ކުއްލި ޙާލަތްތަކުގައި ފަރުވާދޭނެ ބައެއް އާލާތްތައް ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާމް، ޔޫ.އެން.ޑީ.ޕީން ދިވެހިރާއްޖެއަށް ހަދިޔާކޮށްފިއެވެ.
ކުއްލި ޙާލަތްތަކުގައި ބޭނުންކުރާނެ ސާމާނު ޔޫ.އެން.ޑީ.ޕީން ހަދިޔާކޮށްފައި މިވަނީ ޗައިނާ -ޔޫއެންޑީޕީ ޓްރޭންގިއުލަ ކޯޕަރޭޝަން ރެސްޕޯންސް ޓު ކޯވިޑް-19 އިން ދަ އޭޝިއާ އެންޑް ޕެސިފިކް ރީޖަން ޕްރޮގްރާމްގެ ދަށުންނެވެ. މިއީ ރާއްޖޭގެ ޞިއްޙީ ނިޒާމު އިތުރަށް ވަރުގަދަކޮށް ކޯވިޑް ޕޭޝަންޓުންނަށްވެސް ޞިއްޙީ ފަރުވާދިނުމުގެ ކެޕޭސިޓީ އިތުރުކުރެވިގެންދާނެ ކަމެއްކަމަށް ޔޫއެންޑީޕީން ބުނެއެވެ.
މި ޕްރޮގްރާމްގެ ދަށުން ރާއްޖެއަށް ހަދިޔާކޮށްފައިވަނީ 4000 އަށް ވުރެ ގިނަ އަންގިއާއި، 16 އޮޓޮމޭޓެޑް އެކްސްޓަރނަލް ޑެފިބްރިލޭޓާސްއާއި، 10 ނިއޮނޭޓަލް ވެންޓިލޭޓަރެވެ.
ޔޫއެންޑިޕީން ހަދިޔާކުރި މި ތަކެއްޗަކީ ކޯވިޑް ޖެހޭ މީހުންނަށް ފަރުވާ ދިނުމުގައި އާއި އެހެނިހެން ކުއްލި ޙާލަތްތަކުގައިވެސް ފަރުވާދިނުމަށް އެހީވެތެރިވެދޭނެ ތަކެއްޗެވެ.
މިތަކެތީގެ ތެރެއިން ޕިޕީއީތަކާއި ކުއްލި ޙާލަތްތަކުގައި ފަރުވާދިނުމަށް ބެނުންކުރާ އެހެނިހެން ސާމާނުތައް ބެހުމަށް ހަމަޖެހިފައިވަނީ އަތޮޅުތަކުގެ ހޮސްޕިޓަލްތަކުގައި ފްރަންޓްލައިންގައި މަސައްކަތްކުރާ ޞިއްޙީ ޚިދުމަތްތެރިންނަށެވެ. އަދި ނިއޮނޭޓަލް ވެންޓިލޭޓަރުތައް 10 އަތޮޅުގެ ހޮސްޕިޓަލްތަކަށް ފޮނުވުމަށް ވަނީ ހަމަޖެހިފައެވެ.
ވެންޓިލޭޓަރުތައް ފޯރުކޮށްދޭ ހޮސްޕިޓަލްތައް:
• ހއ. އަތޮޅު ހޮސްޕިޓަލް
• ށ. އަތޮޅު ހޮސްޕިޓަލް
• ނ. އަތޮޅު ހޮސްޕިޓަލް
• ބ. އަތޮޅު ހޮސްޕިޓަލް
• ޅ. އަތޮޅު ހޮސްޕިޓަލް
• މ. އަތޮޅު ރީޖަނަލް ހޮސްޕިޓަލް
• ދ. އަތޮޅު ހޮސްޕިޓަލް
• ތ. އަތޮޅު ހޮސްޕިޓަލް
• ގއ. އަތޮޅު ހޮސްޕިޓަލް
• ފުވައްމުލަކު ހޮސްޕިޓަލް
ކުއްލި ޙާލަތްތަކުގައި ފަރުވާދިނުމަށް ބެނުންކުރާ ސާމާނު ހެލްތް މިނިސްޓްރީއަށް ޙަވާލުކުރުމަށް ބޭއްވި ރަސްމިއްޔާތުގައި މިނިސްޓަރ އޮފް ހެލްތް އަޙްމަދު ނަޞީމް ވިދާޅުވީ، މިތަކެއްޗާއެކު އަތޮޅުތަކުގެ ހޮސްޕިޓަލްތަކުގެ ކުރީ ސަފުގައި މަސައްކަތްކުރާ ހެލްތު ޕްރޮފެޝަނަލުންނަށް މަސައްކަތްކުރުމުގައި ބޮޑެތި ލުއިފަސޭހަތަކެއް ލިބިގެންދާނެކަމަށެވެ.
