ޕާޓީ ބަދަލުކޮށްފިނަމަ މަޖިލީހުގެ މެންބަރުކަމުން ވަކިވާގޮތަށް ޤާނޫނުއަސާސީއަށް އިސްލާޙެއް

ރައްޔިތުންގެ މަޖިލީހަށް އިންތިޚާބުވި މެންބަރަކު ސިޔާސީ ޕާޓީ ބަދަލުކޮށްފިނަމަ ނުވަތަ އެ މެންބަރަކު ޕާޓީން ވަކިކޮށްފިނަމަ މެންބަރުކަން ގެއްލޭގޮތަށް ޤާނޫނުއަސާސީއަށް އިސްލާޙެއް ހުށައަޅައިފިއެވެ.

ސަރުކާރުގެ ފަރާތުން ޤާނޫނުއަސާސީއަށް އިސްލާޙު ހުށައެޅުމުގެ ބިލު ހުށައެޅުއްވީ ހުޅުދޫ ދާއިރާގެ މެންބަރު މުޙައްމަދު ޝާހިދުއެވެ. މި ބިލުގެ ފުރަތަމަ ކިޔުން މިހާރު ވަނީ މަޖިލީހަށް އިއްވާފައެވެ.

ޤާނޫނުއަސާސީއަށް ހުށައެޅުއްވި އިސްލާޙުގައިވަނީ ވަކި ސިޔާސީ ޕާޓީއެއްގެ ފަރާތުން ވާދަކޮށްގެން ރައްޔިތުންގެ މަޖިލީހަށް އިންތިޚާބުވުމަށްފަހު އެ މެންބަރަކު ރައްޔިތުންގެ މަޖިލީހަށް އިންތިޚާބުވި ރައްޔިތުންގެ މަޖިލީހުގެ ޢުމުރުގެ ތެރޭގައި އެ މެންބަރަކު ތަމްސީލްކުރާ ސިޔާސީ ޕާޓީން އަމިއްލައަށް ވަކިވެއްޖެނަމަ މަޖިލީހުގެ މެންބަރުކަމުން ވަކިވާނެ ކަމަށެވެ.

އަދި މަޖިލީހަށް މެންބަރު އިންތިޚާބުވި ސިޔާސީ ޕާޓީގެ ފަރާތުން އޭނާ ވަކިކުރުމާއި އެ މެންބަރަކު ތަމްސީލްކުރާ ޕާޓީ ނޫން އެހެން ޕާޓީއެއްގެ މެންބަރަކަށްވެއްޖެނަމަވެސް މެންބަރުކަމުން ވަކިވާނެކަމަށް އިސްލާޙު ގެނައުމުގެ ބިލުގައި ވަނީ ބަޔާންކޮށްފައެވެ.

މީގެ އިތުރުން މަޖިލީހަށް ޕާޓީއެއް ތަމްސީލްކޮށްގެން އިންތިޚާބު ނުވި ނަމަވެސް، މިހާރު ސިޔާސީ ޕާޓީތަކުގައި ތިއްބެވި މެންބަރުންގެ މައްޗަށްވެސް މިދެންނެވި ކަންކަން ތަންފީޒްވާނެކަމަށް ބިލުގައި ބަޔާންކޮށްފައިވެއެވެ. އަދި އަމިއްލަ ގޮތުން ވާދަކޮށްގެން މަޖިލީހަށް އިންތިޚާބުވާ މެންބަރަކު، މަޖިލީހުގެ ޢުމުރުގެ ތެރޭގައި ސިޔާސީ ޕާޓީއެއްގެ މެންބަރަކަށްވެއްޖެނަމަ މެންބަރުކަމުން ވަކިވާނެކަމަށްވެސް އައު އިސްލާޙުގައި ވަނީ ބަޔާންކޮށްފައެވެ.

ނިމިދިޔަ އެމްޑީޕީގެ މެޖޯރިޓީ އޮތް މަޖިލީހުން ވަނީ އެންޓި ޑިފެކްޝަންގެ ޤާނޫނަށް އިސްލާޙު ގެނެސްފައެވެ. މި އިސްލާޙުގައި ބަޔާންކޮށްފައިވަނީ ޕާޓީ ބަދަލުކޮށްފިނަމަ، އެ މެންބަރަކު އަމިއްލައަށް އިސްތިއުފާ ދޭންޖެހޭނެ ކަމަށެވެ. އަދި އިސްތިއުފާ ނުދީފިނަމަ ދެން މެންބަރާމެދު ޢަމަލުކުރެވޭނެ ގޮތެއް ބަޔާންކޮށްފައެއް ނުވެއެވެ. އަދި ޕާޓީ ބަދަލުކޮށްފިނަމަ، ސީދާ މެންބަރު ވަކިވާނެކަމަކަށްވެސް މިހާރު ޢަމަލުކުރަމުން އަންނަ އެންޓި ޑިފެކްޝަންގެ ޤާނޫނުގައި ނޯވެއެވެ.