4 ރަށެއްގެ ކުނި މެނޭޖްކުރާ މަރުކަޒުގެ މަސައްކަތް ބަޔަކާ ޙަވާލުކޮށްފިއެވެ.
މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީގެ ފަރާތުން މި މަސައްކަތް ޙަވާލުކޮށްފައިވަނީ ވެހިކަން ބިލްޑާސް ނަމަކަށްކިޔާ ކުންފުންޏަކާއެވެ. އެ ކުންފުންޏާއި މަސައްކަތް ޙަވާލުކުރި 4 ރަށަކީ ދ. މާއެނބޫދޫ، ތ. ތިމަރަފުށީ، ތ. ގުރައިދޫ އަދި ފ. ނިލަންދޫއެވެ. މި މަޝްރޫޢުގެ ތެރޭގައި ހިމެނެނީ ދ. މާއެނބޫދޫ, ތ. ތިމަރަފުށި އަދި ތ. ގުރައިދޫ ކުނި މެނޭޖްކުރާ މަރުކަޒު ހެދުމާއި، ފ. ނިލަންދޫ ކުނި މެނޭޖްކުރާ މަރުކަޒު އަޕްގްރޭޑްކުރުމެވެ.
އެންވަޔަރަމަންޓް މިނިސްޓްރީގައި ބޭއްވި ރަސްމިއްޔާތެއްގައި މި މަޝްރޫޢު ޙަވާލުކުރުމުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ޑެޕިއުޓީ މިނިސްޓަރު މުހައްމަދު އަންސާރެވެ. ވެހިކަން ބިލްޑާސްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރ އަހުމަދު ރަޝީދެވެ.
މިއަދު ހަވާލުކުރެވުނު މި 4 ރަށުގެ ކުނި މެނޭޖްކުރާ މަރުކަޒުގެ މަސައްކަތަށް ޖުމްލަ 17.8 މިލިއަން ރުފިޔާ ޚަރަދުވާނެކަމަށް އެންވަޔަރަމަންޓް މިނިސްޓްރީއިން ވިދާޅުވެއެވެ. އެގޮތުން ދ. މާއެނބޫދޫ ސެންޓަރުގެ މަސައްކަތަށް 4.3 މިލިއަން ރުފިޔާ، ތ. ތިމަރަފުށީ ސެންޓަރުގެ މަސައްކަތަށް 5 މިލިއަން ރުފިޔާ، އަދި ތ. ގުރައިދޫގައި ޤާއިމުކުރާ ކުނި މެނޭޖްކުރާ މަަރުކަޒަށް 4.4 މިލިއަން ރުފިޔާ ޚަރަދުވާނެކަމަށް އެ މިނިސްޓްރީއިން ވިދާޅުވެއެވެ.
މީގެ އިތުރުން ފ. ނިލަންދޫ ވޭސްޓް އެންޑް ރިސޯސް މެނޭޖްމަންޓް ސެންޓަރު އަޕްގްރޭޑްކުރުމުގެ މަސައްކަތަށް 4.1 މިލިއަން ރުފިޔާ ޚަރަދުވާނެކަމަށްވެސް އެމިނިސްޓްރީއިން ވިދާޅުވެއެވެ. މި 4 މަޝްރޫއު ނިންމާލެވޭނެ ކަމަށް ބެލެވެނީ މަސައްކަތް ފަށާ ތާރީޚުން ފެށިގެން ގާތްގަނޑަކަށް 180 ދުވަސް ތެރޭގައިކަމަށް އެންވަޔަރަމަންޓް މިނިސްޓްރީއިން ވިދާޅުވެއެވެ.
އެންވަޔަރުމަންޓް މިނިސްޓްރީއިން ވިދާޅުވީ، މި މަޝްރޫޢު ނިމުމުން މި 4 ރަށުގައިވެސް ރަށު ފެންވަރުގައި ކުނި މެނޭޖްކުރާ މަރުކަޒުން (ޑަބްލިއުއާރްއެމްސީ) ކުނި ވަކިކޮށް، އަލުން ބޭނުން ހިފޭ ކުނި ރައްކާކޮށް، އަދި ނައްތާ ނުލެވޭ ޒާތުގެ ކުނި ސަރަހައްދީ ކުނި މެނޭޖްކުރާ މަރުކަޒަށް ގެންދިއުމަށް މަގުފަހި ވެގެންދާނެ ކަމަށެވެ. އަދި މި 4 ރަށުގައި ގާއިމުކުރާ ނިޒާމާއެކު ރަށުގައި ކުނި އެންދުމާއި، ޖަމާވުން ހުއްޓުމަކަށް ގެނެވޭނެ ކަމަށް އެންވަޔަރުމަންޓް މިނިސްޓްރީން ވިދާޅުވެއެވެ. ހަމައެހެންމެ ރަށު ފެންވަރުގައި އެފަދަ މަރުކަޒެއް ޤާއިމުވުން ވެގެންދާނީ ޞިއްޙަތަށާއި ތިމާވެއްޓަށް ލިބިދޭ ފައިދާގެ އިތުރުން އިޤްތިޞާދަށްވެސް ލިބޭ ވަރަށް ބޮޑު ކުރިއެރުމެއްކަމަށްވެސް އެ މިނިސްޓްރީއިން ވިދާޅުވެއެވެ.
މި މަޝްރޫޢުގެ ތެރެއިން ޤާއިމުކުރާ ކުނި މެނޭޖްކުރާ މަރުކަޒުތަކަކީ ޒަމާނީ ފެންވަރަށް ތައްޔާރުކުރެވޭ މަރުކަޒުތަކެކެވެ. އެގޮތުން އަލަށް ޑިޒައިން ކުރެވިފައިވާ މި މަރުކަޒުތައް ޖާގައިގެ ގޮތުން ތަަނަވަސް ވެފައި މި މަރުކަޒުތައް ހިންގުމަށް ބޭނުންވާ އޮފީހެއްގެ އިތުރަށް، ފާޚާނާ، ސްޓޯރޭޖް، ކުނި ބައިބަޔަށް ވަކިކޮށްފައި ބަހައްޓާނެ ޖާގަ އަދި ނުރައްކާތެރި ކުނި ބެހެއްޓުމަށް ޚާއްސަ ޖާގައެއްވެސް ހިމެނެއެވެ. އަދި މި މަރުކަޒުތަކަށް ގެނެވޭ ކުނީގެ ބަރުދަން ބެލުމަށް ވެއިން ސްކޭލްވެސް ބެހެއްޓިފައިވާނެއެވެ.
މި 4 މަޝްރޫޢު ކުރިއަށް ގެންދަނީ މިނިސްޓްރީ އޮފް އެންވަޔަރަންމަންޓް ކްލައިމެޓް ޗޭންޖް އެންޑް ޓެކްނޯލޮޖީ އިން ޒޯން 4 އަދި 5 ގައި ތަންފީޒު ކުރަމުންދާ މޯލްޑިވްސް ކްލީން އެންވަޔަރަންމަޓް ޕްރޮޖެކްޓް މެދުވެރިކޮށް ވޯލްޑް ބޭންކުގެ ހިލޭ އެހީގެ ދަށުންކަމަށް އެންވަޔަރަމަންޓް މިނިސްޓްރީއިން ވިދާޅުވެއެވެ.