ތަޢުލީމީ ދާއިރާގެ ފެންވަރު މަތިކުރުމަށާއި ދިރާސާތަކުގައި އެއްބާރުލުން ދިނުމަށް އެއްބަސްވުމެއް

ތަޢުލީމީ ދާއިރާގެ ފެންވަރު މަތިކުރުމަށާއި ދިރާސާތަކުގައި އެއްބާރުލުން ދިނުމަށް ދިވެހި ރާއްޖޭގެ ޤައުމީ ޔުނިވަރސިޓީއާއި އޮސްޓްރޭލިއާގެ މެލްބަން ޔުނިވަރސިޓީއާއި ދެމެދު އެއްބަސްވުމެއްގައި ސޮއިކޮށްފިއެވެ.

އެމްއެންޔޫގައި ބޭއްވި ރަސްމިއްޔާތުގައި އެމްއެންޔޫގެ ފަރާތުން ސޮއިކުރެއްވީ ވައިސް ޗާންސެލަރު ޑރ. ޢާއިޝަތު ޝެހެނާޒް އާދަމްއެވެ. އަދި، މެލްބަން ޔުނިވަރސިޓީގެ ފަރާތުން ސޮއިކުރެއްވީ އެ ޔުނިވަރސިޓީ ތަމުސީލުކުރައްވާ ރޮންޑާ ޑި ބައިއަސްއެވެ.

މި ރަސްމިއްޔާތުގައި ވާހަކަދައްކަމުން އެމްއެންޔޫގެ ވައިސް ޗާންސެލަރު ޑރ. ޢާއިޝަތު ޝެހެނާޒް އާދަމް ވިދާޅުވީ، ދުނިޔޭގެ ފެންވަރުގައި ފާހަގަކުރެވޭ، އަދި ޝަރަފުވެރި މުއައްސަސާއެއް ކަމުގައިވާ މެލްބަން ޔުނިވަރސިޓީއާއެކު ގުޅިގެން މަސައްކަތްކުރުމަކީ، އެމްއެންޔޫގެ އަމާޒުތައް ހާސިލުކުރުމުގެ ޤާބިލުކަން ވަރަށް ބޮޑަށް އިތުރުވެގެންދާނެ ކަމެއްކަމަށެވެ. އަދި އުންމީދަކީ އޮސްޓްރޭލިއާގެ އިތުރު ޔުނިވަރސީޓީތަކާއެކުވެސް މަސައްކަތް ކުރުމުގެ ފުރުސަތު ލިބުންކަމަށް ޑރ. ޝެހެނާޒް ވިދާޅުވިއެވެ.

"ދެ ޔުނިވަރސިޓީ ގުޅިގެން މަސައްކަތްކޮށް ތަފާތު އެކި ދާއިރާތަކުން ދިރާސާކުރުމާއި އަދި ތަޢުލީމީ ގޮތުން ގާބިލްކަން އިތުރުކުރެވިގެން ދާނެ" ޑރ. ޝެހޭނާޒް ވިދާޅުވިއެވެ.

މި އެއްބަސްވުމަކީ ދުނިޔެއަށް ކުރިމަތިވެފައިވާ ގޮންޖެހުންތަކަށް ހައްލު ހޯދުމަށާއި، ދެމެހެއްޓެނިވި ތަރައްޤީ ކުރިއެރުވުމަށާއި، ތަޢުލީމީ އަދި ދިރާސާގެ ފެންވަރު މަތިކުރުމަށް ދެ ޔުނިވަރސިޓީއާއި ދެމެދު ވެފައިވާ އެއްބަސްވުމެކެވެ.

އެމްއެމްޔޫއިން ވިދާޅުވީ މި ބައިވެރިވުމުގެ ސަބަބުން ގުޅިގެން ދިރާސާކުރުމަށާއި، ތަޢުލީމީ ދަރިވަރުން ބަދަލުކުރުމުގެ ޕްރޮގްރާމްތަކަށާއި، އައު އީޖާދީ މަޝްރޫޢުތަކަށް މަގުފަހިވެގެންދާނެއެވެ. އަދި ދަރިވަރުންނަށާއި، މުދައްރިސުންނަށާއި، އަދި ދެ ޔުނިވަރސިޓީން ޚިދުމަތް ހޯދާ ފަރާތްތަކަށްވެސް ފައިދާކުރާނެ ކަމަށް އެމްއެންޔޫއިން ވިދާޅުވެއެވެ.