ޔޫޓިލިޓީ ޚިދުމަތްދޭ ތަންތަން ހިންގުމުގެ ދާއިމީ ލައިސެންސް ފުރަތަމަ ފަހަރަށް ދޫކޮށްފި

ޔޫޓިލިޓީ ރެގިއުލޭޓަރީ އޮތޯރިޓީ, ޔޫއާރުއޭއިން ޢާންމު ބޭނުންތަކުގެ ޚިދުމަތްދިނުމުގެ ދާއިމީ ހިންގުމުގެ ލައިސެންސް ދޫކުރަން ފަށައިފިއެވެ.

ޔޫއާރުއޭއިން ދޫކުރާ ޢާންމު ބޭނުންތަކުގެ ޚިދުމަތްދިނުމުގެ ލައިސެންސަކީ ފީއެއް ނަގައިގެން ނުވަތަ ވިޔަފާރީގެ އުސޫލުން ދޭ ފެނާއި ނަރުދަމާއާއި ކަރަންޓާއި ކުނި މެނޭޖްކުރުމުގެ ޚިދުމަތްތައް ދިނުމަށްޓަކައި ދޫކުރާ ލައިސެންސެކެވެ.

ޔުޓިލިޓީ ރެގިއުލޭޓަރީ އޮތޯރިޓީން ވިދާޅުވީ ޔުޓިލިޓީ ރެގިއުލޭޓަރީ އޮތޯރިޓީގެ ޤާނޫނުގެ ދަށުން ޢާންމު ބޭނުންތަކުގެ ޚިދުމަތްދިނުމުގެ ދާއިމީ ހިންގުމުގެ ލައިސެންސް މިހާރު ދޫކުރަން ފަށައިފާވާ ކަމަށެވެ. މީގެ ކުރިން އެ އޮތޯރިޓީން ދޫކުރަމުން އައީ ވަގުތީ ހިންގުމުގެ ލައިސެންސެކެވެ. މިފަދަ ލައިސެންސެއް ނެތި ޚިދުމަތް ދިނުމަކީ ޔޫއާރުއޭގެ ޤާނޫނުގެ ދަށުން މަނާކަމެކެވެ.

ޔޫއާރުއޭއިން މިހާތަނަށް ވަނީ ޔުޓިލިޓީ ޚިދުމަތް ފޯރުކޮށްދޭ ބައެއް ފަރާތްތަކަށް ދާއިމީ ހިންގުމުގެ ލައިސަންސް ދޫކޮށްފައެވެ. އެ އޮތޯރިޓީން ވިދާޅުވާ ގޮތުގައި ޢާންމު ބޭނުންތަކުގެ ޚިދުމަތްދިނުމުގެ ދާއިމީ ހިންގުމުގެ ލައިސެންސެއް ދޫކުރަން ފެށުމުން ޔޫޓިލިޓީ ޚިދުމަތްތައް ފުޅާވެ، ކުރިއަރާނެއެވެ.

ޔޫއާރުއޭ އުފެދުނީ 2020 ވަނަ އަހަރުއެވެ. ޔޫއާރުއޭގެ މަޤުޞަދަކީ ޢާންމު ބޭނުންތަކުގެ ޚިދުމަތްތަކަކީ ދިވެހިރާއްޖޭގައި ދިރިއުޅޭ އެންމެނަށް އެކަށީގެންވާ ހެޔޮ އަގެއްގައި ހަރުދަނާ، އިތުބާރުހުރި އަދި ދެމެހެއްޓެނިވި ގޮތެއްގެމަތިން ފޯރުކޮށްދެވޭ ޚިދުމަތްތަކަކަށް ހެދުމެވެ. އަދި މި ޚިދުމަތްތައް ދިނުމުގެ ނިޒާމު ހަރުދަނާކުރުމަށްޓަކައި ގަވާއިދުތަކާއި މިންގަނޑުތައް ކަނޑައަޅައި، ބެލެހެއްޓުމެވެ.