ރާއްޖޭގައި ބާއްވާ އެކައުންޓިން ދާއިރާގެ އެންމެ ބޮޑު ފޯރަމް މިމަހު 14ގައި ފަށަނީ

ދިވެހިރާއްޖޭގައި ބާއްވާ އެކައުންޓިން ދާއިރާގެ އެންމެ ބޮޑު ފޯރަމްކަމަށްވާ "އައިއެފްއާރުއެސް އެންޑް އައިއެސްއޭ ފޯރަމް" މިމަހު 14 ވަނަ ދުވަހު ފެށުމަށް ހަމަޖެހިފައިވާކަމަށް އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސް، ސީއޭ މޯލްޑިވްސްއިން އިޢުލާންކުރައްވައިފިއެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގުރާމްގައި ވާހަކަދައްކަވަމުން އިންސްޓިޓިއުޓް އޮފް ޗާޓަޑް އެކައުންޓެންޓްސް، ސީއޭ މޯލްޑިވްސްގެ ރައީސް މުޙައްމަދު ޙަލީމް ޢަބްދުﷲ ވިދާޅުވީ އައިއެފްއާރުއެސް އެންޑް އައިއެސްއޭ ފޯރަމްގައި އިންޓަނޭޝަނަލް ފައިނެންޝިއަލް ރިޕޯޓިން ސްޓޭންޑަޑްސްއާއި އިންޓަނޭޝަނަލް ސްޓޭންޑަޑްސް އޮން އޮޑިޓިންއާގުޅޭ އެންމެ ފަހުގެ މަޢުލޫމާތުތައް ހިއްސާކުރެވޭނެ ކަަމަށެވެ. އަދި ބޭރު ޤައުމުތަކުގެ އެކައުންޓިންގެ ދާއިރާގެ ތަޖުރިބާކާރުން ފޯރަމްގައި މަޢުލޫމާތުދީ ތަމްރީން ސެޝަންތައް ނަގައިދޭނެކަމަށްވެސް ޙަލީމް ވިދާޅުވިއެވެ.

"މި ފޯރަމްގައި އެކައުންޓިން ދާއިރާގައި މަސައްކަތްކުރާ ފަރާތްތަކުން ބައިވެރިވުން ވަރަށް މުހިންމު. ވިޔަފާރިތަކާއި އެކައުންޓިން ދާއިރާގައި މަސައްކަތްކުރާ ފަރާތްތަކުގެ އެއްބާރުލުން ލިބޭ މި ފޯރަމަށް." ސީއޭ މޯލްޑިވްސްގެ ރައީސް ޙަލީމް ވިދާޅުވިއެވެ.

ސީއޭ މޯލްޑިވްސްގެ "އައިއެފްއާރުއެސް އެންޑް އައިއެސްއޭ ފޯރަމް" އޮންނާނީ މިމަހު 14 އިން 15 އަށް، ޢުމަރު ޒާހިރު ބިލްޑިންގައެވެ. މި ފޯރަމަށް 300 އެއްހާ މީހުން ވަނީ ރެޖިސްޓްރީވެފައެވެ. މިއަހަރަކީ ސީއޭ މޯލްޑިވްސްއިން މި ފޯރަމް ބާއްވާ 3 ވަނަ އަހަރެވެ. ފުރަތަމަ ފަހަރަށް ބާއްވާފައިވަނީ 2022 ވަނަ އަހަރުއެވެ.

އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސް އަކީ ރާއްޖޭގެ އެކައުންޓަންސީ ޕްރޮފެޝަނާގުޅޭ ކަންކަން، ބައިނަލްއަޤްވާމީ އުސޫލުތަކާއި ހަމަތަކާ އެއްގޮތްވާ ގޮތުގެމަތިން ތަންޒީމުކޮށް، ރާއްޖޭގައި އެކައުންޓަންސީގެ ޕްރޮފެޝަނެއް ޤާއިމުކޮށް، އެ ޕްރޮފެޝަން ކުރިއެރުވުމަށް މަގުފަހިކުރުމަށްޓަކައި އުފައްދާފައިވާ އިންސްޓިޓިއުޓެކެވެ. މި އިދާރާ އުފައްދާފައިވަނީ 2020 ވަނަ އަހަރު އެކުލަވާލި ދިވެހިރާއްޖޭގެ ޗާޓަރޑް އެކައުންޓެންޓުންގެ ޤާނޫނުގެ ދަށުންނެވެ.