އެމްޑީޕީގެ ކެމްޕެއިން ހަރަކާތްތައް ދެކުނުގެ އަތޮޅުތަކުގައި

އެމްޑީޕީގެ ކެމްޕެއިން ހަރަކާތްތައް ދެކުނުގެ އަތޮޅުތަކުގައި މި ހަފްތާގައި ކުރިއަށްދާނެކަމަށް އެ ޕާޓީއިން ބުނެފިއެވެ.

ދެކުނުގެ އަތޮޅުތަކުގައި ކުރިއަށްގެންދާ ކެމްޕެއިން ހަރަކާތްތަކުގައި ބައިވެރިވެވަޑައިގަންނަވާނީ އެމްޑީޕީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙުގެ ރަނިންމޭޓް ހިތަދޫ އުތުރު ދާއިރާގެ މެންބަރު މުޙައްދު އަސްލަމްކަމަށް އެޕާޓިން ބުންޏެވެ.

އެމްޑީޕީގެ ކެމްޕެއިން ޓީމުން ބުނީ، ދެކުނުގެ އަތޮޅުތަކަށް ޚާއްސަކޮށް ކެމްޕެއިންގެ ބޮޑެތި ހަރަކާތްތަކެއް ބޭއްވުމަށް ހަމަޖެހިފައިވާކަމަށެވެ. އެއްގޮތުން މިވަގުތު އައްޑޫ ސިޓީގައި ކެމްޕެއިން ހަރަކާތްތައް ކުރިއަށްދާއިރު، ހުވަަދު އަތޮޅާއި ފުވައްމުލައް ސިޓީގައިވެސް ހަރަކާތްތައް ކުރިއަށްގެންދިއުމަށް ހަމަޖެހިފައިވާކަމަށް އެމްޑީޕީން ބުންޏެވެ.

އެގޮތުން ރަނިންމޭޓާއިއެކު ދޮރުން ދޮރަށް ހިނގުމުގެ ހަރަކާތްތަކެއް އައްޑޫ ސިޓީގެ ހުރިހާ ރަށްތަކަށް ޚާއްސަކޮށްގެން މިހާރު ވަނީ ފަށާފައެވެ. މި ހަރަކާތުގައި ގޭގެއަށް ގޮސް ރައްޔިތުންނާއި އެމްޑީޕީގެ މެނިފެސްޓޯ ހިއްސާކުރުމާއި، ރައްޔިތުން ބޭނުންވާ ކަންކަމުގެ މަޢުލޫމާތު އޮޅުންފިލުވަމުންދާކަމަށް އެމްޑީޕީން ބުންޏެވެ. އަދި ކަންމަތީ ޖަލްދާތައްވެސް އަންނަނީ ބާއްވަމުންނެވެ.

މީގެއިތުރުން ރަނިންމޭޓްގެ ކެމްޕެއިން ދަތުރުތަކެއް ފުވައްމުލައް ސިޓީއާއި ހުވަދުއަށްވެސް ކުރުމަށް ހަމަޖެހިފައިވާކަމަށް ކެމްޕެއިން ޓީމުން ބުންޏެވެ.

މިދިޔަ ހޮނިހިރު ދުވަހު ހަވީރު، އެ ޕާޓީން ވަނީ މާލެ ސަރަޙައްދު ހިމެނޭހެން ރާއްޖޭގެ ހުރިހާ ރަށެއްގައި ދޮރުން ދޮރަށް ހިނގުމުގެ ހަރަކާތެއް ކުރިއަށްގެންގޮސްފައެވެ. އަދި ރިޔާސީ ކެންޑިޑޭޓް ރައީސް އިބްރާޙިމް މުޙައްމަދު ޞާލިޙު ބައިވެރިވެވަޑައިގަންނަވާ ގޮތަށް، ކޮންމެ ރެއަކު މާލޭގައި އަންނަނީ ކަންމަތީ ޖަލްސާރަތާކާއި ޖަގަހަ ޖަލްސާތައް ބާއްވަމުންނެވެ. އަދި ދޮރުން ދޮރަށް ހިނގުމުގެ ހަރަކާތްތައްވެސް އަންނަނީ ބާއްވަމުންނެވެ.