ޔޫރޯ 2024 ގެ ގަދަ 16 ގެ ބުރުގައި ރޭ ޖޯޖިއާ އަތުން 1-4 އިން މޮޅުވި މެޗަށްފަހު ސްޕެއިންގެ ކޯޗު، ލުއިސް ޑި ލާ ފުއެންޓޭ ބުނީ، މެޗުގެ ފުރަތަމަ ހާފެކޭ އެއްގޮތަށް ފަހު ހާފުގައި ވެސް އޭނާގެ ކުޅުންތެރިން ކައިރީގައި އެދުނީ، ހަމަޖެހިލައިގެން، ހާސްކަމެއް ނެތި، އެއްވެސް ކަހަލަ ސްޓްރެސްއަކާ ނުލައި ކުޅުމަށް ކަމަށެވެ.
މެޗަށްފަހު ބޭއްވި ނޫސްވެރިންގެ ބައްދަލުވުމުގައި ފުއެންޓޭ ވަނީ، ސްޕެއިނަށް ލަނޑެއްނުޖެހި ހޭދަވީ ވަގުތުތަކުގައި ކުޅުންތެރިންގެ މޫނުމަތިން ހާސްކަން ބޮޑުވިތަން ފެނުނު ކަމަށާއި، އެކަމުގެ ސަބަބުން ނެގެޓިވް ޓެންޝަނަކަށް ވެދާނެތީވެ އޭނާ ބޭނުންވީ ކުޅުންތެރިންގެ ބޮލުން އެކަން ފިލުވާލަން ކަމަށް ބުނެފައެވެ.
މެޗުގައި އެންމެ އެކަށީގެންވާ ދަނޑިވަޅުގައި އެޓޭކްތައް ކުރުމަށާއި، އަދި ހަމަޖެހިލައިގެން ކުޅުމަށް ވެސް އޭނާގެ ކުޅުންތެރިން ގާތުގައި ބުނި ކަމަށް ވެސް ފުއެންޓޭ ފާހަގަކުރިއެވެ.
ސްޕެއިނުގެ ތިންވަނަ ލަނޑުޖެހުމަށް ނިކޯ ވިލިއަމްސް އަށް ފަބިއެން ރުއިޒް ދިން ބޯޅައާ ގުޅޭގޮތުން ބުނީ، އެއީ ވަރަށް ހިތްގައިމު ޕާހަކުން ކާމިޔާބުކުރި އެހާމެ ރީތި ގޯލެއް ކަމަށާއި، އޭނާ ގަބޫލުކުރާގޮތުގައި އެ ދެ ކުޅުންތެރިންނަކީ އެ މަގާމުތަކަށް މުޅި ދުނިޔޭން ވެސް ފާހަގަކޮށްލެވޭ މޮޅު ދެ ކުޅުންތެރިން ކަމަށެވެ.
އަދި އެ ދެކުޅުންތެރިންގެ ހުނަރުވެރިކަން ހިމެނޭގޮތަށް މުޅި ސްކޮޑުގައި ތިބި ހުނަރުންފުރިފައިވާ އެތައް ކުޅުންތެރިންނާއެކު މުބާރާތުގައި އިތުރަށް ކުރިއަށްދިއުމަށް ސްޕެއިނަށް ފަސޭހަވެގެންދާނެ ކަމަށް ވެސް ފުއެންޓޭ ވަނީ ބުނެފައެވެ.
މެޗަށްފަހު ޖޯޖިއާގެ މިޑްފީލްޑަރު، ޖިއޯޖީ ކޮޗޮރަޝްވިލީ ބުނީ، އެ ގައުމުގެ ކުރިއަށް އޮތް ޖީލުން ތިބީ ބަލަން ކަމަށާއި، އެ ޓީމުން ކުޅުން ރަނގަޅު ކުރަންޖެހޭނެ ކަމަށެވެ. އެ ޓީމަކީ އެއްއާއިލާ ކަމަށާއި، މުބާރާތުން އެނބުރިދާންޖެހުމުން އެކަކު އަނެކަކު މަތީން ވަރަށް ބޮޑަށް ހަނދާންވާނެ ކަމަށް ވެސް އޭނާ ބުންޏެވެ.
ޖޯޖިއާ އިން އެނބުރި އަންނާނީ ވަރުގަދަކޮށް ކަމަށާއި، ގައުމަށް އިތުރު ކާމިޔާބީ ހޯދައިދޭނެ ކަމަށް ކޮޗޮރަޝްވިލީ ވަނީ ބުނެފައެވެ.
މުބާރާތުގެ ކުއާޓާ ފައިނަލްގައި ސްޕެއިން ބައްދަލުކުރާނީ ޖަރުމަނާ އެވެ. މި މެޗު ކުޅުމަށް ހަމަޖެހިފައިވަނީ މި މަހުގެ 5 ވާ ހުކުރު ދުވަހުގެ ރޭގަނޑު 9 ޖަހާއިރު އެވެ.