ގާކުނޑި ޕްރޮސެސްކުރާނެ ޕްލާންޓެއް ތިލަފުށީގައި ޤާއިމުކުރަން ޗައިނާ ކުންފުންޏަކަށް

ތިލަފުށި ރީޖަނަލް ވޭސްޓް މެނޭޖްމަންޓް ފެސިލިޓީގައި ކޮންސްޓްރަކްޝަން އެންޑް ޑިމޮލިޝަން ވޭސްޓް، ނުވަތަ ޢިމާރާތްކުރުމުގައި އުފެދޭ ގާކުނޑިއާއި ބޮޑެތި ބަރު ކުނިތައް ރައްކާތެރިގޮތުގައި ނައްތާލުމަށް ޕްރޮސެސިންގ ޕްލާންޓެއް ޤާއިމްކުރުމަށްޓަކައި ޗައިނާ ސްޓޭޓް ކޮންސްޓްރަކްޝަން އިންޖިނިއަރިންގ ކޯޕަރޭޝަނާއި ޙަވާލުކޮށްފިއެވެ.

މި ޕްލާންޓަކީ އޭޝިއަން ޑިވެލޮޕްމަންޓް ބޭންކް (އޭ.ޑީ.ބީ) ދިވެހި ސަރުކާރާއި ގުޅިގެން ފުރަމާލެ ސަރަޙައްދު ހިމެނޭހެން ޒޯން 3 ގެ އާންމުން ދިރިއުޅޭ ރަށްތަކުގެ ކުނި މެނޭޖްކުރުމަށް ކުރިޔަށްގެންދާ "ގްރޭޓަރ މާލެ އެންވަރަންމަންޓަލް އިމްޕްރޫވްމަންޓް އެންޑް ވޭސްޓް މެނޭޖްމަންޓް ޕްރޮޖެކްޓް" ގެ ދަށުން، ގާކުނޑި އަދި އިމާރާތްކުރުމުގައި އުފެދޭ ބަރު ކުނި މެނޭޖްކުރުމަށްޓަކައި ދިވެހި ރާއްޖޭގައި މުޅިން އަލަށް ޤާއިމްކުރާ ޕްލާންޓެކެވެ.

މި ޕްލާންޓު ޤާއިމުކުރުމުގެ މަސައްކަތަށް ޖުމްލަ 4.095 މިލިއަން ޑޮލަރު ޚަރަދުވާނެކަމަށް އެންވަޔަރަމަންޓް މިނިސްޓްރީން ވިދާޅުވެއެވެ. ދިވެހި ރުފިޔާއިން ބަލާނަމަ އެއީ 62.58 މިލިއަން ރުފިޔާއެވެ.

މި ޕްލާންޓަކީ އުކާލަން ގެންނަ ގައު ކުނޑި ބޭނުންކޮށްގެން، އިމާރާތް ކުރުމަށް ބޭނުންވާ ވެލި ނުވަތަ އެގްރިގޭޓް 5 ގްރޭޑަކަށް ތައްޔާރުކުރުމުގެ ޤާބިލްކަން ލިބިފައިވާ ޕްލާންޓެކެވެ. އަދި މި ކޮންޓްރެކްޓްގެ މަސައްކަތް ކުރިއަށް އޮތް 12 މަސްދުވަހުގެ ތެރޭގައި ނިންމައި، މި ޕްލާންޓް ބޭނުންކުރަށް ފެށުމަށް ހަމަޖެހިފައިވާކަމަށް އެންވަޔަރަމަންޓް މިނިސްޓްރީން ވިދާޅުވިއެވެ.

މި ޕްލާންޓް ބެހެއްޓުމަށް ހަމަޖެހިފައިވަނީ ތިލަފުށި ރީޖަނަލް ވޭސްޓް މެނޭޖްމަންޓް ފެސިލިޓީއަށް ކަނޑައަޅާފައިވާ ބިމުގެ 39,000 އަކަފޫޓުގެ ބޮޑު ސަރަހައްދެއްގައެވެ. މި ކޮންޓްރެކްޓްގެ ދަށުން ޕްލާންޓް ޑިޒައިންކުރުމާއި، ސަޕްލައި އަދި އިންސްޓޯލްކުރުމުގެ މަސައްކަތް ކުރުމަށް ވަނީ ހަމަޖެހިފައެވެ.

