ލޯކަލް މާރުކޭޓާއި ހީނާމާގޭ ޕާކިން ސަރަހައްދުން 25 ބިދޭސީއަކު އިމިގްރޭޝަނުގެ ބެލުމުގެ ދަށަށް
-
އެ ސަރަހައްދުތަކުގައި ހަރަކާތްތެރިވި 137 ބިދޭސީއަކު ބަލާ ފާސްކުރި
ލޯކަލް މާރުކޭޓާއި ހީނާމާގޭ ޕާކިންގައި ހިންގި އޮޕަރޭޝަންތަކެއްގައި 25 ބިދޭސީއަކު މޯލްޑިވްސް އިމިގްރޭޝަންގެ ބެލުމުގެ ދަށަށް ގެނެސްފައިވާކަމަށް އެ މުޢައްސަސާއިން ވިދާޅުވެއްޖެއެވެ.
ރާއްޖޭގައި ގަވާއިދާ ޚިލާފަށް އުޅޭ ބިދޭސީން ދެނެގަތުމަށް އިމިގްރޭޝަނުން އަންނަނީ ތަފާތު އޮޕަރޭޝަންތައް ހިންގަވަމުންނެވެ. އަދި އާންމުންގެ ފަރާތުން މިފަދަ ކަންކަން ރިޕޯޓް ކުރުމަށް "އިމިގްރޭޝަން ވޮޗް"ވެސް ވަނީ ގާއިމުކުރައްވާފައެވެ.
އިމިގްރޭޝަނުން ވިދާޅުވީ ލޯކަލް މާރުކޭޓު ސަރަހައްދާއި ހީނާމާގެ ޕާކިން ސަރަހައްދަކީ ޤަވާއިދާއި ޚިލާފަށް އުޅޭ ބިދޭސީންގެ ނުފޫޒުގަދަކަމަށް "އިމިގްރޭޝަން ވޮޗް" އަށް މައުލޫމާތު ލިބިފައިވާ 2 ސަރަހައްދު ކަމަށެވެ. އެގޮތުން ސަރަހައްދުތަކަށް ހާއްސަކޮށްގެން އިމިގްރޭޝަންގެ ޓާސްކުފޯހުން ހިންގެވި ހާއްސަ ރެއިޑު އޮޕަރޭޝަނުގައި 137 ބިދޭސީން ބަލައި ފާސްކޮށް، ޤަވާއިދާ ހިލާފަށް އުޅެމުންދިޔަ 25 ބިދޭސީއަކު އިމިގްރޭޝަންގެ ބެލުމުގެ ދަށަަށް ގެންގޮސްފައިވާ އެ މުޢައްސަސާއިން ވިދާޅުވެއެވެ.
މި ރެއިޑު އޮޕަރޭޝަންގައި ކޮންޓްރޯލަރ ޖެނެރަލް އޮފް އިމިގްރޭޝަން، މުޙައްމަދު ޝަމްޢާން ވަޙީދު އަދި ޑެޕިއުޓީ ކޮންޓްރޯލަރ، އަހުމަދު އަޝްފާންވެސް އަމަލީ ގޮތުން ބައިވެރިވެ ވަޑައިގެންނެވިއެވެ.
އިމިގްރޭޝަނުން ހިއްސާކޮށްފައިވާ ރެއިޑް އޮޕަރޭޝަނުގެ ވީޑިއޯއިން ފެންނަގޮތުގައި އިމިގްރޭޝަންގެ އޮފިސަރުން މާރުކޭޓަށް ވަނުމުން ބިދޭސީންތައް އޮފިސަރުންނަށް ފިލަންވެގެން ދުއްވައިގަނެއެވެ. ނަމަވެސް އިމިގްރޭޝަންގެ އޮފިސަރުން އެމީހުން އަތުލައިގަންނަ މަންޒަރު ފެނިގެންދެއެވެ.
ގަވާއިދާ ހިލާފަށް އުޅޭ ބިދޭސީންގެ ނުފޫޒުގަދަކަމަށް "އިމިގްރޭޝަން ވޮޗް" އަށް މައުލޫމާތު ލިބިފައިވާ ދެ ސަރަހައްދެއް ކަމަށްވާ މާލޭގެ ލޯކަލް މާރުކޭޓު އަދި ހީނާމާގޭ ޕާކިންގ ސަރަހައްދަށް ހާއްސަކޮށް، ޓާސްކުފޯހުން މިއަދު ވަނީ ހާއްސަ ރެއިޑު އޮޕަރޭޝަނެއް ހިންގާފައި. އެގޮތުން 137 ބިދޭސީން… pic.twitter.com/HmGtNbzzee
— Maldives Immigration (@ImmigrationMV) December 25, 2024
ޤަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލަ ޙައްލުކުރުމަކީ ސަރުކާރުން ޚާއްސަ އިސްކަމެއް ދެއްވައިގެން ރިއަށްގެންދާ މަސައްކަތެކެވެ. އެ މަސައްކަތުގެ ދަށުން މާލޭގައި ހިންގާ އޮޕަރޭޝަންގެ އިތުރުން މީހުން ދިރިއުޅޭ އެހެން ރަށްރަށާއި ރިސޯޓުތަކާއި ސިނާއީ ރަށްތަކާއި ދަނޑުވެރިކަމަށް ދޫކޮށްފައިވާ ރަށްތަކުގައި ދިރިއުޅޭ ބިދޭސީންގެ މައުލޫމާތު އެއްކުރުމުގެ މަސައްކަތްވެސް ދަނީ ކުރައްވަމުންނެވެ. އަދި އާންމު ސަލާމަތާއި ރައްކާތެރިކަމަށް ނުރައްކާވާފަދަ ގޮތަށް ކާބޯތަކެތި ތައްޔާރުކުރާ ތަންތަން ބަލައި ފާސްކުރުމަށް ޚާއްސަ އޮޕަރޭޝަނެއްވެސް ވަނީ ފަށްޓަވާފައެވެ.
ބިދޭސީންގެ މައްސަލަ ހައްލުކުރުމަށް ކުރަމުންދާ މަސައްކަތުގެ ދަށުން މިހާތަނަށް ގަވާއިދާ ޚިލާފަށް އުޅުނު ފަސް ހާހަށްވުރެ ގިނަ ބިދޭސީން ޑީޕޯޓްކޮށްލާފައިކަމަށް މޯލްޑިވްސް އިމިގްރޭޝަނުން ވަނީ މީގެކުރިން ވިދާޅުވެފައެވެ.
ޤަވާއިދާ ޚިލާފަށް އުޅޭ ބިދޭސީން ހޯދުމަށް ހިންގާ އޮޕަރޭޝަން ރާއްޖޭގެ ހުރިހާ ރަށަކަށް ސަރުކާރުން ވަނީ ފުޅާކޮށްފައެވެ. އަދި ރާއްޖޭގަތިބި ހުރިހާ ބިދޭސީންގެ މަޢުލޫމާތު އެއް ޑޭޓާބޭސްއަކަށް ގެނެސް ބިދޭސީންގެ މައްސަލަތައް 3 އަހަރުގެތެރޭ ޖުމްލަ ޙައްލެއް ގެނައުމަކީވެސް ސަރުކާރުގެ އަމާޒެކެވެ.