ކޮވިޑް-19އާ ގުޅިގެން އެމެރިކާގައި އިޢުލާނުކޮށްފައިވާ ޢާންމު ޞިއްޙަތުގެ ކުއްލި ނުރައްކަލުގެ ހާލަތާއި ޤައުމީ ކުއްލި ނުރައްކަލުގެ ހާލަތު އުވައިލަން އެ ޤައުމުން ނިންމައިފިއެވެ. ވައިޓް ހައުސްއިން ބުނީ ކުއްލި ނުރައްކަލުގެ ހާލަތު މޭ މަހުގެ 11 ވަނަ ދުވަހު ނިމޭނެ ކަމުގައެވެ. ކޮވިޑާ ގުޅިގެން އެމެރިކާގައި ކުއްލި ނުރައްކަލުގެ ހާލަތު އިޢުލާނުކޮށްފައި ވަނީ 2020 ވަނަ އަހަރުގެ ޖަނަވަރީ މަހުއެވެ.
ކުއްލި ނުރައްކަލުގެ ހާލަތު އުވައިލުމާ އެކު އެމެރިކާގެ ޞިއްޙީ ނިޒާމަށް ބޮޑެތި ބަދަލުތަކެއް އަންނާނެއެވެ. މީގެ ތެރޭގައި ކޮވިޑާ ގުޅިގެން ބޭހަށް ދެމުންދިޔަ ސަބްސިޑީއާއި، އިންޝިއުރެންސްއާއި، އެހީތަކަށް ނިމުމެއް އަންނާނެއެވެ. ކޮވިޑާ ގުޅިގެން ޢާންމުންނަށް ދެމުންދިޔަ އެހީތަކަމަށް ކޮންގްރެސްއިން ހުރަސްއެޅުމާ ގުޅިގެން އެހީ ދިނުން މިހާރު ވެސް އޮތީ ހުއްޓައިލާފައެވެ.
ކުއްލި ނުރައްކަލުގެ ހާލަތު މޭ މަހުގެ ތެރޭގައި ނިމޭނެކަމަށް ވައިޓް ހައުސްއިން އިޢުލާނުކޮށްފައިވީ ނަމަވެސް، ހައުސް އޮފް ރެޕްރެޒެންޓެޓިވްސްއިން މަސައްކަތް ކުރަމުން ދަނީ އެ ކަން އަވަސްކުރުވުމަށެވެ. ހައުސްގެ ބާރު މިހާރު އޮތީ ސަރުކާރާ ދެކޮޅު ރިޕަބްލިކަން ޕާޓީގެ އަތުގައެވެ. ޤައުމީ ކުއްލި ނުރައްކަލުގެ ހާލަތު މާރިޗު 1 ވަނަ ދުވަހު ނިމުމަކަށް ގެނެސް، ޢާންމު ޞިއްޙަތުގެ ކުއްލި ނުރައްކަލުގެ ހާލަތު އޭޕްރިލް 1 ވަނަ ދުވަހު އުވައިލަން ހުށަހެޅުމަށް އެ ޕާޓީން ދަނީ މަސައްކަތް ކުރަމުންނެވެ.
ނަމަވެސް، މި ފަދަ ކުއްލި ގޮތަކަށް އެ ހާލަތްތަކަށް ނިމުމެއް ގެނައުމުގެ ސަބަބުން ޞިއްޙީ ނިޒާމަށް އަސަރުކޮށް، ޞިއްޙީ ދާއިރާ ހިންގުމަށް ބޮޑެތި ގޮންޖެހުންތަކެއް ކުރިމަތިވާނެ ކަމަށް ވައިޓް ހައުސްއިން ބުނެއެވެ. އަދި، ޞިއްޙީ ދާއިރާއަށް އޮތް ޢާންމުންގެ އިތުބާރު ގެއްލޭނެ ކަމަށް ވެސް ވައިޓް ހައުސްއިން ބުނެއެވެ.
"ކުއްލި ނިންމުންތަކެއް ނިންމައިފިނަމަ، ހޮސްޕިޓަލްތަކާއި އުމުރުން ދުވަސްވީ މީހުން ބަލަހައްޓާ މަރުކަޒުތަކަށް ބޮޑެތި ނޭދެވޭ އަސަރުތަކެއް ކުރާނެ. އަދި، މުވައްޒަފުން ދޫކޮށްލަން ޖެހި، އެ ތަންތަން ހިންގުމަށް ހުރަސްއެޅޭނެ،" ވައިޓް ހައުސްގެ ބަޔާނެއްގައި ބުނެފައިވެއެވެ.
އަދި، ހާލަތްތައް އުވައިލުމުގެ 60 ދުވަސްކުރިން އެ ކަން އިޢުލާނުކުރީ، ސަރުކާރާއި ޞިއްޙީ ޚިދުމަތްދޭ ފަރާތްތަކަށް ތައްޔާރުވުމުގެ ފުރުޞަތު ދިނުމަށް ކަމުގައި ވެސް ވައިޓް ހައުސްއިން ބުންޏެވެ. މި ފަދަ ނިންމުމެއް ނިންމާއިރު، "ޓައިޓްލް 42" ސިޔާސަތަށް ވެސް ރިއާޔަތްކުރަން ޖެހޭނެ ކަމުގައި ވައިޓް ހައުސްއިން ގަބޫލުކުރެއެވެ.
ޓައިޓްލް 42 އަކީ ޤަވާޢިދާ ޚިލާފަށް އެމެރިކާއަށް ހިޖުރަކުރާ މެކްސިކޯގެ ރައްޔިތުން ހުއްޓުވުމަށް އެކުލަވައިލާފައިވާ ސިޔާސަތެކެވެ. އަދި، އެ ސިޔާސަތު ބަރޯސާވެފައި ވަނީ ޢާންމު ޞިއްޙަތުގެ ކުއްލި ނުރައްކަލުގެ ހާލަތުގެ މައްޗަށެވެ. ކުއްލި ނުއްކަލުގެ ހާލަތު އުވައިލުމާ އެކު، ޤަވާޢިދާ ޚިލާފަށް އެ ޤައުމަށް އެތެރެވާ މެކްސިކޯ ރައްޔިތުންގެ ޢަދަދު އިތުރުވެގެންދާނެ ކަމަށް ބެލެވޭ ކަމުގައި ވެސް ވައިޓް ހައުސްއިން ބުނެއެވެ.
ކޮވިޑް ފެތުރެން ފެށި ހިސާބުން ފެށިގެން އެމެރިކާގެ 104.1 މިލިޔަން މީހުންނަށް ވަނީ އެ ބަލި ޖެހިފައެވެ. އަދި، އެ ޤައުމުގައި މި ބަލީގައި މަރުވި މީހުންގެ ޢަދަދު 1.1 މިލިޔަނަށް އަރައެވެ. އެ ޤައުމުގައި މިހާރު ވެސް ބަލި ޖެހިފައި ތިބި މީހުންގެ ޢަދަދު 1.7 މިލިޔަނަށް އަރައެވެ.