަށް ވިދާޅުވެ ސްޓޮލްޓެންބަރގް ކުރެއްވި ތުހުމަތުތައް އެ ޤައުމުން ދޮގު ކުރެއެވެ. އަދި، ސްޓޮލްޓެންބަރގްގެ ދަތުރުފުޅާ އެކު، އިރުމަތީ އޭޝިޔާ ސަރަޙައްދުގެ ސުލްޙައަށް ހުރަސްއެޅި، ސަލާމަތަށް ނުރައްކާވެފައިވާ ކަމުގައި އުތުރު ކޮރެޔާއިން ބުންޏެވެ.
ނޭޓޯގެ ބާރުގަދަ ޤައުމުތަކުން މިހާރު ވެސް ދަނީ ޔޫކްރެއިނަށް ހަތިޔާރާއި އަސްކަރީ އެހީތެރިކަން ފޯރުކޮށްދެމުންނެވެ. މީގެ ތެރޭގައި އެންމެ ކުރީގައި އުޅެނީ އެމެރިކާއާއި، އިނގިރޭސިވިލާތާއި، ފަރަންސޭސިވިލާތާއި، ޖަރުމަނުވިލާތުގެ އިތުރުން ޕޮލެންޑެވެ. އެ ޤައުމުތަކުން ދަނީ ޔޫކްރެއިނަށް އެންމެ ފަހުގެ ޒަމާނީ ހަތިޔާރު ފޯރުކޮށްދެމުންނެވެ.
ހުސްވި ހަފުތާގައި އެމެރިކާއާއި އިނގިރޭސިވިލާތާއި ޖަރުމަނުވިލާތުން ވަނީ 321 ޒަމާނީ އަސްކަރީ ޓޭންކު ޔޫކްރެއިނަށް ފޯރުކޮށްދޭން ނިންމައި، އެ ކަން އިޢުލާނުކޮށްފައެވެ. އަދި އެ ތަކެތި ފޮނުވުމަށް ކުރަންޖެހޭ ތައްޔާރީތައް ކުރަން ފަށާފައެވެ. ނަމަވެސް، މިހާރު ޔޫކްރެއިނުން ދަނީ ހަތަރުވަނަ ޖެނެރޭޝަންގެ އެފް-16 މަރުކާގެ އަސްކަރީ މަތިންދާބޯޓު ވެސް ބޭނުންވާ ކަމަށް ބުނެ، އެ ފަދަ ހަތިޔާރު ހޯދަން ބާރުއަޅަމުންނެވެ.