މިނިސްޓަރ ނަޞީމް ވަނީ ރާއްޖެއަކީ ޞިއްޙީ ދާއިރާއަށް މުހިއްމު ބޭހާއި އާލާތްތައް ބޭނުންވާ ޤައުމެއްކަން ފާހަގަކުރައްވާ ޤައުމުތަކުން ރާއްޖޭގެ ޞީއްޙީ ދާއިރައަށް ވަމުން އަންނަ އެހީތައް ފާހަގަކުރައްވާ ޝުކުރު އަދާކުރައްވާފައެވެ.
"ވަރަށް ހިތްހަމަޖެހޭ މި ތަކެތީގެ ތެރެއިން ބައެއް ތަކެތި އަތޮޅުތެރޭގެ 10 ހޮސްޕިޓަލަކަށް ފޮނުވަން ޖެހުން. މީގެ ތެރޭގައި ހއ. ހޮސްޕިޓަލުން ފެށިގެން ޏ.ހޮސްޕިޓަލާ ހަމައަށް މި ތަކެތި ފޮނުވުމަށް ހަމަޖެހިފައިވޭ" ހެލްތު މިނިސްޓަރ ނަޞީމް ވިދާޅުވިއެވެ.
މި ރަސްމިއްޔާތުގައި ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވޭންގް ލިޒިން ވިދާޅުވީ ދިވެހި ރާއްޖޭގެ ސިއްޙީ ދާއިރާއަށް އެހީތެރިވެދީ އެ ދާއިރައަށް ކުރިއެރުން ގެނެސްދިނުމަށްޓަކައި ޗައިނާ ސަރުކާރުން އަބަދުވެސް އޮންނާނެކަމަށެވެ.
ސަފީރު ވަނީ ރާއްޖެއާއި ޗައިނާއަށް ދެމެދު އުފެދިފައިވާ ގާތްގުޅުމުގެ ސަބަބުން ކޯވިޑްގެ ބަލިމަޑުކަމުން ސަލާމަތް ވުމަށް ދެ ޤައުމު އެކުގައި މަސައްކަތް ކުރައްވާ އެހީތެރިކަން ފޯރުކޮށްދީފައިވާކަންވެސް ފާހަގަކުރައްވާފައެވެ.
"ޗައިނާއިން ރާއްޖޭގެ ޞިއްޙީ ދާއިރާއަށް އެހީތެރިވުމަށްޓަކައި ވަނީ ގިނަ މަސައްކަތްތަކެއް ކުރެވިފައި. ދާދިފަހުން ދެ ޤައުމުގެ ކަމާ ބެހޭ ފަރާތްތަކުން ވަނީ ރާއްޖޭގެ 4 ސަރަޙައްދެއްގައި އަޅާ ހޮސްޕިޓަލްތަކާ ގުޅޭގޮތުން މަޝްވަރާކޮށްފައި. ކުރިއަށް އޮތްތަނުގައި އިތުރު ދިރާސާތައް ހެދުމަށްޓަކައި ޗައިނާގެ ޓީމެއް ރާއްޖެ އަންނަނާނެ" ޗައިނާ ސަފީރު ވޭންގް ލިޒިން ވިދާޅުވިއެވެ.
މި ރަސްމިއްޔާތުގައި ވާހަކަދައްކަވަމުން ޔޫއެންޑީޕީން ރާއްޖެއަށް ކަނޑައަޅުއްވާފައި ހުންނަވާ ޑެޕިއުޓީ ރެޕްރެޒެންޓޭޓިވް ވެރާ ހާކިމް ވިދާޅުވީ، ޗައިނާ-ޔޫއެންޑީޕީ ޕްރޮގްރާމްގެ ދަށުން ޞިއްޙީ ދާއިރާގައި ކުރިމަތިވާ ގޮންޖެހުންތަކުން އަރައިގަތުމަށްޓަކައި ގުޅިގެން މަސައްކަތްތަކެއް ކުރައްވާފައިވާކަމަށެވެ.
ވަކިން ޚާއްސަގޮތެއްގައި ކޯވިޑްގެ ބަލިމަޑުކަމުން އަރައިގަތުމަށްޓަކައި ބޭނުންވާ ސާމާނު މީގެ ކުރިންވެސް ހަދިޔާކޮށްފައިވާކަން އޭނާ ފާހަގަކުރެއްވިއެވެ.
ކުއްލި ޙާލަތްތަކުގައި ފަރުވާދޭނެ ސާމާނު ރާއްޖެއަށް ޙަވާލުކޮށްދެއްވީ ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވޭންގް ލިޒިންއާއި ޔޫ.އެން.ޑީ.ޕީން ރާއްޖެއަށް ކަނޑައަޅުއްވާފައި ހުންނަވާ ޑެޕިއުޓީ ރެޕްރެޒެންޓޭޓިވް ވެރާ ހާކިމްއެވެ. އަދި މި ތަކެއްޗާއި ރާއްޖޭގެ ފަރާތުން ޙަވާލުވެވަޑައިގަތީ ހެލްތު މިނިސްޓަރ އަޙްމަދު ނަޞީމެވެ.