ރައީސްގެ "މޯލްޑިވްސް ފަސްޓް" ޚާރިޖީ ސިޔާސަތު ވަރަށް ކާމިޔާބު، ނަތީޖާ ދަނީ ފެންނަމުން: ޚާރިޖީ ވަޒީރު

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ "މޯލްޑިވްސް ފަސްޓް" ޚާރިޖީ ސިޔާސަތު ވަރަށް ކާމިޔާބުކަމަށާއި، ފާއިތުވި އަހަރެއްހާ ދުވަހު ކުރެވުނު މަސައްކަތާއެކު މި ސިޔާސަތުގެ ނަތީޖާ ފެންނަމުންދާކަމަށް ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވެއްޖެއެވެ.

ޚާރިޖީ ވަޒީރު މިހެން ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރަށް 1 އަހަރު ފުރުމާގުޅިގެން ޕީއެސްއެމް ނިއުސްއިން ގެނެސްދޭ "ހަފްތާ-52" ޕްރޮގްރާމުގައި ވާހަކަފުޅުދައްކަވަމުންނެވެ.

ޚާރިޖީ ރޮނގުން މި ސަރުކާރުން ކުރައްވާފައިވާ މުހިންމު މަސައްކަތްތަކާ ގުޅޭގޮތުން "ހަފްތާ-52" ޕްރޮގްރާމުގައި ވާހަކަފުޅުދައްކަވަމުން ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާއި ހަވާލުވެވަޑައިގެންނެވިއިރު، ޚާރިޖީގޮތުން ރާއްޖޭން ގެންގުޅު ބައެއް ސިޔާސަތުތަކުގައިވެސް އާންމުންގެ ކަންބޮޑުވުންތަކެއް ހުރިކަމަށެވެ.

ވަޒީރު ވިދާޅުވީ، ރައީސް ޑރ. މުޢިއްޒުގެ މުޅި ޚާރިޖީ ސިޔާސަތު ބައްޓަންކުރައްވާފައިވަނީ ދިވެހިންގެ މަސްލަޙަތާއި ކުރިއެރުން އިސްކޮށް "މޯލްޑިވްސް ފަސްޓް" ޕޮލިސީގެ މައްޗަށްކަމަށެވެ. އަދި މި ސިޔާސަތުގެ މައިގަނޑު އަސާސްތައް ބައްޓަންވެގެންދަނީ ޤައުމުގެ ކުރިއެރުމާއި ދިވެހިންގެ ކުރިއެރުން އިސްކޮށް ވަކި އަތަކަށް ބުރަނުވެ، ޤައުމުތަކާއެކު ހަމަހަމަ ގުޅުމެއް ޤާއިމުކުރުމުގެ މައްޗަށްކަމަށެވެ.

"އެނގިވަޑައިގަންނަވާނެ ރައީސް ވެރިކަމަށް ވަޑައިގެންނެވިއިރު ވަރަށް ގިނަ ފާޑުކިޔުންތަކެއް އޮތް. އާންމުންގެ ތެރޭގައި އަޅުގަނޑުމެންނަށް އެންމެ ބޮޑަށް އަޑުގަދަވެގެން ދިޔައީ ރާއްޖޭގެ ޚާރިޖީ ސިޔާސަތު ވަކިގޮތަކަށް ބައްޓަންވެ އުނދަގޫ ޙާލަތަކަށް ގޮސްފައި އޮތް ވާހަކަ އާންމުން ބުނަމުންދިޔައީ. އެހެންނަމަވެސް މި ސަރުކާރު އައުމަށްފަހުގައި އަޅުގަނޑުމެންނަށް ފާހަގަކުރެވިގެންދަނީ ރައީސްގެ މި ސިޔާސަތުގެ ސަބަބުން ދުނިޔޭގެ ބޮޑެތި ޤައުމުތަކާއި އަދި ކުޑަޔަސްވެސް ކުދި ޤައުމުތަކާވެސް ގުޅުންތައް ބޭއްވުމުގައި ވަރަށް ހަމަހަމަކޮށް އެމަނިކުފާނުގެ ވިސްނުންފުޅު ގެންގުޅުއްވާތަން." ޚާރިޖީ ވަޒީރު ވިދާޅުވިއެވެ.

ޚާރިޖީ ވަޒީރު ޑރ. ޚަލީލް ވިދާޅުވީ، ރައީސުލްޖުމްހޫރިއްޔާގެ ވެރިކަމުގެ އެންމެ ފުރަތަމަ އަހަރުގެ ތެރޭގައިވެސް ޤައުމުތަކާއެކު އޮތް ގުޅުންތައް ހަރުދަނާކޮށް ޚާރިޖީ ރޮނގުންވެސް މުހިންމު ކުރިއެރުންތަކެއް ހޯއްދަވާފައިވާކަމަށެވެ.

