ކްރޮސް ސަބްސިޑީ އުޞޫލުން ދާލު އެއަރޕޯޓާއި ޅ. މަޑިވަރު އެއަރޕޯޓް އިންޓަރނޭޝަނަލް ފެންވަރަށް ތަރައްޤީކުރުމަށް ފައިނޭންސް ހޯދަން ހުޅުވާލައިފިއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ނެރުއްވި ޤަރާރެއްގެ ދަށުން ވަނީ ކްރޮސް ސަބްސިޑީ އުޞޫލުން ރާއްޖޭގެ 6 ސަރަޙައްދެއްގައި ތަރައްޤީކުރާ އެއަރޕޯޓްތަކާއި، މިހާރު ހުރި ބައެއް އެއަރޕޯޓްތައް އިންޓަރނޭޝަނަލް ފެންވަރަށް ތަރައްޤީކުރެއްވުމަށްޓަކައި އެކަމަށް ބޭނުންވާ ފައިސާ ހޯދަން ހުޅުވާލައްވާފައެވެ.
ކްރޮސް ސަބްސިޑީގެ ދަށުން ސަރުކާރުން ކުރިއަށް ގެންދަވާ މަޝްރޫޢުތަކަކީ ދައުލަތުގެ އާންމު މަންފާއަކަށްޓަކައި ނުވަތަ އިޤްތިޞާދީ ސިޔާސަތެއްގެ ދަށުން ހިންގަވާ މަޝްރޫޢުތަކެކެވެ. މި ޤަރާރުގައި ވާގޮތުން ދާލު އެއަރޕޯޓާއި ޅ. މަޑިވަރު އެއަރޕޯޓް އިންޓަރނޭޝަނަލް ފެންވަރަށް ތަރައްޤީ ކުރެއްވުމަށްޓަކައި ފައިނޭންސް ކުރެވޭ އެންމެ ކުޑަ އަގަކީ 5 މިލިއަން ޑޮލަރު ނުވަތަ 77 މިލިއަން ރުފިޔާއެވެ.
މި ދެ އެއަރޕޯޓުގެ އިތުރަށް އިތުރު އެއަރޕޯޓްތައްވެސް ކްރޮސް ސަބްސިޑީގެ އުޞޫލުން ތަރައްޤީކުރައްވަން މީގެ ކުރިންވެސް ރައީސްގެ ގަރާރަކުން ވަނީ ކަނޑައަޅުއްވާފައެވެ. އޭގެ ތެރޭގައި ހދ. މަކުނުދޫ، ށ. ބިލެތްފަހި، ބ. ތުޅާދޫ، ފ. މަގޫދޫ، ތ. ވިލުފުށީ އަދި ރ. އަތޮޅު ދެކުނު ބިތުގައި ސަރުކާރުން ތަރައްޤީކުރައްވާ އެއަރޕޯޓް ހިމެނެވެ.
މީގެ އިތުރުން ކައްދޫ އެއާޕޯޓާއި، މަޑިވަރު އެއާޕޯޓު ބައިނަލްއަޤްވާމީ ފެންވަރަށް ތަރައްޤީކުރެއްވުމާއި، މާފަރު ބައިނަލްއަޤްވާމީ އެއަރޕޯޓުގެ ދެވަނަ ފިޔަވަހީގެ މަސައްކަތްވެސް ހިމެނެއެވެ. ކްރޮސް ސަބްސިޑީގެ އުޞޫލުން ގިރާވަރުފަޅު ހިއްކައިގެން ރެޒިޑެންޝަލް ސިޓީއެއް ތަރައްޤީކުރައްވަންވެސް ފައިނޭންސް ހޯދުމަށް ވަނީ ހުޅުވާލާފައެވެ.
ސަރުކާރުން އަންނަނީ ރާއްޖޭގެ އެކި ސަރަޙައްދުތަކުގައި އެއަރޕޯޓްތައް ތަރައްޤީކުރެއްވުމުގެ މަސައްކަތް ކުރައްވަމުންނެވެ. މިގޮތުން މިވަގުތު ޑޮމެސްޓިކް 3 އެއަރޕޯޓެއް ތަރައްޤީކުރެއްވުމުގެ މަސައްކަތް އަންނަނީ ކުރައްވަމުންނެވެ. އެއީ އަލިފުށި އެއަރޕޯޓާއި، މީމު އެއަރޕޯޓާއި، މަގޫދޫ އެއަރޕޯޓްގެ މަސައްކަތެވެ.
މީގެ އިތުރަށް ގަން އިންޓަރނޭޝަނަލް އެއަރޕޯޓާއި، ހަނިމާދޫ އިންޓަރނޭޝަނަލް އެއަރޕޯޓް ޒަމާނީ ފެންވަރަށް ތަރައްޤީކުރެއްވުމުގެ މަސައްކަތްވެސް ސަރުކާރުން އަންނަނީ ކުރައްވަމުންނެވެ.