އިޓާލިއަން ލީގުގައި މިއަދު ކުޅުނު މެޗުގައި ކްވިޗާ ކްވަރަޝްކޭލިއާ ކާމިޔާބުކުރި ލަނޑާއެކު 0-1 ގެ ނަތީޖާއަކުން އެމްޕޯލީ ބަލިކޮށް، ނާޕޮލީން ތާވަލުގެ ކުރީގައި މަގާމު ދަމަހައްޓައިފިއެވެ.
މިއީ ލީގުގެ ފުރަތަމަ މެޗުގައި ހެލާސް ވެރޯނާ އަތުން ބަލިވިފަހުން ނާޕޮލީ އިން ބަލިނުވެ ފުރިހަމަކުރި ހަތްވަނަ މެޗެވެ. އޭގެތެރެއިން ހަ މެޗުން މޮޅުވެފައިވާއިރު، އަނެއް މެޗުން ވީ އެއްވަރެވެ.
މި ނަތީޖާއާއެކު ނާޕޮލީ އެއްވަނައިގައި އޮތީ ކުޅުނު އަށް މެޗުން 19 ޕޮއިންޓް ހޯދައިގެންނެވެ. އޭގެ ތިން ޕޮއިންޓް ފަހަތުން ދެވަނައިގައި ޔުވެންޓަސް އޮތްއިރު، ތިނެއްގައި އޮތް އިންޓަ މިލާނަށް ހަތް މެޗުން ލިބިފައިވަނީ 14 ޕޮއިންޓެވެ. އެއްމެޗު އިތުރަށް ކުޅެގެން ހަމަ މިއަދަދަށް ޕޮއިންޓް ލިބިގެން އޭސީ މިލާން އޮތީ ހަތަރުވަނައިގައެވެ.
ސްޓާޑިއޯ ކާލޯ ކަސްޓެލާނީގައި ކުޅުނު މި މެޗުގައި ފެނިގެންދިޔަ ހަމައެކަނި ލަނޑު، ދެވަނަ ހާފުގައި ކާމިޔާބުކޮށްދިނީ ނާޕޮލީގެ ޖޯޖިއާ ވިންގް، ކްވަރަޝްކޭލިއާ އެވެ. މެޗުގެ 63 ވަނަ މިނެޓުގައި ކްވަރަޝްކޭލިއާ މި ލަނޑުޖެހީ ލިބުނު ޕެނަލްޓީއަކުންނެވެ. މިއީ ޕެނަލްޓީއޭރިޔާ ތެރެއިން ނާޕޮލީގެ ވިންގް، މަޓެއޯ ޕޮލިޓާނޯ އަށް އެމްޕޯލީގެ ފައުސްޓީނޯ އަންޖޮރިން ކުރި ފައުލަކާ ގުޅިގެން ރެފްރީ ދިން ޕެނަލްޓީއެކެވެ.
މިމެޗުގެ ފުރަތަމަ ހާފުގައި އެމްޕޯލީގެ ސެބާސްޓިއާނޯ އެސްޕޮޒީޓޯ ފޮނުވާލި ތިން ހަމަލާއެއް ނާޕޮލީގެ ގޯލްކީޕަރު، އެލިއާ ކެޕްރީލް ވަނީ މަތަކޮށްފައެވެ. ނާޕޮލީ އިން ފޮނުވާލި ޕެނަލްޓީ އަކީ މުޅި މެޗުގައިވެސް އެ ޓީމުން އެމްޕޯލީގެ ގޯލަށް އަމާޒުކޮށް ފޮނުވާލެވުނު ހަމައެކަނި ހަމަލާ އެވެ.
މެޗަށްފަހު ވާހަކަދައްކަމުން ނާޕޮލީގެ ކޯޗު، އެންޓޯނިއޯ ކޮންޓޭ ވަނީ، އޭނާގެ ޓީމުން ފުރަތަމަ ހާފުގައި ދެއްކި ކުޅުމަށް ފާޑުކިޔުމަށްފަހު އެ މެޗުގެ ދެވަނަ ހާފުގައި ފެނިގެންދިޔަ ކުޅުމަށް ތަޢުރީފުކޮށްފައެވެ.
"ފުރަތަމަ ހާފުގައި އަހަރެމެންގެ ކުޅުންތެރިން ދަނޑުމަތިން ފެނުނީ ބެލުންތެރިންގެ ގޮތުގަ،"
"އެކަމަކު، ފަހު ހާފުގައި ދެއްކި ކުޅުމާ މެދު ހިތްހަމަޖެހޭ." ކޮންޓޭ ބުންޏެވެ.
ކޮންޓޭގެ ވާހަކައިގައި ވަނީ، އެމްޕޯލީގެ ދަނޑުގައި އެ ޓީމާ ދެކޮޅަށް ކުޅުމަކީ އުނދަގޫ ކަމެއްގެ ގޮތުގައި ސިފަކޮށް، ފަހަރުގައި އެއީ ތާވަލްގެ އެއްވަނަ މަގާމު ދިފާއުކުރުމަށް ނާޕޮލީ މަސައްކަތްކުރާތީވެ ކަމަށްވުން އެކަށީގެންވާ ކަމަށް ބުނެފައެވެ.
ލީގުގައި ނާޕޮލީ ދެން ކުޅޭ މެޗުގައި އަންނަ ހޮނިހިރު ދުވަހު އަމިއްލަ ދަނޑުގައި ނިކުންނާނީ ލެއްޗެއާ ދެކޮޅަށެވެ. މި މެޗު ފަށާނީ ރާއްޖޭގަޑިން އެ ދުވަހު އިރުއޮއްސި ހައެއް ޖަހާއިރު އެވެ.