ނޮވެންބަރު މަސް އަންނައިރު ރިޒާވް ރަނގަޅުކޮށް އިގްތިޞާދު އަލުން ރަނގަޅު ޙާލަތަށް ގެނެވޭނެ: ރައީސް
މިއަހަރުގެ ނޮވެމްބަރު މަސް އަންނައިރު ރާއްޖޭގެ ރިޒާވް ރަނގަޅުކޮށް އިގްތިޞާދު އަލުން ރަނގަޅު ޙާލަތަށް ގެނެވޭނެކަމުގެ ޔަގީންކަން އެބައޮތްކަމަށް ރައީސުލްޖުމްހޫރިއްޔާ ވިދާޅުވެއްޖެއެވެ.
ރައީސް މިހެން ވިދާޅުވީ ޕީއެންސީގެ ހަރުގެ ޖަލްސާގައި ވާހަކަފުޅުދައްކަވަމުންނެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ އެމަނިކުފާނު ވެރިކަމާ ހަވާލުވެވަޑައިގެންނެވިއިރުވެސް ޤައުމުގެ ހާލަތު ރައްޔިތުންނަށް ހާމަކޮށްދެއްވާފައިވާނެ ކަމަށާއި އެގޮތުން ކުރީގެ ސަރުކާރުން ރާއްޖެ އިގްތިސާދީގޮތުން ފުން އަނދަވަޅަކަށް ވައްޓާފައިވާ ކަމަށެވެ. އެގޮތަށް ދިމާވީ ގިނަ އަދަދެއްގެ ރުފިޔާ ޗާޕުކުރުމާއި ބޮޑު އިންޓްރަސްޓެއްގައި ލޯނުތައް ނެގުމާއި ކޮވިޑު ތެރޭގައި އިސްރާފުކުރުމުންކަން ރައީސް ފާހަގަކުރެއްވިއެވެ.
ރައީސް ވިދާޅުވީ މި ސަރުކާރުން މަސައްކަތް ކުރައްވަނީ ފައިސާ ޗާޕުނުކޮށް އިގްތިސާދީ ހާލަތު ރަނގަޅު ކުރުމަށް ކަމަށާއި އެގޮތަށް މަސައްކަތް ކުރައްވަން ފެއްޓެވުމުން ރާއްޖޭގެ އިގްތިސާދު ވެއްޓިފައިވަނީ އަޑިނޭނގޭ އަނދަވަޅަކަށް ކަމަށް އެމަނިކުފާނު ވިދާޅުވިއެވެ.
"އިގްތިސާދީ ހުރިހާ މާހިރުން، ދުނިޔޭގެ އެހެން ހުރިހާ ޖަމިއްޔާތަކެއް، އައިއެމްއެފް، ވޯލްޑްބޭންކް އަދި އެހެން ފަރާތްތައްވެސް ފާހަގަކުރާ އެންމެ އަސާސީ ކަމަކީ ފައިސާ އިތުރަށް ޗާޕުނުކޮށް ދެން ކަންކަން ރަނގަޅުކޮށް ރިޒާވް ވަރުގަދަކޮށް ކަންކަން ރަނގަޅުކުރަން މަސައްކަތް ފެށީމައޭ ރަނގަޅު މިސްރާބުން ދާނީ. އެ މަސައްކަތް އެގޮތަށް ފެށުމުން އަޅުގަނޑުމެންނަށް އިހުސާސްވާންފެށީ ވެއްޓިފައިވާ ފުން އަނދަވަޅު،" ރައީސް ވިދާޅުވިއެވެ.
ސަރުކާރުން އެކި ފަރާތްތަކަށް ދައްކަންޖެހޭ ފައިސާ ހުރިކަން ފާހަގަކުރައްވައި ރައީސް ވިދާޅުވީ ސަރުކާރުން ކުރަމުން އަންނަ މަސައްކަތްތަކުގެ ސަބަބުން އަންނަ ނޮވެމްބަރު މަސް އަންނަންވާއިރު ރާއްޖޭގެ ރިޒާވް ރަނގަޅުކޮށް އެ ބިލުތަކަށް ފައިސާ ދައްކައި، އިގްތިސާދު ރަނގަޅުވެގެންދާނެ ކަމަށެވެ.
"އަޅުގަނޑު ރައްޔިތުންނަށް ދޭ ޔަގީންކަމަކީ މިއަހަރުގެ ނޮވެމްބަރު މަސް އަންނަންވާއިރަށް އަޅުގަނޑުމެންނަށް ވަރަށް ޔަގީންކަން އެބައޮތް އަޅުގަނޑުމެންގެ ރިޒާވް ރަނގަޅުކޮށް އަޅުގަނޑުމެންގެ އިގްތިސާދަށް މިދެންނެވި ރަނގަޅު ކުރިއެރުންތައް ގެނެސްދީ، މިދެންނެވި ބިލުތަކަށް ރައްޔިތުންނަށް ފިނޭންސް މިނިސްޓްރީން ޕޭމަންޓްތައް ހަދައި. މި ޕޭމަންޓްތައް ލިބެންހުރި ކުންފުނިތަކަށް ފައިސާ ދޭނަން. ދީ ނިންމާ ގިނަ ރައްޔިތުންނަށް އުފާވެރިކަން ގެނެސްދޭނަން ފައިސާ ޗާޕުނުކޮށް،" ރައީސް ވިދާޅުވިއެވެ.
ރައީސް ވިދާޅުވީ ސަރުކާރުން އަބަދުވެސް މަސައްކަތް ކުރައްވާނީ ޤައުމަށް އެންމެ ފައިދާ ހުރިގޮތް ޚިޔާރުކުރައްވައިގެން ކަމަށާއި އެ ސިޔާސަތުގެ ދަށުން މާގިނަދުވަސްތަކެއް ނުވެ ރައްޔިތުންނަށް އުފާވެރިކަން ލިބގެންދާނެ ކަމަށެވެ.