ލޯ ސީޒަނަށް ފަތުރުވެރިން އިތުރުކުރަން އިޝްތިހާރުކުރުން ވަރުގަދަކުރާނަން: ވަޒީރު

އަންނަ އަހަރުގެ ފަތުރުވެރިކަމުގެ ލޯ ސީސަންގައި ރާއްޖެއަށް ޒިޔާރަތްކުރާ ފަތުރުވެރިންގެ އަދަދުތައް އިތުރުކުރަން ގިނަ ކަންތައްތަކެއް ރާވާފައިވާކަމަށް ފަތުރުވެރިކަމާއި ބެހޭ ވަޒީރު އިބްރާހީމް ފައިޞަލް ވިދާޅުވެއްޖެއެވެ.

ކޮންމެ އަހަރެއްގެވެސް ޖޫން، ޖުލައި އަދި އޮގަސްޓު މަހަކީ ރާއްޖެއަށް އަންނަ ފަތުރުވެރިންގެ އަދަދު ދަށަށްދާ ދުވަސްވަރެކެވެ.

ޕީއެސްއެމް ނިއުސްއަށް ދެއްވި ޚާއްސަ އިންޓަރވިއުއެއްގައި ފަތުރުވެރިކަމާއި ބެހޭ ވަޒީރު އިބްރާހީމް ފައިޞަލް ވިދާޅުވީ ކޮންމެ އަހަރެއްގައިވެސް މި ދުވަސްވަރު ރާއްޖެއަށް އަންނަ ފަތުރުވެރިންގެ އަދަދު ދަށްވާކަމަށެވެ. އަދި މި މިއަހަރު ދަށްވެގެންދިޔައީ މީގެކުރީގެ އަހަރުތަކާއި އަޅާ ބަލާއިރު މާ ބޮޑު ދަށްވުމެއް ނޫންކަން ވަޒީރު ފާހަގަކުރެއްވިއެވެ.

ވަޒީރު އިބްރާހީމް ފައިޞަލް ވިދާޅުވީ ފަތުރުވެރިން ޒިޔާރަތްކުރާ އަދަދު މަދުވެ، އެނދުތައް ހުސްކޮށް ހުރުމަކީ ކަންބޮޑުވާ ކަމެއް ކަމަށެވެ. އަދި އެއީ ދެކެން ބޭނުންވާ މަންޒަރެއް ނޫން ކަމަށާއި އަންނަ އަހަރުގެ ލޯ ސީސަންގައި ރާއްޖެ އަންނަ ފަތުރުވެރިންގެ އަދަދު އިތުރުކުރަން ޚާއްސަ ސަމާލުކަމެއްދީގެން ގިނަ މަސައްކަތްތަކެއް ކުރައްވާނެކަމަށް ވަޒީރު ވިދާޅުވިއެވެ.

"މިއަންނަ އަހަރުގެ މި ދުވަސްވަރު އޮކިއުޕެންސީ %15 ނޫނީ %20 އިތުރުކުރެވޭނެ ގޮތެއް ހޯދާނަން، އެމްއެމްޕީއާރުސީއާ ގުޅިގެން ވަރުގަދަ ބުރަ މަސައްކަތްތަކެއް ކުރާނަން. އިންޑިއާ މަރކެޓު، ޗައިނާ މަރކެޓު އަދި ޓްރެޑިޝަނަން މަރކެޓުތަކަށް ފޯކަސްކޮށްގެން މަސައްކަތްކުރެވިއްޖެޔާ އަންނަ އަހަރުގެ މި ސީޒަނާ ކުރިމަތިލާނީ ވަރަށް ތައްޔާރުވެގެން" ވަޒީރު ފައިޞަލް ވިދާޅުވިއެވެ.

ރާއްޖޭގެ ފަތުރުވެރިކަން އިތުރަށް އިޝްތިހާރުކުރުމަށް ގިނަ ކަންތައްތަކެއް ކުރަމަށް ރާވާފައިވާއިރު، އެކަން ކުރުމަށް އެމްއެމްޕީއާރުސީގެ ބަޖެޓު އިތުރުކުރުން މުހިއްމުކަން ވަޒީރު ފާހަގަކުރެއްވިއެވެ.

ފަތުރުވެރިކަން އިޝްތިހާރުކުރަން ހޭދަކުރާ ފައިސާއަކީ އޭގެ ސަބަބުން މި ސިނާއަތުން ޤައުމަށް ލިބޭ ނަފާ އެތައް ގުނައަކުން އިތުރުވެގެންދާކަމަށާއި އެއީ މުހިއްމުކަމެއްކަމަށްވެސް ވަޒީރު ވިދާޅުވިއެވެ.

"އެމްއެމްޕީއާރުސީގެ ބަޖެޓު އިތުރުކުރުމަކީ ފަތުރުވެރިކަމަށް ކުރެވޭ އިންވެސްޓެއް، އެއް ޑޮލަރު މަރކެޓިންގ އަށް ހަރަދުކޮށްފި ކަމަށްވާނަމަ، 15 ޑޮލަރު ނުވަތަ 25 ޑޮލަރު ޤައުމަށް އެބަ ވެއްދޭ، އެހެންވީމާ އެއީ ނުކުރަންވީ ކަމެއް ނޫން، ދައުލަތުގެ ބަޖެޓަށް 4.5 ބިލިއަން ޑޮލަރު ޓޫރިޒަމް ސެކްޓަރއިން އެބަ ކޮންޓްރިބިއުޓުކުރޭ" ވަޒީރު ވިދާޅުވިއެވެ.

ފަތުރުވެރިކަމާ ބެހޭ ވަޒީރު ވިދާޅުވީ ވަކި ވަކި މަރކެޓުތަކުން ރާއްޖެއަށް އަންނަ ފަތުރުވެރިންގެ އަދަދުތައް އިތުރުކުރުމަށް ގިނަ މަސައްކަތްކެއް މިހާރުވެސް ކުރަމުންދާކަމަށެވެ. އެގޮތުން ޗައިނާގެ ކުންފުނިތަކާއެކު ކުރެވޭ މަސައްކަތަކުގެ ސަބަބުން މި 5 އަހަރުތެރޭ އެގައުމުން ރާއްޖެއަށް ގިނަ އަދަދެެއްގެ ފަތުރުވެރިން ގެނެވޭނެކަމަށްވެސް ވަޒީރު ވިދާޅުވިއެވެ.

2027 ވަނަ އަހަރު ނިމޭއިރު ފަތުރުވެރިކަމުގެ ސިނާއަތުން އެކަނިވެސް ދައުލަތުގެ ބަޖެޓަށް 6 ބިލިޔަން ޑޮލަރު ލިބިގެންދާނެ ކަމުގެ ވަރަށް ބޮޑު އުއްމީދެއް އެބައޮތް ކަމަށް ފަތުރުވެރިކަމާ ބެހޭ ވަޒީރު އިބްރާހިމް ފައިސަލް ވަނީ މީގެކުރިން ވިދާޅުވެފައެވެ.