ދެ މިނިސްޓްރީގެ ޚިދުމަތް މާދަމާއިން ފެށިގެން ލިބެމުންދާނީ ހުޅުމާލޭގައި އަލަށް ހުޅުވީ ސަރުކާރުގެ އޮފީސް އިމާރާތުންނެވެ.
އެއޮފީސް އިމާރާތަށް ބަދަލުކޮށްފައިވަނީ މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނާއި މިނިސްޓްރީ އޮފް ޖެންޑަރ ފެމިލީ އެންޑް ސޯޝަލް ސަރވިސްގެ ޚިދުމަތްތަކެވެ. ޖެންޑަރ މިނިސްޓްރީގެ ޚިދުމަތްތައް މިނިމުނު ހަފްތާގެ ތެރޭގައި މިއިމާރާތަށް ބަދަލުކޮށްފައިވާއިރު ޓްރާންސްޕޯޓް މިނިސްޓްރީގެ ޚިދުމަތްތައް މާދަމާއިން ފެށިގެން ލިބޭނީ މިއިމާރާތުންނެވެ. އަދި ދެން އެތަނަށް ބަދަލުކުރާ މިނިސްޓްރީ އޮފް ހަޔަރ އެޑިއުކޭޝަންގެ ޚިދުމަތްތައް ލިބެންފަށާނީ އަންނަ މަރޗް މަހުގެ ފުރަތަމަ ދުވަހުން ފެށިގެންނެވެ.
މިއާއެކު މިމިނިސްޓްރީތަކުގެ ކައުންޓަރުތަކުން ފޯރުކޮށްދޭ ޚިދުމަތްތައް ދިނުމަށް ހަމަޖެހިފައިވަނީ "އުމަރު ޒާހިރު އޮފީސް އިމާރާތުގެ" ގްރައުންޑް ފްލޯގައި ޤާއިމްކޮށްފައިވާ އެމިނިސްޓްރީތަކުގެ ކައުންޓަރުތަކުންނެވެ. މިމިނިސްޓްރީތަކުގެ ތެރެއިން ޖެންޑަރ މިނިސްޓްރީ ހިންގާނީ 2 ވަނަ ފަންގިފިލާގައެވެ. 3 ވަނަ ފަންގިފިލާގައި މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން ހިންގާއިރު ހަޔަރަ އެޑިއުކޭޝަން މިނިސްޓްރީ ހިންގާނީ 5 ވަނަ ފަންގިފިލާގައެވެ.
މި ތިން މިނިސްޓްރީވެސް މީގެ ކުރިން ހިންގަމުން އައީ ސަރުކާރުން ބޮޑު ކުލި ދައްކާ ތަންތަނުގައެވެ.
ހުޅުމާލޭގައި ސަރުކާރުގެ އޮފީސް ޢިމާރާތެއް ތަރައްގީކުރުމަށް މި ސަރުކާރުން ނިންމެވީ ސަރުކާރުގެ ގިނަ އޮފީސްތަކެއް ހިންގުމަށްޓަކައި، ބޮޑު ހޭދައެއްކޮށްގެން އަމިއްލަ މީހުންގެ ޢިމާރާތްތައް ވަކި މުއްދަތެއްނެތި ކުއްޔަށް ހިފައިގެން ހިންގަންޖެހޭތީ، އެކަމަށް ހައްލެއް ގެނައުމަށްޓަކައެވެ. 6 ފަންގިފިލާއަށް ޢިމާރާތްކޮށްފައިވާ މިއޮފީސް ޢިމާރާތުގެ މަސައްކަތް ކޮށްފައިވަނީ ޗައިނާގެ ހުނާން އިންޖިނިއަރިން ކޯޕަރޭޝަން ލިމިޓެޑުންނެވެ. މިމަސައްކަތް ކުރުމަށް އެ ކުންފުންޏާ ހަވާލުކުރީ 2020 ވަނަ އަހަރުއެވެ. ނަމަވެސް ކޯވިޑާއި ގުޅިގެން މަސައްކަތް ނުނިމި ލަސްވެގެންގޮސް އިމާރާތުގެ މަސައްކަތް ނިންމާލީ މިދިޔަ އަހަރުގެ ނޮވެމްބަރު މަހުގައެވެ. އަދި މިމަހުގެ 15 ވަނަ ދުވަހު ވަނީ އެ އޮފީސް އިމާރާތް ހުޅުވާފައެވެ.
ހުޅުމާލޭ ފުރަތަމަ ފިޔަވަހީގެ ޓްރީޓޮޕް ހޮސްޕިޓަލް ކައިރީގައި ތަރައްޤީކޮށްފައިވާ މިއޮފީސް ޢިމާރާތުގެ ގްރައުންޑް ފްލޯރ އަދި ފުރަތަމަ ފަންގިފިލާ ޚާއްސަކޮށްފައި ވަނީ ޕާކިންގއަށް ބޭނުންކުރުމަށެވެ. އިމާރާތައް ބަދަލުކުރާ އޮފީސްތައް ހިންގާނީ 2 ވަނަ ފަންގިފިލާއިން ފެށިގެން 5 ވަނަ ފަންގިފިލާއާއި ހަމައަށެވެ. އަދި އިމާރާތުގެ އެންމެ މަތި 6 ވަނަ ފަންގިފިލާ ޚާއްސަކޮށްފައިވަނީ މީޓިން ރޫމްތަކާއި، ސެމިނާ ރޫމެއްގެ އިތުރުން ޓެރަހަށެވެ.