އަލިފާނުގެ ހާދިސާއާ ގުޅިގެން 56 މީހަކަށް ރައްކާތެރިކަން ފޯރުކޮށްދޭންޖެހުނު: އެންޑީއެމްއޭ

ހ. ދޫހިމެރިގޭގައި ހިނގި އަލިފާނުގެ ހާދިސާއާ ގުޅިގެން 56 މީހަކު ރައްކާތެރި ތަންތަނަށް ބަދަލުކޮށްފައިވާކަމަށް ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ، އެންޑީއެމްއޭއިން ވިދާޅުވެއްޖެއެވެ.

މިއަދު މެނދުރުފަހު ދޫހިމެރިގޭގައި ހިނގި އަލިފާނުގައި ހާދިސާގައި އަލިފާން ރޯވެފައިިވަނީ އެގޭގައި ހިންގާ ގާމަގު ނަމަކަށް ކިޔާ ކެފޭގެ ބަދިގޭގައެވެ.

ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީން ވިދާޅުވީ މި ހާދިސާއާ ގުޅިގެން 50 ބިދޭސީންނާއި، 6 ދިވެއްސަކު ރައްކާތެރި ތަންތަނަށް ބަދަލު ކުރެވިފައިވާ ކަމަށެވެ. އަދި އެ މީހުންގެ ހާލަތު ދެނެގަތުމުގެ މަސައްކަތް ކުރަމުންދާކަމަށާއި އަދި އެމީހުންގެ ތެރެއިން އެއްވެސް މީހަކަށް ސިޢްހީ މައްސަލައެއް ދިމާވިކަން ފާހަގަވެފައިނުވާކަމަށް އެންޑީއެމްއޭއިން ވިދާޅުވެއެވެ. ނަމަވެސް މަގުމަތީގައި ތިބި ދެމީހަކަށް ދުމުގެ އަސަރުކޮށްގެން ހޮސްޕިޓަލަށް ގެންގޮސްފައިވާކަމަށާއި އެއީ ބިދޭސީ އަންހެނަކާއި ފިރިހެނެއްކަމަށް ފުލުހުން ވިދާޅުވެއެވެ.

މި ހާދިސާގައި ހ. ދޫހިމެރިގޭގެ އިތުރުން އެ ގެއާއި އިންވެގެން ހުރި ގެއަކަށްވެސް އަލިފާނުގެ އަސަރުކުރިއެވެ. އެންޑީއެމްއޭއިން ވިދާޅުވީ އެކަމާޢި ގުޅޭ މައުލޫމާތު ހޯދުމަށްފަހު އެހީތެރިކަން ފޯރުކޮށްދޭން ޖެހޭ ފަރާތްތަކަށް އެހީތެރިކަން ފޯރުކޮށްދޭނެ ކަމަށެވެ.