އެގޮތުން، މި ޕްލާންޓަށް ބޭނުންވާ ކޮންކްރީޓް ޕްލެޓްފޯމާއި، ކެރިޖްވޭ ހިމެނޭހެން ޕްލާންޓްގެ ސުޕަރ ސްޓްރަކްޗަރތައް ޑިޒައިންކުރުމުގެ މަސައްކަތް ކުރުމަށް ވަނީ އެއްބަސްވެފައެވެ. މި ޕްލާންޓް ޑިޒައިންކުރުމުގައި އޭޑީބީ އިން ކަނޑައަޅާފައިވާ ބައިނަލްއަޤްވާމީ މޫސުމީ އަދި ކާރިސީ ހިރާސްތަކުން ރައްކާތެރިވާނެ މިންގަނޑުތަކަށް ބެލިފައިވާނެކަމަށް އެންވަޔަރަމަންޓް މިނިސްޓްރީން ވިދާޅުވެއެވެ.

މިފަދަ ޕްލާންޓެއްގެ ރާއްޖޭގައި ޤާއިމުކުރުމުގެ މުހިއްމުކަން ދެނެގަތުމަށްޓަކައި، އެންވަޔަރަމަންޓް މިނިސްޓްރީން ވާނީ 2019 އިން 2021 ގެ ނިޔަލަށް އިނގިރޭސިވިލާތުގެ އިންޖިނިއަރިންގ ކޮންސަލްޓަންޓް ފާމް، މޮޓް މެކްޑޮލަޑްއާއި ހަވާލު ކޮށްގެން ރާއްޖޭގެ އިމާރާތްކުރުމުގެ ދާއިރާގައި އުފެދޭ ކުނި މެނޭޖްކުރާނެ ގޮތުގެ ދިރާސާއެއް ތައްޔާރުކޮށްފައެވެ. އަދި މި ދިރާސާއިން ރައްޖޭގައި އުފެދޭ ސީއެންޑީ ކުނި އުކާލާ މިންވަރު އިތުރުވެފައި، މިކުންޏަކީ އަލުން ރީސައިކަލްކުރެވޭނެ އެއްޗެއްކަން ވަނީ ހޯދިފައެވެ.

އެންމެ ފަހުގެ ތަފާސްހިސާބަށް ބަލާއިރު ދުވާލެއްގެ މައްޗަށް ތިލަފުއްޓަށް ގެންދެވޭ ސީއެންޑީ ކުނީގެ މިންވަރު 200 ޓަނަށް ވުރެއް އިތުރުވެފައިވާއިރު، މި ކުނި މެނޭޖްކުރުމަށް މިފަދަ ޕްލާންޓެއްގެ މުހިއްމުކަން ބޮޑުވެފައިވާކަން އެ މިނިސްޓްރީން ފާހަގަކުރެއްވިއެވެ.

މި އެއްބަސްވުމުގެ ދަށުން އަލަށް ޤާއިމްކުރާ ސީއެންޑީ ޕްލާންޓް ބަހައްޓާ، 2 އަހަރު ދުވަހުގެ އޮޕަރޭޝަނަށް ބޭނުންވާ ސްޕެއަރ ޕާޓްސް ފޯރުކޮށްދިނުމަށްވެސް ވަނީ ކޮންޓްރެކްޓަރާއި ހަވާލުކުރެވިފައެވެ. އަދި ޕްލާންޓް ހިންގުމަށް ބޭނުންވާ ފަންނީ ޤާބިލުކަން އިތުރުކުރުމަށްޓަކައި، ވެމްކޯގެ މުވައްޒަފުން ތަމްރީނުކުރުމަށް ވަނީ ހަމަޖެހިފައެވެ.