އެގޮތުން ޗައިނާއާއި އިންޑިއާއާއި ތުރުކީވިލާތަށް އެމަނިކުފާނު ކުރެއްވި ދަތުރުފުޅުތަކުގައި އެ ޤައުމުތަކާއެކު އެންމެ މަތީ ފެންވަރުގެ މަޝްވަރާތައް ބާއްވަވާފައިވާކަން ވަޒީރު ފާހަގަކުރެއްވިއެވެ. އަދި މި މަޝްވަރާތަކުގެ ސަބަބުން ރާއްޖޭގެ އިޤްތިޞާދީ ޙާލަތު ރަނގަޅުކޮށް ތަރައްޤީގެ ދުވެލި އަވަސްކުރުމަށް ސަރުކާރުން ކުރައްވާ މަސައްކަތްތަކަށް ހެޔޮ ބަދަލުތަކެއް އަންނަން ފަށާފައިވާކަމަށް ވަޒީރު ވިދާޅުވިއެވެ.

މިކަންކަމާއެކު ރާއްޖޭގެ މިނިވަންކަމާއި އިސްތިޤުލާލަށް ގެއްލުން ނުވާނެހެން ޤައުމުތަކާއެކު ގާތްގުޅުންތަކެއް ބޭއްވިދާނެކަން ރައީސް ސާބިތުކޮށްދެއްވަމުން ގެންދަވާކަން ޚާރިޖީ ވަޒީރު ފާހަގަކުރެއްވިއެވެ.

"ރާއްޖޭގެ މިނިވަންކަމާއި އިސްތިޤުލާލު ކޮމްޕްރޮމައިޒްނުކޮށް މިކަން ކުރެވިދާނެކަން ރައީސް ސާބިތުކޮށްދެއްވަމުން އެގެންދަވަނީ. އެއީ ރައީސްގެ މި ޚާރިޖީ ސިޔާސަތުގައި ފާހަގަކޮށްލެވޭ ވަރަށް މުހިންމު އަސާސީ ސިފައެއް. މީގެ ކުރީގައި ޙަޤީޤަތުގައި ގުޅުންތައް ނުދާ މިންވަރަކަށް އަޅުގަނޑުމެންނަށް މި ފާހަގަކުރެވެނީ ދުނިޔޭގެ ބޮޑެތި ޤައުމުތަކާއެއްކޮށްވެސް ގުޅުންތައް ބަދަހިވަމުންދާތަން. އޭގެ އިތުރުން މަލްޓިލެޓްރަލް ބައެއް ޖަމްޢިއްޔާތަކާ އޭގެތެރޭގައި އދ، އާއި ކޮމަންވެލްތަށް ބަލާލިޔަސް ފެނިގެންމިދަނީ ވަރަށް ފުޅާކޮށް ގުޅުންތައް ވަރުގަދަވެގެންދާ ތަން." ޚާރިޖީ ވަޒީރު ވިދާޅުވިއެވެ.

ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވީ، މިވީ އެއް އަހަރު ދުވަހުގެ ތެރޭގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ "މޯލްޑިވްސް ފަސްޓް" ޕޮލިސީގެ ތެރެއިން އަވަށްޓެރި ޤައުމުތަކާއި، ވިޔަފާރީގެ ގުޅުން އޮންނަ އެކިއެކި ޤައުމުތަކާއެކުވެސް ގާތްގުޅުންތަކެއް އުފެއްދިފައިވާކަމަށެވެ. އަދި އެގުޅުންތަކުގެ ތެރެއިން ރާއްޖެއަށް ފައިދާވާ ކަންތައްތަކެއް ޙާޞިލުކުރެވެމުންދާކަމަށެވެ.

ހަމައެހެންމެ ރައީސުލްޖުމްހޫރިއްޔާ ބޭރަށް ކުރެއްވި ދަތުރުފުޅުތަކުގެ ތެރެއިން ޤައުމުތަކާއެކު އެކި ދާއިރާތަކުން ގުޅުން ބަދަހިކުރެއްވުމުގެ އިތުރުން އެ ޤައުމުތަކުގައި ދިރިއުޅޭ ދިވެހިންނާއި ބައްދަލުކުރައްވާ، އެ ދިވެހިންގެ ޙާލަތު ވަރަށް ގާތުން ބައްލަވާ، ހުރި ކަންބޮޑުވުންތައް ޙައްލުކޮށްދިނުމަށްވެސް ޚާއްސަ އިސްކަމެއްދެއްވާކަން ޚާރިޖީ ވަޒީރު ޑރ. ޢަބްދުﷲ ޚަލީލް ފާހަގަކުރެއްވިއެވެ.