ބާ އިމްތިޙާނުގައި ބައިވެރިވި 183 ކެންޑިޑޭޓުންގެ ތެރެއިން 57 އިންސައްތަ ފާސްވި

މިދިޔަ އޮކްޓޫބަރުމަހު ބޭއްވި ބާ ކައުންސިލް އިމްތިޙާނުގައި ބައިވެރިވި 183 މީހުންގެ ތެރެއިން 57 އިންސައްތަ މީހުން ފާސްވިކަމަށް އެކައުންސިލުން ހާމަކުރައްވައިފިއެވެ.

ބާ އިމްތިހާނަކީ ޤާނޫނީ ދާއިރާއަށް އަލަށް ނުކުންނަށް ފަރާތްތަކުގެ ކިބައިގައި ރާއްޖޭގައި ޤާނޫނީ ޚިދުމަތް ދިނުމަށް ބޭނުންވާ އެންމެ އަސާސީ ޤާނޫނީ ޢިލްމާއި ހުނަރު ހުރިކަން ކަށަވަރުކޮށް ފެންވަރު ވަޒަންކުރުމަށް ދެވޭ އިމްތިހާނެކެވެ.

ބާ ކައުންސިލުން ނެރުނު ބަޔާނެއްގައި ވިދާޅުވީ މިދިޔަ އޮކްޓޫބަރުމަހުގެ 12 ވަނަ ދުވަހު ބޭއްވި ބާ އިމްތިޙާންގެ ނަތީޖާ މިހާރު ދޫކުރަން ފަށާފައިވާ ކަމަށެވެ. އަދި މިއަހަރުގެ އިމްތިޙާންގައި ބައިވެރިވި 183 ކެންޑިޑޭޓުންގެ ތެރެއިން 57 އިންސައްތަ ކެންޑިޑޭޓުން ފާސްވެފައިވާކަމަށް ބާ ކައުންސިލުން ނެރުއްވި ބަޔާނުގައި ވިދާޅުވިއެވެ. އަދި އިމްތިޙާންގައި ބައިވެރިވި 85 އިންސައްތަ ކެންޑިޑޭޓުންނަކީ ރާއްޖޭގެ މަތީ ތަޢުލީމުދޭ މަރުކަޒުތަކުން ޤާނޫނީ ދާއިރާއިން ޑިގްރީ ޙާސިލްކޮށްފައިވާ މީހުންކަމަށާއި ބާކީ 15 އިންސައްތަ ކެންޑިޑޭޓުން ޑިގްރީ ޙާސިލްކޮށްފައިވަނީ ރާއްޖެއިން ބޭރުގެ މަތީ ތަޢުލީމު ފޯރުކޮށްދޭ މަރުކަޒުތަކުންކަމަށް ބާ ކައުންސިލުން ވިދާޅުވެއެވެ.

ރާއްޖޭގެ ޤާނޫނީ ފަންނުގެ ޤާނޫނުގައި ޤާނޫނީ ވަކީލަކަށްވުމަށް ކަނޑައަޅާފައިވާ ތިން އަސާސީ ޝަރުތުތަކުގެ ތެރޭގައި ބާ އިމްތިހާނުން ފާސްވުން ހިމެނެއެވެ. އެގޮތުން، ވަކީލުންގެ ގޮތުގައި މަސައްކަތް ކުރެވޭނީ ބާ ކައުންސިލުން ގަބޫލުކުރާ ޤާނޫނީ ދާއިރާގެ ފުރަތަމަ ޑިގްރީ ހާސިލްކުރުމާއެކު ބާ ކައުންސިލް އިމްތިހާނުން ފާާސްވެ، ޤާނޫނީ ދާއިރާގެ އަމަލީ ތަޖުރިބާ ހޯދުމަށް ފުރިހަމަ ކުރަންޖެހޭ ލައިސަންސިންގ ތަމްރީން ފުރިހަމަ ކުރުމަށްފަހުއެވެ.

ބާ އިމްތިހާނުގެ މަންހަޖު އެކުލަވާލަނީ ޤާނޫނީ ދާއިރާގައި މަސައްކަތް ކުރާ ތަޖުރިބާކާރު ޤާނޫނީ ވަކީލުންނާއި ޤާނޫނީ ތަޢުލީމު އުނގަންނައިދޭ ބޭފުޅުންނާއި ފަނޑިޔާރުން ހިމެނޭގޮތަށް އެކުލަވާލާފައިވާ ބާ އިމްތިކާނުގެ "ކޮމިޓީ އޮފް އެކްސްޕަރޓްސް" އިންނެވެ.

މިއަހަރުގެ އިމްތިހާނުގެ ބައިވެރިންނަށް އަލަށް މަންހަޖަށް އިތުރުކުރެވުނު ބައިތަކުންނާއި ރެކޯޑުކުރެވިފައިވާ ލެކްޗަރތައް ނަގައިދީފައިވާނެ ކަމަށް ބާ ކައުންސިލުން ވިދާލުވެފައިވެއެވެ. މިއަހަރުގެ ބާ އިމްތިހާނު އިމްތިޒާމްކުރީ ސަރުކާރާއި ޔޫއެސްއެއިޑާއި އެމެރިކަން ބާ އެސޯސިއޭޝަންގެ އެހީތެރިކަމާއެކުއެވެ.