ރަށްރަށުގައި ބުޅަލަށް އަނިޔާވެރިވާކަމުގެ ޝަކުވާތަކެއް، އެކަން ނުކުރުމަށް އިލްތިމާސްކޮށްފި

ބައެއް ރަށްރަށުގެ މަގުމަތީގައި ވީއްލިގެން އުޅޭ ބުޅާތަކަށް އަނިޔާކޮށް މަރާކަމުގެ ޝަކުވާތަކެއް ލިބެމުންދާކަމަށާއި، އެކަން އެގޮތަށް ނުކުރުމަށް ދަނޑުވެރިކަމާއި ދިރޭތަކެއްޗާބެހޭ ވުޒާރާއިން އިލްތިމާސްކުރައްވައިފިއެވެ.

ދަނޑުވެރިކަމާއި ދިރޭތަކެއްޗާބެހޭ ވުޒާރާއިން ނެރުއްވި ބަޔާނެއްގައި ވިދާޅުވީ މިހާރަކަށް އައިސް ރާއްޖޭގެ ބައެއް ރަށްރަށުގެ މަގުމަތީގައި ވީއްލިގެން އުޅޭ ބުޅާތަކަށް ގޯނާކޮށް، ހާނިއްކަކޮށް މަރާކަމުގެ ޝަކުވާތައް އެވުޒާރާއަށް ލިބެމުންދާ ކަމަށެވެ. އަދި މިއީ ޖަނަވާރުންގެ ދުޅަހެޔޮކަމުގެ މިންގަނޑުތަކާ ޚިލާފު ޢަމަލަކަށްވާތީ، އެކަން އެގޮތަށް ނުކުރުމަށް ދިރޭތަކެއްޗާބެހޭ ވުޒާރާއިން އިލްތިމާސްކުރެއްވިއެވެ.

ދިރޭތަކެއްޗާބެހޭ ވުޒާރާއިން ވިދާޅުވީ ރާއްޖެއިން ބައިވެރިވެފައިވާ، ދުނިޔޭގެ ޖަނަވާރުންގެ ޞިއްޙަތާބެހޭ ޖަމިއްޔާގެ އެނިމަލް ހެލްތު ކޯޑުގައި ޖަނަވާރުންގެ ދުޅަހެޔޮކަމަށް ޚާއްޞަ އަހައްމިއްޔަތުކަމެއް ދީފައިވާ ކަމަށެވެ. އަދި އެނިމަލް ހެލްތު ކޯޑުގެ ދަށުން ދަނޑުވެރިކަމަށާއި މުނިފޫހިފިލުވަމަށާއި ޢިލްމީ ދިރާސާކުރުންފަދަ ބޭނުންތަކަށް ޖަނަވާރުން ގެންގުޅުމުގައި ދުޅަހެޔޮކަން ކަށަވަރުކުރަންޖެހޭނެކަމަށް އެ ވުޒާރާއިން ވިދާޅުވިއެވެ.

ދިރޭތަކެއްޗާބެހޭ ވުޒާރާއިން ވިދާޅުވީ ބުއްދިއެއްނުވާ އެއްޗަކަށްވާތީ ޖަނަވާރުންގެ ފަރާތުން އިންސާނުންނަށް އުނދަގޫތަކެއް ކުރިމަތިވުމަކީ އެކަށީގެންވާކަމެއް ކަމަށާއި ނަމަވެސް އެއީ އެ ތަކެއްޗަށް ގޯނާކުރަން ލިބޭ ސަބަބެއް ނޫންކަމަށެވެ. އަދި އެފަދަ ކަމެއްކުރުމަކީ އިންސާނިއްޔަތާވެސް ޚިލާފު ޢަމަލެއްކަން އެ ވުޒާރާއިން ވަނީ ހަނދާންކޮށްދެއްވާފައެވެ.

އަދި މާތްވެގެންވާ އިސްލާމް ދީނުގައިވެސް ދިރޭތަކެއްޗަށް ރަޙުމުކޮށް، އަޅާލައި، އޯގާތެރިވުމަށް ވަނީ ބާރުއަޅުއްވާފައިވުމުން ރާއްޖޭގައި އުޅޭ އެއްވެސް ޖަނަވާރަކަށް އަނިޔާވެރިވުން ފަދަ ނޭދެވޭ ކަންކަމުން ދުރުވެ އެތަކެއްޗަށް އަޅާލައި، އޯގާތެރިވުމަށް ދިރޭތަކެއްޗާ ބެހޭ ވުޒާރާއިން އިލްތިމާސްކުރައްވައެވެ.

މާލޭގެ އިތުރުން ރަށްރަށުގެ މަގުމަތީގައި އުޅޭ ބުޅާތަކުގެ ހާލަތު ދެނެގަތުމުގެ މަސައްކަތް ފަށަން ނިންމާފައިވާކަމަށް ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން ވަނީ ވިދާޅުވެފައެވެ.

މާލޭއަށް ގިނަވެފައިވާ ބުޅާތަކަށް ހިޔާވައްސެއް ފޯރުކޮށްދީ، އެ ތަކެތީގެ ދުޅަހެޔޮކަން ކަށަވަރުކުރުމަށް "އޮޅު ހިޔާ"ގެ ނަމުގައި ކެޓް ޝެލްޓަރއެއް ސަރުކާރުން ވަނީ ޤާއިމްކޮށްފައެވެ. އަދި އެތަން އޮޕަރޭޝަނަށް ގެނައުމުގެ މަސައްކަތް ސަރުކާރުން މިހާރު ވަނީ ފައްޓަވާފައެވެ.