އަމާޒަކީ ކުނި ނަގައިދިނުމުގެ ޚިދުމަތަށް 8،000 ވިޔަފާރި ގެނެސް، އާމްދަނީ އިތުރުކުރުން: ވެމްކޯ

ވޭސްޓް މެނޭޖްމެންޓް ކޯޕަރޭޝަން، ވެމްކޯގެ ކުނި ނަގައިދިނުމުގެ ޚިދުމަތަށް މާލެ ސަރަހައްދުގައި ވިޔަފާރިކުރާ 8،000 ތަން ގެނެސް، އާމްދަނީ އިތުރުކުރުމަކީ އަމާޒެއްކަމަށް އެ ކުންފުނީގެ މެނޭޖިން ޑިރެކްޓަރ މުޖުތަބާ ޖަލީލް ވިދާޅުވެއްޖެއެވެ.

ވެމްކޯގެ މެނޭޖިން ޑިރެކްޓަރ މުޖުތަބާ ޖަލީލް ވިދާޅުވީ މާލެ ސަރަހައްދުގައި ކުނި ނެގުމަށް ބިލްކުރަމުން އަންނަނީ ސްޓެލްކޯގެ ކަރަންޓު ބިލު ހިމެނޭ ނިޒާމުގެ ތެރެއިން ކަމަށެވެ. މިގޮތުން މާލޭގައި ވިޔަފާރިކުރާ 12،000 ތަނެއް ސްޓެލްކޯގެ ނިޒާމުގެ ތެރޭގައި ހިމެނޭއިރު އޭގެ ތެރެއިން ވެމްކޯގެ ކުނި ނެގުމުގެ ޚިދުމަތް ހޯދަނީ 2،000 ތަން ކަމަށް މެނޭޖިން ޑިރެކްޓަރ ވިދާޅުވިއެވެ.

މުޖުތަބާ ވިދާޅުވީ އަމާޒަކީ ބާކީ ހުރި 10،000 ތަނުގެ ތެރެއިން 8،000 ތަން ވެމްކޯގެ ކުނި ނަގައިދިނުމުގެ ޚިދުމަތުގެ ތެރެއަށް އަންނަ އަހަރު ނިމުމުގެ ކުރިން ގެނައުން ކަމަށެވެ. އޭރުން 15 މިލިޔަން ރުފިޔާ އާމްދަނީގެ ގޮތުގައި އިތުރުކުރެވޭނެކަމަށް ލަފާކުރެވޭކަމަށް މުޖުތަބާ ވިދާޅުވިއެވެ.

"ހުރިހާ ވިޔަފާރިކުރާ ތަނަކަށް ގޮސް، އެތަނެއް ބޭނުންވާ ގޮތަށް ޕެކޭޖުތަކެއް އެބަ ހުށައަޅަން. ބައެއް ވިޔަފާރިތަކުން ބޭނުންވޭ ހަމައެކަނި ރޭގަނޑު ތެރޭ ކުނި ނަގަން. އަދި ބައެއް ތަންތަނުން ބޭނުންވޭ ދެއިރަށް ކުނި ނަގަން. އަޅުގަނޑުމެން ބޭނުންވަނީ ކަސްޓަމަރު ބޭނުންވާ ގޮތަށް ޚިދުމަތް ދޭން." މުޖުތަބާ ވިދާޅުވިއެވެ.

މުޖުތަބާ ވިދާޅުވީ މިދިޔަ ދެ މަސް ދުވަހުގެ ތެރޭގައި ހާހެއްހާ ތަނަށް ޒިޔާރަތްކުރެވިއްޖެކަމަށާއި އޭގެ ތެރެއިން 270 އަށްވުރެ ގިނަ ތަން ވެމްކޯގެ ޚިދުމަތަށް ގެނެވިއްޖެ ކަމަށެވެ.

ވެމްކޯގެ ޚިދުމަތް ނުހޯދައި ވިޔަފާރިތަކަށް ކުނި އުކައިދެނީ އަމިއްލަ ފަރާތްތަކެވެ. މިގޮތަށް އަމިއްލަ ފަރާތްތަކުން ކުނި އުކައިދޭއިރު، ބައެއްފަހަރު މަގުމައްޗަށް ކުނި އެޅިފައިހުންނަކަން ވެމްކޯއިން ފާހަގަކުރައްވައެވެ. އެހެންކަމުން ވިޔަފާރިތަކުން ވެމްކޯގެ ކުނި ނަގައިދިނުމުގެ ޚިދުމަތާ ގުޅުން މުހިންމުކަން އެ ކުންފުނިން ފާހަގަކުރައްވައެވެ.